VOV4.Jarai-Ăt amăng lơ ¼, ƀing khua mua pơ ala bơkơtuai ƀơi sang rung pơčrông kơ Hră lăi pơthâo bruă mă rơwang thun 2016-2021 mơ̆ng Anom bruă Pel ĕp ngăn kơnuk kơna; pơčrông sai tơlơi pơkă mrô khua pơ ala glăm ba sa hnong bruă mơ̆ng Khul pơ ala mơnuih ƀôn sang ƀôn prong Hà Nội thun 2021-2026. Lăi pơthâo kơ bruă mă mơ̆ng Anom bruă pel ĕp ngăn kơnuk kơna thun 2016-2021 brơi ƀuh, Anom bruă Pel ĕp ngăn kơnuk kơna hơmâo ngă tui akŏ bruă pel ĕp, jŭ yap ba glăi lu boh tơhnal tŭ yua klă, djru hrŏm ngă giong akŏ bruă jao jơlan hơdră brơi pơhlôm hlâo, pơgăn tơlơi soh sat hưp ham ƀong kông ngăn, ngă huač soh sel hăng ngă kjăp glăi bruă mă tơpă djơ̆ hnong, pơđĭ tui tơlơi kơtang ngă bruă git gai wai lăng, mă yua prăk kăk, kông ngăn kơnuk kơna.

Rơđah biă ñu, rơwang bruă laih rơgao, Anom bruă Pel ĕp ngăn kơnuk kơna rơkâo brơi pơsir tơlơi soh glăi prăk kăk truh kơ 353 rơbâo 700 klai prăk; bơblih 20 mơta tơlơi ngă soh prong jao kơ tơhan pơlih ĕp tơlơi soh, hơduah ĕp tơlơi soh rơđah hloh laih anun phat kơđi djơ̆ tơlơi phiăn.

Kơ boh tơhnal ngă tui tơlơi rơkâo mơ̆ng anom bruă pel ĕp ngăn kơnuk kơna thun 2016-2021, mrô kơđi tơlơi brơi đŭ hăng prăk truh kơ 237 rơbâo 500 klai prăk, dưi ngă giong rơbêh 73% amăng mrô kơđi brơi pơsir; lu hră pơar dưi hơmâo kơnuk kơna, djop ding jum anom bruă hăng tơring čar lui hĭ, čih pơkra glăi, pơbuă tui anŏ aka ƀu djơ̆ tui hăng tơlơi rơkâo mơ̆ng Anom bruă pel ĕp ngăn kơnuk kơna.

Nay Jek: Pơblang