VOV4.Jarai - Bruă čar mơng Binh đoàn 15 hơmâo Kơnuk kơna, Ding jum ling tơhan jao lĕ: Pơđĭ kyar tơlơi bơwih ƀong hrŏm hăng hơkrŭ kơjăp bruă Pơgang lŏn ia - Rơnuk rơnua, akŏ pơjing plơi pla - mơnuih mơnam ƀơi kual Dap Kơdư. Tơdơi kơ rơbêh 35 thun mă bruă, hơdôm anom bruă, anom bơwih ƀong amăng Binh đoàn hơmâo ngă hrŏm kơjăp hăng 270 boh plơi pla,  mơng 33 boh să, phường, tơring kual amăng 4 boh tơring čar: Gia Lai, Kon Tum, Bình Định, Quảng Bình. Rơngiao kơ ngă hmua pla pơjing, bơwih ƀong rơgơi, hơdôm anom bruă hơmâo lăng ba tơlơi hơdip mơng mơnuih mă bruă dong.

Să ƀơi guai lŏn ia Ia Đal, tơring glông Ia H’Drai, tơring čar Kon Tum lĕ kual tơnap biă mă, hơmâo lu mơnuih ƀon sang djuai ƀiă dŏ hơdip. Hăng bruă pơđĭ kyar bơwih ƀong huă - mơnuih mơnam pơlir hăng pơgang rơnuk rơnua lŏn ia, Binh đoàn 15 (gah Ding jum khul ling tơhan) hơmâo akŏ pơdong 716 boh kông ti. 12 grup pơkra gơnam mơng kông ti hơmâo pơdong, amăng anun lu hloh lĕ mơnuih mă bruă djuai ania ƀiă ƀơi anai. Ayong Quách Công Quản lĕ sa amăng hơdôm čô mơnuih blung a hơmâo Kông ti 716 tŭ mă ngă kông ñơn, hơmâo prăk blan rơbêh 6 klăk prăk rim blan ră ruai:

“Mơng hrơi gơmơi rai pơ anai truh ră anai 7 thun laih, tơlơi pơmin hơđong mơn. Nao ngă kông nơn pơ anai lĕ ta pơsit ngă sui thun, dŏ hơdip hăng anom bruă anai yơh, hơmâo ƀing adơi ayong ngă khua pơtô ba, giong anun ngă kông ñơn pơlir hăng bơwih ƀong rơgơi dong yua hnun jing tơlơi hơdip hơđong mơn”

Hăng 35 thun ƀrô ngă bruă bơwih ƀong ƀrô pơhlôm pơgang rơnuk rơnua guai lŏn ia ta, Binh đoàn 15 hơmâo pla 44.000 ektar phun pla ƀơi guai Pơngŏ Dap Kơdư, Lao hăng Kur. Thun hlâo adih, prăk pơhrui mơng anom bruă hơmâo rơbêh 2000 klai prăk, djru brơi bruă mă hăng prăk pơhrui hơđong kơ 17.000 čô mơnuih mă bruă (amăng anun hơmâo giăm 8.000 čô lĕ mơnuih ƀon sang djuai ƀiă ƀơi anai). Hơdôm boh kông ti hơmâo pơtruh ngă adơi ayong hăng 270 boh plơi pla; pơphun brơi rơbêh 4.600 boh sang anŏ djuai ania Yuan ngă giăng mah pŭ ƀăn hăng mơnuih ƀon sang djuai ƀiă.         

Rơmgiao kơ anun, ƀinh đoàn ăt hơmâo pơkra lu ring bruă kah hăng sang hră, sang ia jrao; tuh pơ alin pơkra hơdôm rơtuh km glông hrĕ apui lơtrik hăng hơdôm rơbâo km jơlan nao rai. Hơdôm ring bruă anai djru ba mơnuih ƀon sang lŏm lui tơlơi rin rơpa, man pơdong plơi pla phrâo, pơđĭ kyar bruă hrăm hră hăng ia jrao ƀơi anai. Đại tá Trần Quang Song, Khua hơđăp apăn bruă kơđi čar Binh đoàn 15 lĕ pô dŏ hơdip hrŏm sui hăng mơnuih ƀon sang kual Dap Kơdư, yua hnun hơmâo lu tơlơi hơdor biă:

“Dŏ hơdip hrŏm hăng ană plơi pla pơ binh đoàn 15 anai hơmâo anŏ phara biă: Pơlir hơbit amăng tơlơi hơdip, ngă bruă hrŏm, pơbưp nao rai; dŏ hơdip jê̆ giăm mơng anet, truh prong, truh tha hăng truh kơ djai, lăng nao rai amăng tơlơi ngă yang, pơdô̆ rơkơi bơnai. Biă ñu binh đoàn ngă rơđah tui gru grua hiam anai, hơmâo ngă truh kih djŏp bruă hơmâo jao”.

Amăng hơdôm thun rơgao, hăng lu tơlơi pơplih ƀu klă ƀơi anih sĭ mơdrô gơnam mơng hmua, prăk pơhrui mơng kơsu hăng kơphê lêng trun soh, samơ̆ Binh đoàn 15 ăt pơhlôm brơi tơlơi hơdip mơng ƀing tơhan, mơnuih ngă bruă, pơsur pran jua kiăng mơnuih ngă bruă dŏ mă bruă hrŏm hăng binh đoàn, hơđong pran jua akŏ pơjing lŏn ia. Binh đoàn 15 hơmâo ngă tŭ yua hơdôm jơlan hơdră djru mơnuih mơnam kah hăng “Ling tơhan gum man pơdong plơi pla phrâo”, “Ling tơhan gum hrŏm djru ba mơnuih rin”. Hmư̆ hing hloh, giăm 300 boh sang dŏ hơdor tơngia, rơbêh 260km jơlan nao rai, 120km bơnư̆ kŏng ia hơmâo pơkra ming, hăng pơkra phrâo. Hơdôm rơtuh tơn braih hơmâo ba nao pơ sang anŏ rin amăng bơyan glăk tơjŭ pla.

Binh đoàn 15 jao glăi sang dŏ “Pơlir hơbit djuai ania” kơ ƀing kông ñơn.

Binh đoàn 15 brơi braih djru kơ kông ñơn rin hăng mơnuih mă bruă djuai ƀiă.

Phrâo anai, ƀrô hrơi ngă lơphet 35 thun hrơi akŏ pơdong Binh đoàn 15, Thượng tướng Trần Đơn, Ding kơna apăn bruă Ping gah, Kơ-iăng khua Ding jum ling tơhan bơni kơ hơdôm tơlơi gir ngă, pơčeh phrâo mơng ƀing khua, ling tơhan, mơnuih apăn bruă pơgang lŏn ia hăng mơnuih mă bruă mơng Binh đoàn. Laih dong, kiăng anom bruă ngă klă hloh bruă pơlir hơbit mơnuih mă bruă, biă ñu lĕ mơnuih ƀon sang djuai ƀiă.

“Binh đoàn 15 kiăng hơmâo hơdră djru Binh đoàn pơlir hăng tơring čar, tơring glông; kông ti pơlir hăng tơring glông, să; ngă hmua pla pơjing pơlir hăng plơi pla; sang anŏ djuai ania Yuan dŏ hrŏm hăng sang anŏ djuai ania ƀiă mơn; gum pơgôp, hơdip rơnôm, pơlir nao rai hăng ping gah, gong gai, mơnuih ƀon sang. Biă ñu lĕ khŏm prăp lui hăng pơphun klă Jơnum ping gah djŏp gưl anăp nao Jơnum ping gah dêh čar tal 13; kơsem min rơđah tơlơi hơmâo ƀơi anih dŏ, mơng anun čih hră pơ-ar pơdah thâo amăng mông jơnum hăng akŏ bruă bơwih ƀong sĭ mơdrô lăp djơ̆.

Ƀơi mông jơnum khua mua ping gah tal 8, rơwang thun 2020-2025, Ping gah Binh đoàn 15 pơsit hrơi blan pơ anăp amra pơphun kơčăo bruă pơtruh nao rai ngă hrŏm, pơtong glăi bruă mă kiăo tui hơdră pơkra gơnam ba sĭ, pơđĭ anŏ klă mơng gơnam tam djơ̆ hăng tơlơi kiăng mơng anih sĭ mơdrô. Tơlơi kiăng lĕ gơnam ba sĭ hơmâo 9.800 klai prăk, pơhrui glăi 8.700 klai prăk.

Siu H’Mai: Pơblang