VOV4.Jarai - Boh thâo măi mok phrâo glăk ngă pơplih tañ hloh amăng djop mơta amăng tơlơi hơdip mơda. Ƀơi tơring čar Kontum, ană plơi pla ăt glăk ƀơƀrư̆ thâo mă yua boh thâo măi mok djru amăng bruă wai lăng glai rưng tŭ yua, huăi rơngiă hrơi mông hăng ƀiă mơnuih mă bruă.

Sa hrơi amăng rơnuč blan 4, amăng kual glai rưng mơtah mơda gah kual đang glai Tu Bra A, grup tŭ mă prăk apah mơng wai lăng glai rưng plơi ViChiring să Hiếu, tơring glông Kon Plông pơphun bruă hyu tir wai lăng glai kyâo. Giăm 10 čô mơnuih hăng măi telephôn rơgơi, djă ba hră čih, măi pơkă lăng, pơphun pơkă lăng, jŭ yap glăi kual glai rưng hăng mrô kyâo pơtâo amăng phần mềm Locus Map. Tui hăng ayong A Da, phần mềm anai djru brơi bruă wai lăng hăng pơgang glai rưng ƀơi plơi ViChiring amuñ ƀiă.

Gah ƀing tơhan wai lăng glai rưng hơmâo mă yua phần mềm pơkă lŏn glai rưng, yua kơ hơmâo phần mềm anai adơi ayong amăng plơi pla amuñ lơ̆m hyu tir kiăng kơ wai lăng glai kyâo klă ƀiă dong. Mơng phần mềm anai ƀing gơmơi amuñ jŭ yap glăi kyâo pơtâo, thâo kual lŏn glai pơpă lu kyâo, glai rưng pơpă ƀiă kyâo pơtâo; kual đang glai plơi pla wai lăng; laih dong, mơng mă yua GPS; lơ̆m ƀuh kual glai kyâo arăng phă ƀing gơmơi amra dưi jŭ yap glăi kyâo pơtâo arăng phă, anih kyâo arăng trơ̆i dŏp mơng anun amra gum hrŏm hăng ling tơhan krap mă ƀing hyu klĕ kyâo.

Ơi Phạm Văn Bình - tơhan wai lăng đang glai ƀơi să Hiếu brơi thâo, mơng rơnuč thun hlâo, Keh prăk wai pơgang hăng pơđĭ kyar glai rưng tơring čar Kontum hơmâo gum hrŏm hăng Anom bruă wai lăng glai rưng tơring glông Kon Plông djru brơi ƀing mơnuih wai lăng glai lĕ hơdôm sang anŏ, ană plơi pla mă yua phần mềm Locus Map amăng măi telephôn rơgơi kiăng kơ wai lăng hăng pơgang glai kyâo. Ứng dụng anai huăi rơngiă prăk ôh, amuñ mă yua, GPS yua hơdeč hmar hăng lăp djơ̆ biă mă, djru prong prin amăng bruă hyu tir wai pơgang glai rưng.

Ứng dụng Locus Map gêh gal hăng amuñ mă yua amăng bruă jŭ yap glăi kyâo pơtâo lơ̆m hyu tir, čih glăi hăng mơ-it mrô kyâo pơtâo lêng kơ yua amăng măi telephôn. Laih dong dưi phĭn mă rup (rup pơlir hăng kual glai laih dong amuñ pel ĕp amăng Locus Map ƀudah Google Earth amăng măi telephôn mơng anom bruă wai lăng ƀudah khua mua anom bruă wai lăng đang glai). Rup ăt pơdah rơđah hrơi mông, anih phĭn rup djru brơi bruă kiăo tui lăng mrô mơnuih hyu tir, kual đang glai, mrô kyâo pơtâo djơ̆ hloh.

Ơi Phan Thế Vinh - Khua Jơnum min mơnuih ƀon sang să Hiếu brơi thâo, đơ đam să ră anai hơmâo rơbêh 16.000 ektar glai klô sui thun. Amăng anun kông ti TNHH sa ding kơna wai lăng đang glai Kon Plông wai lăng 13.000 ektar; Jơnum min mơnuih ƀon sang să Hiếu lĕ 3.000 ektar; hăng 164 grup sang anŏ hăng ană plơi pla wai lăng rơbêh 800 ektar. Ră anai hơmâo rơbêh 1.200 čô neh met wa arăng pơtô hrăm, mă yua phần mềm Locus Map kiăng kơ wai lăng glai rưng. Ơi Phan Thế Vinh lăng, bruă mă yua boh thâo măi mok amăng wai lăng glai rưng lĕ tơlơi yak nao yôm phun, ba glăi tŭ yua prong prin.

Lơm Keh prăk wai pơgang hăng pơđĭ kyar glai rưng tơring čar Kontum hăng anom bruă wai lăng đang glai djru brơi mơnuih ƀon sang să mă yua phần mềm wai lăng hăng pơgang glai kyâo amăng măi telephôn rơgơi ƀing gơmơi hok mơ-ak biă mă, anai lĕ hơdră pơtrun mơng Jơnum min mơnuih ƀon sang tơring čar kah hăng Kơnuk kơna. Phần mềm dưi pơlăi nao rai hăng tŭ mă tơlơi pơhing kơ glai rưng 24/24 mông kiăng kơ kiăo tui lăng. Hlâo adih bruă hyu tir glai rưng pơphun na nao hăng lui mơnuih, ră anai kơnong lăng mă amăng măi telephôn đôč hăng ƀu kiăng lu mơnuih dong tah. Sa wŏt hrơi tơjuh kiăng 1 wŏt hyu tir, bơ hlâo adih kiăng kơ 3 truh pơ 4 wŏt, yua ră anai kơnong kiăo tui lăng amăng măi telephôn đôč.

Mơng anun amra pơsit tong, bruă mă yua phần mềm Locus Map amăng wai lăng hăng pơgang glai rưng mơng Keh prăk wai pơgang hăng pơđĭ kyar glai rưng tơring čar Kontum hăng anom bruă wai lăng đang glai tơring čar Kontum lĕ bruă mă lăp djơ̆ amăng thun blan pơđĭ kyar mơnuih mơnam kah hăng hơdôm tơlơi črâo trun mơng Kơnuk kơna ƀudah Anom bruă wai lăng glai rưng Việt Nam. Phần mềm yua klă biă mă, amra djru prong prin brơi kơ ƀing mơnuih wai lăng glai rưng amăng bruă wai pơgang glai rưng, mơng anun hơdôm kual glai kyâo ƀơi Dap kơdư lăi hrŏm hăng tơring čar Kontum hnun mơn amra mơtah mơda na nao.

Siu Đoan: Pơblang