VOV4.Jarai - Mơguah lơ 22/4, Jơnum min mơnuih ƀôn sang tơring čar Thái Nguyên pơphun bơkơtuai gum hrom pơđĭ kyar bruă tuai čuă ngui 6 bôh tơring čar Việt Bắc: Hà Giang, Tuyên Quang, Bắc Kạn, Cao Bằng, Thái Nguyên, Lạng Sơn.

Rơgao rơbêh kơ 10 thun pơlir hơbit bruă tuai čuă ngui kơplah wah 6 bôh tơring čar Việt Bắc hăng pran jua “Gơgrong mă pô – dưm kơnar – ba glăi bôh tơhnal – hơdai bơ hmâo yua” pơhrui glăi laih lu bôh than rơđah; tua tuai čuă ngui dưi pơlir hơbit, mrô tuai čuă ngui đĭ ƀu pơdơi rơgao hơdôm thun hăng rơnoh hơnong ñu rơbêh kơ 16%. Mông bơkơtuai hmâo tŭ mă lu tơlơi gum pơhiăp mơng khua git gai, pô wai lăng, anom bơwih ƀong gah tuai čuă ngui kiăng pơtrut pơđĭ kyar pơlir hơbir tuai čuă ngui kual, pơjing rai anih anom tuai čuă ngui jai hrơi jai klă hiam, djơ̆ hăng tơlơi kiăng mơng tuai nao čuă lăng. Khul wai lăng tuai čuă ngui hơdôm bôh tơring čar Việt Bắc hmâo kĭ pơkôl gum hrom pơđĭ kyar tuai čuă ngui plơi pla. Hơdôm bôh anom bơwih ƀong 6 bôh tơring čar Việt Bắc kĭ pơkôl gum hrom hăng hơdôm bôh anom bơwih ƀong wai lăng tuai čuă ngui Hà Nội, ƀôn prong Hồ Chí Minh./.

Siu H’ Prăk: Pô pơblang