VOV4.Jarai - Mơguah (7/5), hơmâo pơphun mông jao gơnam mơng Jơnum min mơnuih ƀon sang tơring čar ƀôn prong Hồ Chí Minh djru plơi prong jưh jom Phnôm Pênh (Kur) hăng Viêng Chăn (Lao) kiăng kơ djru brơi dua boh ƀôn prong anai amăng bruă pơgang klin Covid-19. Amăng mông pơphun jao gơnam lăng nao rai amăng tivi ƀơi 3 anih lăng nao rai ƀôn prong Hồ Chí Minh, Phnôm Pênh hăng Viêng Chăn hơmâo wŏt ƀing khua Jơnum min mơnuih ƀon sang ƀôn prong Hồ Chí Minh Nguyễn Thanh Phong, Khua plơi prong jưh jom Phnôm Pênh Khuong Sreng hăng Khua plơi prong jưh jom Viêng Chăn Atsaphangthong Siphandone.

Đĭ pơhiăp amăng mông jơnum, khua mua ƀôn prong Hồ Chí Minh, plơi prong jưh jom Phnôm Pênh hăng Viêng Chăn čang rơmang tŏ tui tơlơi rô nao rai kjăp kơplah wah gong gai hăng mơnuih ƀon sang 3 boh ƀôn prong, hăng amra pơtrut kơtang ngă hrŏm, djru nao rai djop mơta, biă mă ñu lĕ amăng bơwih ƀong huă, sĭ mơdrô tơdơi kơ hrơi pơgăn hĭ klin. Ƀrô tal anai, Khua Jơnum min mơnuih ƀon sang ƀôn prong Hồ Chí Minh Nguyễn Thanh Phong hơmâo jao gơnam djru hăng nua 50.000 đôlar Mi brơi gong gai rĭm boh plơi prong jưh jom Phnôm Pênh hăng Viêng Chăn.

Siu Đoan: Pơblang