VOV4.Jarai - Lơ 7/4, gah yŭ tơlơi git gai mơng Khua git gai Ping gah dêh čar ta ơi Nguyễn Phú Trọng, Grŭp mă bruă Ping gah hmâo jơnum laih kiăng pel ĕp, ngă tui bruă pơsir kơđi hăng ơi Tất Thành Cang hăng ơi Lê Văn Phước. Amăng hơdôm hrơi apăn bruă Ding kơna Ping gah dêh čar, Kơ-iăng Khua git gai Ping gah ƀôn prong Hồ Chí Minh, ơi Tất Thành Cang hmâo ngă soh prong laih tơlơi pơkă đing nao anô̆ tơpă, tơlơi pơkă mă bruă hăng hơdôm tơlơi pơkă mơng Ping gah, tơlơi phiăn mơng Kơnuk kơna, ngă răm rai, rơngiă theng lu ngăn drăp kơnuk kơna, hmâo laih Ƀirô tơhan polis pel ĕp kơđi tơlơi Kông ang ƀôn prong Hồ Chí Minh ba tơbiă tơlơi pơsit tơgŭ kơđi hăng mơnuih ngă soh hăng mă pơkŏng yua kơ tơlơi soh “Ngă soh tơlơi pơkă kơ wai lăng, mă yua kông ngăn kơnuk kơna ngă rơngiă đôč, khưi khai”. Ơi Lê Văn Phước, hăng bruă gơgrong ding kơna ping gah tơring čar, Khua git gai Grŭp mă bruă Ping gah, Khua Sang phăt kơđi tơring čar Phú Yên hmâo ngă soh tơlơi pơkă mơng Ping gah kơ hơdôm tơlơi mơnuih ping gah ƀu dưi ngă, ngă soh tơlơi pơkă wai lăng prăk kak, ngă răm rai prong hăng hưp ƀong, gô̆ mă ngăn drăp kơnuk kơna, hmâo sang phăt kơđi gưl dlông ƀơi Đà Nẵng pơsit phak tơhmal 12 thun 6 blan dô̆ amăng sang mơnă yua kơ tơlơi soh “hưp ƀong kông ngăn”. Tơlơi ngă soh mơng ơi Tất Thành Cang hăng ơi Lê Văn Phước lĕ prong biă, ngă hmư̆ hing hyu sat, ƀu mơ-ak amăng mơnuih apăn bruă, mơnuih ping gah hăng mơnuih ƀôn sang, ngă bơbeč truh sat pran đăo gơnang mơng khul Ping gah. Grŭp apăn bruă Ping gah pơsit pơsir kơđi hăng hơdră brơi tơbiă mơng Ping gah hăng ơi Tất Thành Cang hăng ơi Lê Văn Phước./.

Siu H’ Prăk: Pô pơblang