Truh thun 2023, tơring čar Dak Lak hơmâo giăm 32.800 ha đang boh sầu riêng, amăng anun hơmâo 15.852 ha hlăk amăng thun dưi pĕ boh laih, rơnoh pơhrui glăi rơbêh 281 rơbâo tơn, đĭ tui 90 rơbâo tơn pơkă hăng thun 2022, dưm dưm hăng rơnoh đĭ tui giăm 50%. Yap hrŏm amăng dêh čar, Dak Lak hlăk dong tal sa đơ đam pla hăng anŏ hmar pơđĭ kyar, dong tal dua rơnoh pĕ boh sầu riêng ba sĭ mơdrô. Hrŏm hăng hơmâo rơnoh yôm bơwih ƀong huă, boh sầu riêng dŏ ba kơ Dak Lak rơnoh yôm kơ bơngăt jua tơlơi mơak, lơ̆m pơphun tŭ yua Jơnum ngui bruă sầu riêng tal blung a ƀơi tơring glông Krông Pač hăng hlăk prăp lui pơphun jơnum ngui boh sầu riêng tal dua.

Pơ kơ khua mua anom bruă Đang hmua hăng pơđĭ kyar plơi pla tơring čar Dak Lak lăi pơthâo tơlơi pơhing kơ bruă pla boh sầu riêng tơring čar, ơi Nguyễn Hắc Hiển, Kơ-iăng khua anom bruă pla pơjing hăng pơgang phun pla tơring čar Dak Lak brơi thâo, hrŏm hăng anom bruă kơsem min laih anun anom bruă kơnuk kơna git gai wai lăng, pơđĭ kyar bruă pla boh sầu riêng, Dak Lak hơmâo pơphun brơi lu grup hyu ĕp lăng, čuă jơmư hrăm tui tơdruă, ƀơi anŏ nao truh pơ dêh čar tač rơngiao hrăm bruă pla boh sầu riêng kah hăng nao pơ dêh čar Thai Lan, dêh čar pla boh sầu riêng prong hlo rŏng lŏn tơnah.

Tui hăng ơi Nguyễn Hắc Hiển, amăng lu tơlơi thâo thăi dưi ngă tui ƀơi tơring čar, Dak Lak amra lăng yôm hơdôm tơlơi thâo tom găn rơgao amăng bruă wai lăng boh tŭ yua gơnam sĭ mơdrô boh troh anai:

“Ră anai, dêh čar Thai Lan pơđĭ mă hnong pơkă hiam ƀhu krô boh sầu riêng mơ̆ng 32-35%. Truh bơyan pĕ boh djop anih pla boh sầu riêng, djop pô đang hmua khom ĕp lăng anŏ hiam, boh tŭ yua mơ̆ng boh troh gơñu hlâo kơ pĕ ba sĭ mơdrô. Hrŏm hăng anun, djop sang bruă kơnuk kơna wai lăng ăt pơphun mă meh, sơ̆l boh ba pơčrang kiăng thâo boh sầu riêng pĕ giong pơkra pơjing, dưm amăng kơdung arăng ngă rơgoh laih hă aka. Anai yơh bruă ngă yôm biă mă, dưi hơmâo anih anom blơi lĕ dêh čar Khač mơ̆ng tŭ ư”.

Mah boh sầu riêng jing sa amăng hơdôm djuai boh troh pla phun, yôm ba glăi lu prăk kăk, pơhưč lu mơnuih tuh pơ alin, prăk pơplai mơ̆ng mơnuih ngă hmua hăng tơlơi đing nao mơ̆ng gong gai kơnuk kơna djop gưl, samơ̆ anai lĕ anom bruă dŏ ngă lu črăn, kah hăng hơdră mơneč pla, wai lăng, pĕ boh truh kơ bruă pơkra ming răk lui dŏ kơƀah đôč; bruă wai lăng gru mrô kual pla, mrô gru anung ƀudah kơdung hruh dưm boh troh laih pơkra ming jing gơnam sĭ mơdrô dŏ aka ƀu djơ̆ ôh; tơlơi bơrơsua blơi, juă nua, wŏk gai lui tơlơi pơkôl sĭ blơi ăt dŏ hơmâo đôč ƀơi lu anih pla boh sầu riêng amăng tơring čar sit truh bơyan pĕ boh.

Thun 2023, boh sầu riêng tơring čar Dak Lak pơhrui glăi rơnoh sĭ mơdrô truh 16 rơbâo klai prăk, dưm dưm hăng năng ai 660 klăk dolar Mi, samơ̆ Gơnong bruă wai lăng bruă sĭ mơdrô tơring čar Dak Lak kơnong čih pioh prăk sĭ mơdrô hăng dêh čar tač rơngiao lĕ kơnong 100 klăk dolar Mi. Tơlơi anai brơi ƀuh hơdôm tơlơi gêh găl pioh kơ bruă sĭ mơdrô boh sầu riêng mơ̆ng Dak Lak aka ƀu amuñ ôh.

Ƀơi anăp kơ tơlơi ngă gun hĭ mơ̆ng anom bruă hơmâo lu tơlơi čang rơmang anai, ơi Nguyễn Thiên Văn, Kơ-iăng Khua Jơnum min mơnuih ƀôn sang tơring čar Dak Lak brơi thâo, tơring čar amra pơsir hĭ ƀơƀrư̆, mơ̆ng bruă brơi mơnuih ƀôn sang thâo pơmin mă pô hăng hrăm ngă tui truh kơ thâo, kơhnăk amăng bruă pla boh sầu riêng:

“Blung hlâo lĕ pơtô brơi mơnuih ƀôn sang, biă mă ñu amăng kual pla boh sầu riêng lu, kiăng thâo hluh tong ten kơ bruă pơgang phun pla, thâo hluh pơhlôm hơdjă mơnong ƀong huă hăng boh sầu riêng. Dua lĕ akŏ pơjing bruă mă čih gru mrô pơkă kual pla pơjing laih anun krăo lăng dưi akŏ pơjing anih pla hơđong. Hăng anih dưm amăng kơdung hăng ngă hruh gơnam sĭ mơdrô, khom pơtum čih pơkra gru lăi pơthâo, pôr pơthâo hăng lu anih anom sĭ mơdrô, blơi yua, anih sĭ mơ̆ng đang hmua, truh pơ anih pơkra pơjing gơnam sĭ mơdrô, djă pioh laih anun ba hyu sĭ pơ dêh čar tač rơngiao. Hăng tơlơi gir run khut khăt mơ̆ng tơring čar Dak Lak laih anun tơlơi djru hrŏm mơ̆ng Ding jum bruă hmua hăng pơđĭ kyar plơi pla bruă ngă anai amra dưi pơblih tui ƀơƀrư̆ pơ anăp adih.