Truh ră anai, gah dêh čar Khač, dêh čar blơi mut boh sầu riêng lu hloh mơng dêh čar Việt Nam, hơmâo jao giăm 1.400 mrô kual pla pơjing hăng 188 mrô anih dưm truă amăng kơthung brơi hơdôm kual pla boh sầu riêng amăng đơ đam dêh čar. Tui yă Ngô Tường Vy, Khua kông ti pơčruh ngăn grup sĭ mơdrô-blơi mut boh troh Chánh Thu, bruă jao pơhrua lu mrô kual pla pơjing amăng blan 5 anai jing tơlơi gal brơi kơ bruă sĭ mơdrô sầu riêng tơdơi kơ hơdôm blan bưp tơnap tap. Samơ̆, kiăng tŏ tui tơlơi dưi anai, kiăng biă mă tơlơi črâo ba hăng wai lăng kjăp ƀiă dong amăng bruă pruai kmơk, pruih ia jrao brơi phun pla kiăng pơhlôm gơnam boh troh hiam hơdjă. Yă Ngô Tường Vy brơi thâo:

“Tơlơi gơgrong mơng ƀon lan kiăng pơƀuh jê̆ giăm ƀiă dong, sit biă ñu lĕ pel ĕp glăi bruă pla pơjing hiưm pă ñu kiăng pơhlôm gơnam đang hmua hiam hơdjă. Tơlơi anai ƀu djơ̆ kơnong mơnuih ƀôn sang Khač đing nao đôč ôh mơ̆ mơnuih ƀôn sang Việt Nam ƀing ta ăt đing nao tơlơi anai mơn. Kâo pơmĭn anai lĕ kual pla pơjing, laih dong bruă ƀing ta pok pơhai kiăng ngă mơnuih ngă hmua hluh rơđah hơmâo hơdră ngă lăp djơ̆, ƀing ta ăt kiăng kiăo tui lăng hơdôm anih sĭ kmơk, ia jrao pơgang phun pla kiăng pel ĕp, wai lăng kjăp ƀiă dong hơdôm bruă anai”.

Tui ơi Phan Việt Hà, kơ-iăng Khua anom bruă boh thâo ngă hmua, đang glai kual Dap kơdư, bruă aka pơjing hơnong pơkă hiam hơdjă brơi boh sầu riêng glăk ngă mơnuih ngă hmua sư̆ rơbư̆ amăng pla pơjing. Anai lĕ sa amăng hơdôm tơlơi ba truh kơ bruă ngă soh amăng wai pơgang gơnam pla pơjing hăng pơhlôm brơi gơnam ƀong hơdjă. Ơi Phan Việt Hà brơi thâo, truh hrơi kiăng pơjing hơnong pơkă boh thâo pla pơjing brơi boh sầu riêng tui rĭm boh kual hăng pơplih tơlơi juăt amăng pla pơjing brơi mơnuih ngă hmua:

“Sầu riêng ƀơi rĭm boh kual amra pơđĭ kyar phara hăng tơdah tui anun kiăng hơmâo hơnong pơkă tong ten, anun ăt tơnap mơn kiăng ngă tui hơnong pơkă anai. Kâo pơmĭn, pơ anăp anai, hluai tui tơlơi sem lăng ayuh hyiăng lŏn mơnai, tơlơi bơwih ƀong huă-mơnuih mơnam hăng pla pơjing mơng rĭm boh kual, ƀing ta amra hơmâo hơnong pơkă hrŏm hăng amăng anun amra hơmâo črăn kah pơpha tui rĭm boh kual phara, hăng hơnong pơkă prong hloh lĕ hơdôm gơnam tam lêng kơ brơi Việt Nam”.

Tơdơi kơ tơlơi găn rơgao ƀu dưi ba sĭ mơdrô amăng ha akŏ thun 2025 yua him lăng hơmâo jrao Vàng Ô hăng Cadimi, lu tơlơi pơgôp kiăng pơdong anih sem lăng boh sầu riêng ƀơi hơdôm kual phun. Ơi Trần Minh Châu, pô pơ ala kông ti TNHH pơčrang lăng ia jrao Vinacontrol, brơi thâo kông ti hơmâo prap lui kơ bruă anai. Blung hlâo, amra pơdong anih pơčrang lăng kiăng djru brơi bruă sĭ boh sầu riêng pơ tač rơngiao pơ anăp anai mơng kual Dap kơdư.

“Tơdah man pơdong phrâo sa anih pơčrang lăng ăt kiăng rơkâo ngă hră pơ-ar djơ̆ tolwơi phiăn, tơlơi anai ăt kiăng sui ƀiă, samơ̆ tơdah pơdong sa anih pơčrang lăng pơlir hơbit ieo gah, tơdah Khua ding jum khut khăt kah hăng hơdôm tơlơi gum djru mơng ding jum, gơnong bruă, ƀôn lan, ƀing gơmơi čang rơmang dưi pơgiong tañ ƀiă kơ bruă djru brơi bơyan pĕ pơhrui pơ anăp ƀơi Dak Lak”.

Amăng mông jơnum, ƀing khua mua ăt rơkâo pel ĕp, pơplih pơkra, pơhrua, pơgiong hơdôm tơlơi pơkă kơ wai lăng, mă yua mrô kual pla pơjing, anih dưm amăng kơthung, pơhlôm tong ten, rơđah rơđông, anŏ dưi ngă, pơlir hơbit, lăp djơ̆ hăng tơlơi pơkă jar kmar hăng tơlơi gal ngă tui mơng Việt Nam. Laih dong, pơtrut kơtang bruă kơsem min, črâo ba, mă yua boh thâo phrâo, pơphun mrô amăng pla pơjing, pơkra, blơi pơhrui, wai lăng gơnam tam hăng pơƀuh anih pla sầu riêng, sit biă ñu lĕ hơdôm hơdră pơsir hĭ tơdơi kơ pĕ pơhrui, djă pioh anih rơ-ơ̆, pơkra dơlăm ƀiă kiăng hrưn đĭ klă, nua đĭ hăng dưi bơkơtưn kơtang mơng gơnam tam.

Tơdơi kơ hmư̆ tơlơi pơgôp hiăp, Khua ding jum ngă hmua hăng ayuh hyiăng lŏn mơnai Đỗ Đức Duy lăi pơtong: kiăng pơsit tong sầu riêng lĕ gơnam phun dêh čar kiăng tuh pơ alin brơi klă hloh:

“Pơđĭ kyar gơnong bruă sầu riêng ƀu djơ̆ kơnong lĕ tơlơi dưi pơđĭ kyar bơwih ƀong huă đôč ôh mơ̆ ăt lĕ tơlơi gơgrong đăo gơnong mơng gơnam đang hmua dêh čar. Kâo rơkâo djop ƀon lan, anom bơwih ƀong sĭ mơdrô, anom bơwih ƀong hrŏm hăng mơnuih ƀôn sang lêng kơ ƀuăn pơplih tơlơi pơmĭn truh pơ bruă mă sit nik kiăng pơjing gơnong bruă sầu riêng Việt Nam jing hơbô̆ bruă ngă hmua hiam hơdjă, pơƀuh anih pla tong ten, gơgrong hăng hơđong kjăp”. /.