VOV4.Jarai-Mơnuih dêh čar tač rơngiao dŏ găl tơlơi phiăn ƀơi Việt Nam dưi pơgang brơi tơlơi dưi rơngai đăo kơ yang rơbang, kơkuh pơpŭ tui djop tơlơi đăo hơmâo pơkă amăng Tơlơi phiăn ngă yang rơbang hăng tơlơi đăo.

Anai lĕ tơlơi pơsit mơ̆ng Kơ-iăng Khua ding jum bruă čar, Khua anom bruă wai lăng tơlơi đăo mơ̆ng Kơnuk kơna, ơi Vũ Chiến Thắng ƀơi mông jơnum bưp ƀô̆ mơta mơnuih dêh čar tač rơngiao nao jơnum tơlơi đăo ƀơi Việt Nam, dưi hơmâo anom bruă wai lăng tơlơi đăo mơ̆ng Kơnuk kơna pơphun mơguah lơ 27/4, ƀơi Hà Nội.

Nao jơnum hrom, hơmâo ƀing khua pô pơtô djop tơlơi đăo, khua pơ ala djop anih jơnum tơlơi đăo hơmâo lu mơnuih dêh čar tač rơngiao nao jơnum hrom, khua mua wai lăng tơlơi đăo hăng khul đăo, djop ding jum, anom bruă gơnong dlông, khua mua wai lăng tơlơi đăo mơ̆ng tơring čar.

Mông jơnum hơmâo pơdah thâo rup video ră ruai kơ tơlơi ngă yang, tơlơi jơnum đăo ƀơi Việt Nam; hmư̆ lăi pơthâo boh yom phun tơlơi phiăn ngă yang rơbang hăng tơlơi đăo, tơlơi phiăn pơkă mut tơbiă nao rai ƀơi Việt Nam, bruă ngă tui anŏ bơwih bơwang lăng nao rai amăng tivi pioh pơtô đăo, kơkuh pơpŭ ngă yang rơbang mơ̆ng ataih….

Mơ̆ng anun, kiăng mơnuih dêh čar tač rơngiao hlăk dŏ ƀơi Việt Nam thâo hluh tong ten tơlơi phiăn kơnuk kơna pơkă kơ tơlơi ngă yang rơbang hăng tơlơi đăo, tơlơi dưi laih anun bruă khom ngă amăng bruă ngă tui tơlơi rơngai ngă yang rơbang hăng đăo mơ̆ng mơnuih dêh čar tač rơngiao dŏ găl tơlơi phiăn ƀơi Việt Nam.

Nay Jek: Pơblang