VOV4.Jarai - Mơng bruă pơƀut glăi hră pơ-ar sô hơđăp, pơkrem prăk, blơi lič tết kiăng kơ pơgôp prăk amăng hơdôm bruă mă gum pơgôp mơng đơset, lu čơđai sang hră sang anŏ tơnap tap ƀơi Daklak hơmâohmao tlôn pơtrut pran nao sang hră. Rơnoh prăk mơng tal pơphun anai hơmâo lu sang hră ngă tui kiăng kơ djru brơi prăk hrăm hră, djru blơi gơnam yua hrăm hră, sum ao pơđao brơi ƀing čođai sang anŏ ƀun rin.

Tơdơi kơ hơmâo nai wai lăng khul hrăm hră pok pơhai bruă mă amăng mông kơkuh hla kơ akŏ rơwang hrơi tơjuh hăng hơmâo nai git gai sang hră laih dong ƀing čơđai arăng jao bruă amăng sang hră lăi pơthâo brơi ƀing čơđai, amon Nguyễn Quỳnh Nhi, hrăm anih 7A2, sang hră gưl dua Ngô Quyền, tơring kual Ea Drăng, tơring glông Ea H’Leo, tơring čar Daklak gir run hyu pơƀut glăi hơdôm hơdrôm hră sô hơđăp kiăng kơ ba nao pơƀut hrŏm. Amon Nguyễn Quỳnh Nhi brơi thâo, ñu hăng ƀing gơyut gơyâo gir run biă mă amăng hơdôm bruă đơđet yua kơ sang hră pơphun. Ƀu hơmâo prăk pơgôp yua anun ñu juăt duñ pơƀut glăi hơdôm hră pơhing hơđăp, kơthung carton sô ƀu yua dong tah amăng sang anŏ ƀudah pơƀut glăi hơdôm pok hră arăng glŏm lui jum dar sang hră ƀudah ƀơi anih hrăm hră anai lĕ gơnam ñu djru amăng akŏ bruă anet anai.

Rĭm hrơi tơdah ƀuh hră pơ-ar ƀu yua dong tah kâo amra dưm amăng kơthung ƀơi akiăng giăm kơƀang hrăm hră kiăng kơ pơƀut glăi lu tui ƀơƀrư̆ truh hrơi kiăng ba nao nô̆p kâo amra dưm amăng kơdung ni-lông hăng ba nao pơ sang hră. Kâo hok mơ-ak biă mă yua kơ dưi djru brơi ƀing čơđai ƀun rin amăng sang hră, pơgôp prăk djru brơi ƀing gơyut gơyâo tơnap tap. Laih dong sang hră gơmơi ăt mă prăk anun pioh yua amăng hrơi ngui hrŏm.

Čơđai sang hră gưl dua Ngô Quyền Ea Drăng pơphun akŏ bruă anet

Hăng hơdră pok pơhai gêh gal, amăng tal pơphun blung a amăng thun hrăm 2020-2021, sang hră gưl dua Ngô Quyền hơmâo pơƀut glăi giăm 2 tơ̆n pok hră sô hơđăp, nua ñu giăm 3 klăk 500 rơbâo prăk. Hrŏm hăng anun, sang hră hơmâo pok pơhai lu bruă mă anun lĕ: djru brơi sum ao, hơdrôm hră, gơnam yua hrăm hră brơi kơ ƀing čơđai kual ataih, asuek. Amăng 5 thun laih rơgao, sang hră hơmâo jak iâu pơgôp 1.500 blah sum ao; 800 hơdrôm hră; rơbêh 200 boh đôn, kơdung hră, gơnam yua hrăm hră, dưm dưm rơbêh 1,2 tơ̆n djru brơi ƀing hlăk ai čơđai anet sang anŏ tơnap tap ƀơi hơdôm să kual ataih, asuek amăng tơring glông. Amon Phan Trường Nhất, čơđai ngă kơ-iăng git gai khul cơđai hrăm hră gưl dua Ngô Quyền, tơring kual Ea Drăng, tơring glông Ea H’leo, tơring čar Daklak brơi thâo:

Kâo ƀuh gơyut gơyâo gir kơtir ngă tui bă mă, hơdôm pok hră sô arăng  glŏm lui ƀudah hơdôm hră čih giong laih amra pơƀut glăi amra pơgôp kiăng kơ djru brơi ƀing čơđai sang anŏ ƀun rin kah hăng ƀing čơđai gir kơtir găn rơgao tơnap tap amăng hrăm hră.

Ƀu djơ̆ kơnong ƀơi sang hră gưl dua Ngô Quyền đôč ôh, amăng hơdôm thun laih rơgao, akŏ bruă pơgôp mơng đơset hơmâo lu sang hră gưl sa hăng sang hră gưl dua amăng tơring čar Daklak pok pơhai hăng pơhư prong. Hăng lu bruă mă phara anun lĕ: Djru tơdruă, gơyut gơyâo čung ba, kơthung braih djru khăp pap, Mơnŭ akă akhăn mriah, keh prăk djru brơi čơđai ƀun rin, pơkrem prăk … bruă gum pơgôp anai hơmâo lar hyu kiăng kơ djru prăk kak brơi ƀing čơđai sang anŏ tơnap tap, găn rơgao tơnap hrăm hră rơgơi. Amon Nguyễn Thái Thuỳ Linh, čơđai sang hră gưl dua Tân Lợi, plơi prong Buôn Ma Thuột, tơring čar Daklak brơi thâo:

Ƀơi sang hră Tân Lơị ăt pơphun lu bruă kiăng kơ pơgôp djru brơi ƀing čơđai ƀun rin anun lĕ hyu duñ pơƀut glăi hră pơ-ar sô hơđăp, pơgôp sum ao, blơi lič, pơkrem prăk. Truh rơnuč thun hrăm hră sang hră amra mă yua prăk anai kiăng kơ djru brơi ƀing čơđai sang anŏ tơnap tap. Kâo hok mơ-ak biă mă hăng čang rơmang sang hră amra djru brơi ƀing čơđai lu biă dong.

Mơng rơnoh prăk mơng akŏ bruă anet hơmâo djru brơi lu čơđai

Tui hăng ayong T rần Doãn Tới, Khua khul wai lăng čơđai hrăm hră tơring čar Kontum, ƀu djơ̆ kơnong djru brơi ƀing čơđai tơnap tap, bruă anai ăt pơgôp pơtô pơblang kiăng kơ ƀing čơđai thâo pơkrem, gir kơtir mă bruă, wai pơgang ayuh hyiăng hăng thâo gum pơgôp, djru tơdruă, djru brơi ƀing čơđai sang anŏ tơnap tap.

Mơng hơdôm kĭ hră pơ-ar sô hơđăp hăng hơdôm get ia mơmih hơmâo ƀing čođai duñ pơƀut glăi hơmâo pơgôp hơmâo dong prăk kak gum pơgôp tui jơlan hơdră pơphun. Dua dong lĕ hluai tui bruă mă anet anai yua anun ƀing čơđai amra thâo kơđiăng mă pô hăng mơng anun ngă kơ ƀing čơđai hơdip hiam thâo gum djru mơnuih tơnap tap.Lu čơđai dưi tŭ mă hăngtơlơi gum djru mơng bruă pơphun mơng rơnoh djru mơng đơset anai, anun lĕ djru brơ prăk hrăm hră, hơdôm tơlơi gum djru mơng khul wai lăng čơđai amăng sang hră kah hăng mơng rơngiao.

Mơng rơnoh prăk pơgôp mơng bruă anet, lu sang dŏ, anih ngui n gor brơi ƀing čođai, ring bruă brơi čơđai anet hơmâo man pơkra ƀơi tơring čar Daklak. Bruă anai hơmâo ba glăi tŭ yua sit nik, ngă gêh gal, pơtrut pơsur ƀing čođai sang anŏ tơnap tap gir run hrăm hră.

Siu Đoan: Pơblang