Tui Khua pơ ala mơnuih ƀôn sang, ia mơmih lĕ sa amăng hơdôm gơnam mơñum ngă drơi jăn rơmông plên, anai lĕ hơdôm mơnong ƀong mơñum tơnap wai lăng ia sik. Khua pơ ala mơnuih ƀôn sang Nguyễn Kim Thúy, grup Đà Nẵng pơtong glăi:

“Bruă yua ia mơmih hơmâo lu sik lu anŏ ba truh kơ hơdôm tơlơi ruă ƀu lar hyu anun lĕ: ruă hơtai boh, mơañă ƀlĕ ia sik…yua pơmut lu ia sik amăng drơi jăn pơhmu tui tơlơi kiăng. Yua anun, anom bruă ia jrao rŏng lŏn tơnah hăng hơdôm grup pơgang tơlơi suaih pral, rơkâo Kơnuk kơna hơdôm boh dêh čar mă jia lu ƀiă hăng hơdôm ia mơmih hơmâo lu sik, kiăng hơdư̆ ƀiă blơi yua”.

Ƀing khua mua tŭ ư kơ bruă đĭ jia hăng hơdôm gơnam anun lĕ tơpai ƀiêr kiăng kơ plai ƀiă mơnuih mơñum tơpai ƀiêr. Samơ̆, kiăng pơhlôm plai ƀiă mơnuih mơñum tơpai ƀiêr ƀu djơ̆ kơnong bruă đĭ jia đôč ôh mơ̆ ăt kiăng kơtưn phak prăk, hrŏm hăng bruă pơtô pơblang, phak prăk tơdah ngă soh. Ƀing khua mua tŭ ư hăng bruă đĭ jia tui thun blan pơkă hăng tơpai, samơ̆ hăng ƀiêr kiăng pơhlôm djơ̆ thun blan. Khua pơ ala mơnuih ƀôn sang Hoàng Văn Cường, grup ƀôn prong Hồ Chí Minh rơkâo:

“Ƀing ta kiăng sem lăng hơdră đĭ jia hăng ƀiêr. Tui kâo pơmĭn, ƀing ta kiăng đĭ jia, samơ̆ mrô jia đĭ lu hloh lĕ hăng tơpai kơtang, tơdơi anun trun tui ƀiă hăng tơpai pơ yŭ 20 độ hăng aset hloh lĕ ƀiêr. Ngă tui anun kah lăp djơ̆”.

Kơ bruă pơhrua mă jia djop hăng gơnam tam anun lĕ hŏt djŭp, tui ƀing khua mua, kiăng hloh lĕ đĭ jia hŏt djŭp. Yua bruă djŭp hŏt amra ba glăi 28 tơlơi ruă. Him lăng Việt Nam hơmâo rơbêh 84.500 čô mơnuih djai yua djŭp hŏt hăng 18.800 čô mơnuih djai yua hrĭp mă asăp hŏt. Samơ̆, rơkâo pel ĕp tong ten, sit biă ñu lĕ anŏ bơdjơ̆ nao bruă bơwih ƀong sĭ mơdrô hăng anom bơwih ƀong, ngă gêh gal brơi arăng blơi mut hŏt. Khua pơ ala mơnuih ƀôn sang Trịnh Xuân An, grup Đồng Nai rơkâo:

“Bruă kâo pơmĭn nao lĕ bơdjơ̆ nao ană mơnuih hăng hơdôm anom bơwih ƀong sĭ mơdrô pơkra hŏt. Ră anai hơdôm anom bơwih ƀong sĭ mơdrô hơmâo pơgôp amăng ngăn drăp dong tal rơma, năm, samơ̆ tơdah ngă tui anai amra pơhrŏ trun prăk pơhrui hăng gơnam pơkra rai, tơlơi anai amra ƀuh lu gơnam sĭ dŏp, bơdjơ̆ nao kơ bruă wai lăng dong. Anai lĕ bruă kiăng kơsem min tong ten, lăng glăi kơ bruă ngă brơi lăp djơ̆, kiăng ƀing ta dưi hơmâo prăk pơhrui ngăn drăp laih dong anom bơwih ƀong sĭ mơdrô dưi mă bruă, kiăng huăi bơdjơ̆ nao mơnuih ƀôn sang amăng ngă hmua hăng sit biă ñu lĕ huăi ƀuh sĭ dŏp”.

Bơrơjah amăng sang jơnum, Khua pơ ala mơnuih ƀôn sang Trương Trọng Nghĩa, grup ƀôn prong Hồ Chí Minh brơi thâo:

“Yua hơget ƀu pơsit tong lĕ trun thun 2045, 100 thun akŏ pơjing kơnuk kơna Việt Nam amra jing dêh čar ƀu hơmâo mơnuih djŭp hŏt. Hơdôm boh dêh čar pơkŏn, ƀing gơñu glăk anăp nao sa boh dêh čar ƀu hơmâo hŏt. Kâo tŭ ư lĕ kiăng sem lăng thun blan amra ngă, samơ̆ tui kâo pơmĭn kiăng khut khăt amăng bruă anai hăng anăm brơi tơlơi pơmĭn yua hŭi sĭ dŏp mơ̆ ƀing ta amra pơtah tai amăng bruă anai”.

Lăi pơthâo amăng mông jơnum, Kơ-iăng khua dêh čar, Khua ding jum prăk kak ơi Hồ Đức Phớc ngă rơđah kơ bruă rơnoh mă jia brơi djop hăng hŏt djŭp.

“Hŏt djŭp bơdjơ̆ nao sat biă mă hăng ƀing ta kiăng rơngiă 1 klai đôlar Mi brơi kơ bruă pơjrao tơlơi ruă bơdjơ̆ nao hŏt. Hŏt ƀơi dêh čar Việt Nam sĭ nua rơgêh biă mă mơng 6.000 truh pơ 20.000 đôč, giăm 7.000 prăk duh jia brơi sa hruh hŏt, lơm anun ƀơi Singapore arăng mă 200.000 prăk sa hruh hŏt. Yua anun, ta kiăng mă jia hŏt tui anun”.

Khua ding jum lăi rơđah, Ding jum ia jrao Đào Hồng Lan tŭ ư hăng hơnong pơkă, tơlơi pơmĭn hăng tơlơi kiăng lơm ba tơbiă črăn tơlơi phiăn mă jia sĭ gơnam yôm (čih pơkra glăi), sit biă ñu lĕ jơlan gah đĭ jia hăng hơdôm gơnam bơdjơ̆ sat nao tơlơi suaih pral kar hăng hŏt, tơpai ƀiêr hăng pơhrui nao dong ia mơmih lu sik amăng anăn gơnam đĭ jia. Khua ding jum ba tơbiă hơdôm mrô jŭ yap brơi ƀuh tơlơi kiăng lơm đĭ jia hŏt. Yua djŭp hŏt amra ba glăi 28 tơlơi ruă phara. Him lăng, Việt Nam hơmâo rơbêh 100 rơbâo čô mơnuih djai yua djŭp hŏt. /.