Anai lĕ bruă mă tŭ yua hiam, hơdor glăi tal 80 thun hrơi akŏ pơjing khul ling tơhan mơnuih ƀôn sang Việt Nam. Amăng mông mơak kơdok kơdor ik jua čing ing jua hơgor hăng suang arap, mơnuih ƀôn sang Jarai hơbai ƀơi să Ia Me, tơring glông Čư̆ Prong hok mơak biă mă čơkă tŭ, ba yua sang rung plơi phrâo pơdong hiam klă, prong rơhaih 140 met karê, lan sang prong tuh ƀêtông 500 met karê, jing mơkrah ar, djop brơi ngă anih jơnum hơdôm rơtuh čô mơnuih dŏ.

Hrơi anun mơ̆n, Binh Đoàn 15 ăt hơmâo jao 2 boh sang rung gru grua hiam pơkŏn ƀơi să Ia Piơr, tơring glông Čư̆ Prong hăng să Ia Pnôn tơring glông Đưk Kơ, Gia Lai. Rơnoh prăk man pơdong sang rung lơ̆m sa boh mơ̆ng 3,3 klai truh 3,5 klai prăk. Ƀrô djơ̆ tal anai, Khua git gai tơhanBinh đoàn 15 hơmâo ƀơk hră apah bơni hăng prăk djru kơ hơdôm khul, mơnuih mă bruă tŭ yua sit nik, lơ̆m wai lăng hăng man pơdong sang rung giong hiam klă; ƀơk 60 anung gơnam brơi kơ ƀing tha plơi, khua ƀôn, mơnuih arăng đăo kơnang, khua mua djop tơlơi đăo, sang anŏ ƀun rin hăng mơnuih mă bruă apah dŏ tơnap tap ƀơi kual giăm guai dêh čar ƀơi Gia Lai.