Amăng hơdôm hrơi rơ-ŏt rơ-ơ̆ amăng rơnuč thun, Trung tá Lâm Mạnh Tuyển, mơnuih apăn bruă puih kơđông tơhan wai pơgang guai Ia Chía (tơring glông Ia Grai, tơring čar Gia Lai) nao čuă jơmư yă Puih Yơng, giăm 80 thun dŏ hơdip hajăn ñu pô amăng plơi Beng, să ia Chía. Ñu ƀu-ai buai sui thun anai laih, yă Yơng ƀu dưi rơbat nao rai sui thun laih, Trung tá Tuyển hrŏm hăng ƀing ling tơhan nao tơl sang khăm brơi kơ ñu. Lơm tŭ mă jrao mơng tơngan ling tơhan, yă Puih Yơng ol kơdol brơi thâo:

“Kâo pơpŭ bơni biă mă lơm juăt hơmâo ƀing ling tơhan rai djru brơi tơl sang tui anai, ƀing gơñu khăm pơjrao brơi kơ ƀing gơmơi. Kâo pô sang anŏ tơnap tap biă mă, dŏ hơdip hajăn, yua rơkơi hăng ană bă rơngiă laih, lơm dju djuam duam ră ăt ƀu hơmâo prăk nao khăm pơjrao, hrơi anai hơmâo ƀing tơhan rai khăm hăng ƀơk brơi jrao mơñum kâo bơni biă mă mơn”.

Ăt lĕ mơnuih tha rơma hơmâo lu tơlơi ruă kă, ơi Ksor Bơng, 74 thun dŏ amăng plơi Bi, să Ia O brơi thâo, nai ia jrao mơng puih kơđông tơhan wai pơgang guai Ia O, jing anih neh met wa pơmĭn nao blung a lơm duam ruă. Yua hơmâo tơlơi gum djru abih pran jua mơng nai ia jrao gah tơhan wai pơgang guai, neh met wa ră anai plai ƀiă bơngŏt lơm ba nao pơjrao ruă sui hrơi ƀudah huăi hŭi ba nao pơjrao ataih, rơngiă lu prăk kak:

“Djru brơi ană plơi pla lu biă mă, puih kơđông hơmâo pơdong sang ia jrao amăng plơi pla mơtăm, lơm duam ruă neh met wa nao đih pơjrao hlao, ia jrao sang ia jrao djru brơi abih. Neh met wa amra nao hơduah tơña jrao lơm duam ruă, puih kơđong amra djru brơi djop mơtăm. Bơ tơdah ruă kraih khŏm ba nao pơ sang ia jrao pơprong ƀiă”.

Hơdôm thun rơgao, nai ia jrao gah tơhan wai pơgang guai hơmâo ngă tui ha amăng plĕ bruă bơwih brơi tơlơi suaih pral kơ ling tơhan, khăm brơi soh sel kơ mơnuih ƀôn sang kual giăm guai hăng mơnuih ƀôn sang dêh čar Kur. Hrŏm hăng bruă khăm, pơjrao, ƀing ơi ia jrao, nai ia jrao ăt črâo brơi mơnuih ƀôn sang amăng bruă pơgang, pơgăn hơdôm klin kman juăt ƀuh; ngă tui bruă pơhlôm agaih rơnăk, ƀong mơñum tơsă, pit đih akă mông sơker…Mơng anun pơgôp gum hrŏm hăng hơdôm boh sang ia jrao hrưn đĭ tơlơi pơmĭn amăng mơnuih ƀôn sang kơ bruă ia jrao, pơgang klin kman, wai pơgang jum dar hăng dưi tŭ mă tơlơi bơwih bơwang gah ia jrao. Trung tá Trần Anh Tuấn-Nai ia jrao puih kơđông tơhan wai pơgang guai Ia O (tơring glông Ia Grai) brơi thâo:

“Jơlan hơdră nao čuă jơmư, khăm pơjrao mơng nai ia jrao gah ling tơhan pơlir hrŏm jing bruă djru soh sel, rĭm blan, rĭm rơwang lêng kơ nao tơl anih ƀơk brơi jrao hăng khăm pơjrao brơi neh met wa, mơng anun ngă pơlir kơplah wah piuh kơđông tơhan hăng mơnuih ƀôn sang, ba glăi tơlơi đăo gơnang mơng neh met wa hăng ling tơhan wai pơgang guai. Ƀing gơmơi ăt gum hrŏm hăng sang ia jrao să ƀudah kông ti 74, kông ti 75 mơ̆ hơmâo jơlan hơdră khăm, ƀơk jrao soh sel brơi neh met wa, ƀing gơmơi ăt pơlir hrŏm hăng mut hrŏm kiăng khăm brơi neh met wa”.

Mơng thun 2023 truh ră anai, hrŏm hăng bruă khăm pơjrao ƀơi puih kơđông tơhan, nai ia jrao tơhan wai pơgang guai ƀơi Gia Lai hơmâo pơphun lu tal nao tơl plơi pla khăm, ƀơk jrao soh sel brơi giăm 2.000 čô mơnuih hăng ƀơk giăm 600 klăk prăk brơi hơdôm boh sang anŏ tơnap tap kual giăm guai. Ơi Ksor Tuông, kơ-iăng Khua Jơnum min mơnuih ƀôn sang să Ia O, tơring glông Ia Grai brơi thâo, hơdôm bruă mă mơng nai ia jrao gah tơhan pơgang guai pơgôp ngă mơnuih ƀôn sang thâo hluh amăng bruă pơgang jum dar, pơgang klă hloh klin kman.

“Nai ia jrao gah ling tơhan pơgang guai gir run amăng bruă pơtô pơblang brơi neh met wa pơgang jum dar. Nao tơl sang čuă jơmư, khăm brơi ƀing mơnuih tha rơma, ƀing čơđai muai. Mơng hơduah ĕp kơ bruă pơgang tơlơi suaih pral hăng wai lăng jum dar, ƀuh neh met wa ngă tui klă, mrô mơnuih duam đung drah hrŏ trun kơtang, djop tơlơi kman ruă kă hơmâo pơgang ƀu brơi lar hyu amăng plơi pla. Anai lĕ yua hơmâo tơlơi gum djru amăng bruă bơwih brơi tơlơi suaih pral kơ neh met wa mơng ling tơhan amăng plơi pla”.

Hơdôm bruă yôm phăn, sit nik mơng nai ia jrao gah tơhan wai pơgang guai tơring čar Gia Lai hrŏm hăng gưl Ping gah, gong gai, sang ia jrao ƀon lan ngă klă bruă bơwih brơi tơlơi suaih pral kơ mơnuih ƀôn sang. Pơgôp ngă hơkrŭ pran gum pơgôp tơhan-mơnuih ƀôn sang kual giăm guai, wai pơgang kjăp guai lŏn ia./.