Pơhiăp git gai mông mă bruă, ơi Trần Thanh Mẫn, Khua git gai pơ ala mơnuih ƀôn sang dêh čar brơi thâo, thun 2024, mah lŏn ia dŏ lu tơlơi tơnap tap, laih anun rơnoh pơđĭ kyar dưi ngă 7% đôč, abih bang 15 tơhnal pơkă mơ̆ng anom bruă pơ ala mơnuih ƀôn sang dêh čar pơsit dưi ngă djop, tơlơi hơdip mơda mơnuih ƀôn sang dưi pơhlôm. Kơnuk kơna, anom bruă jơnum min djop djuai ania mơnuih mơnam Việt Nam hlăk ngă tui bruă pơsir hĭ sang dŏ tơ̆i rơ̆i; bruă pơhlôm, pơgang rơnuk rơnua dêh čar dưi ngă tui djơ̆; bruă pơtom hiăp ăt dưi kơtưn tui; pơhlôm hăng pơgăn hưp ham ƀong kông ngăn, ngă huač prăk kơnuk kơna; rơngiă tơlơi đăo kơnang mơ̆ng mơnuih ƀôn sang hăng ping gah, kơnuk kơna ăt hlăk pơtrut tui.

Khua git gai pơ ala mơnuih ƀôn sang dêh čar lăi pơtong, dưi hơmâo boh tơhnal anai lĕ yua hơmâo tơlơi gir run prong prin mơ̆ng abih bang mơnuih ƀôn sang, abih bang amăng ping gah, khul ling tơhan, amăng anun hơmâo tơlơi pơgôp prong mơ̆ng ƀing pơ ala mơnuih ƀôn sang dêh čar, čih pơkra tơlơi phiăn, pơsit hơdôm bruă yom, pơprong kơ lŏn ia, tui hơdră pơblih phrâo, tơlơi pơmin mă bruă hăng hơdră čih pơkra tơlơi phiăn.

Pơ ala jơnum min apăn bruă phun pơ ala mơnuih ƀôn sang dêh čar, ơi Trần Thanh Mẫn bơni kơ hơdôm boh tơhnal pơgôp hrŏm mơ̆ng djop jơnum min, anom bruă, ƀirô khua pơ ala mơnuih ƀôn sang dêh čar. Lăi pơtong, amăng thun 2025 hơmâo lu tơhnal pơkă yom kơ lŏn ia, khua git gai pơ ala mơnuih ƀôn sang dêh čar ăt pơtrun hiăp djop sang bruă gah anom bruă pơ ala mơnuih ƀôn sang dêh čar anăm čơđŏp pran jua ôh hăng boh tơhnal dưi ngă laih ăt khom gir run hloh pơsir hĭ tơlơi kơƀah, tơnap tap aka ƀu abih:

“Pơ anăp anai, ƀing ta khom ngă hiư̆m pă pơsir hĭ tơlơi aka lăp amăng mông jơnum lok 9, lok 10 ƀudah amăng mông jơnum ƀu pơkă hlâo blan 2/2025 jing hơdôm tơlơi phun yom, djop hră pơdah thâo, bruă kơsem min pơtong glăi khom hơmâo boh tŭ yua. Dua lĕ, boh tŭ yua lăi pơthâo kơ jơnum min djuai ania, djop jơnum min, anom bruă gah gơnong bruă pơ ala mơnuih ƀôn sang dêh čar mơ-it hră pơar kơ ƀing pơ ala hmao kru, ĕp lăng hlâo. Klâo dơ̆ng lĕ boh tŭ yua mơ̆ng djop sang bruă, anom bruă pơ ala mơnuih ƀôn sang dêh čar. Pă lĕ tơlơi tơpă ƀư̆ pơkra djop pô amăng bruă mă djơ̆ mông, pran jua tơpă, rơguăt amăng sang bruă, khom ngă tui khut khăt. Ngă hiư̆m pă kơnuih hing ang, bruă mă lăp pơpŭ mơ̆ng sang bruă pơ ala mơnuih ƀôn sang amăng pran jua mơnuih mơnam dưi pơđĭ tui, amăng mơnuih ƀôn sang thâo pơyom. Yom hloh ñu, ană plơi pla đăo kơnang, kơnuih ƀing pơ ala dưi pơđĭ tui, ƀing pơ ala khom yua kơ mơnuih ƀôn sang mă bruă. Anai yơh hơdôm tơlơi ƀing ta khom đing nao amăng bruă mă, khom pơsir amăng bruă mă”.

Biă mă ñu ngă tui Hră pơtrun 18 mơ̆ng gơnong dlông kơ bruă dăp glăi anom bruă kơnuk kơna, pioh glăi ƀiă mơnuih mă bruă đôč khom ngă tui khut khăt. Ƀrô djơ̆ tal anai, Khua git gai pơ ala mơnuih ƀôn sang dêh čar ta čang rơmang, abih bang khua mua, mơnuih apăn bruă čar, mơnuih mă bruă apah gum hrŏm sa pran jua, gum pơgôp kiăng găn rơgao hĭ tơlơi tơnap tap. Khua git gai pơ ala mơnuih ƀôn sang rơkâo, djop sang bruă amăng gơnong bruă pơ ala mơnuih ƀôn sang dêh čar, ƀirô sang bruă pơ ala, djop anom bruă gah jơnum min apăn bruă phun pơ ala mơnuih ƀôn sang dêh čar ăt pơblih tơlơi pơmin hơdră mă bruă, pơtrut bruă sem lăng, pơpha gưl mă bruă, pơpha tơlơi dưi kiăng pơsir amăng bruă mă khom rơđah rơđong, bruă hơgĕt, hlơi ngă bruă; laih dơ̆ng pel ĕp bruă mă pơsir hră pơar mơ̆ng mơnuih ƀôn sang laih anun pơblih hơdră mă bruă amăng gơnong bruă pơ ala mơnuih ƀôn sang dêh čar.

Khua git gai pơala pơtă pơtăn, pơ anăp anai, djop anom bruă gah sang bruă khua pơ ala mơnuih ƀôn sang dêh čar prăp lui klă pơƀut bruă mă sa thu, ruah 10 mơta bruă jơnum prong amăng thun 2024; bruă mă đing nao djru mơak čơkă thun phrâo kơ mơnuih apăn bruă, sang anŏ mơnuih ƀôn sang tơnap tap. Biă mă ñu, jơnum min apăn bruă phun pơ ala mơnuih ƀôn sang dêh čar jơnum lok 41, 42 amăng blan 1, blan 2/2025 laih anun jơnum ječ ameč amăng blan 2 thun 2025; prăp lui jơnum ƀing pơ ala lok 9 tal 15; Jơnum bruă krăo lăng hăng jao pri apah bơni anăn Diên Hồng tal klâ, kiăng hơmâo boh tŭ yua, tong ten, mơak klă.

Hlâo kơ anun, tui hăng Khua čih pioh, khua anom bruă pơ ala mơnuih ƀôn sang dêh čar ơi Lê Quang Tùng, bruă pok pơhai pơƀut bruă ngă tui Hră pơtrun 18 mơ̆ng khul apăn bruă ping gah dêh čar tal XII ƀơi sang bruă khua pơ ala mơnuih ƀôn sang dêh čar, tơdơi kơ hơmâo jơlan hơdră brơi ngă tui mơtam, git gai jơnum min apăn bruă phun pơ ala mơnuih ƀôn sang dêh čar akŏ pơjing khul grup prăp lui pơƀut bruă mă. Khua git gai pơ ala mơnuih ƀôn sang dêh čar ngă khua khul, hơdôm čô kơ-iăng ngă kơ-iăng khua git gai, brơi pơčrong sai tong ten dăp glăi, jŭ yap bruă mă hơbôt hloh anom bruă kơnuk kơna, ƀiă mơnuih apăn bruă samơ̆ tŭ yua. Khua git gai pơ ala mơnuih ƀôn sang đĭ pơhiăp git gai lăi pơthâo tong ten pok pơhai ngă tui khut khăt Hră pơtrun 18 kơ akŏ bruă anăn “Hơdră pơsir hơdôm tơlơi dŏ gun kơđông, anih aka ƀu hruaih ngă tui amăng tơlơi phiăn”.