Phrâo rơgao, yă Trương Thị Mai, Ding kơna Ding jum kơđi čar, Khua Grŭp ding kơna git gai Ping gah dêh čar, Khua Grŭp pơphun bruă Ping gah dêh čar hăng grŭp hyu mă bruă hmâo nao čuă, ƀơk gơnam tam tết kơ mơnuih mă bruă ƀơi sang bruă, mơnuih mă bruă ƀơi kual Sang măi Phú Hội, tơring glông Đức Trọng, tơring čar Lâm Đồng. Amăng mông nao čuă, yă Trương Thị Mai hmâo pơsit yôm phăn bruă mă hăng tơlơi gir run yak rơgao tơlơi tơnap mơ̆ng khul grŭp mơnuih apăn bruă, mơnuih mă bruă ƀơi kual sang măi Phú Hội amăng bruă ngă đang hmua, pơkra gơnam mă mơ̆ng đang hmua. Djru ngă brơi rơnoh đĭ kyar gơnong bruă đang hmua mơ̆ng tơring čar lăi ha jăn, đơ đam dêh čar lăi hrŏm hmâo bôh tơhnal dlông hloh amăng 10 thun rơgao. Gơnam añăm pơtăm, hơbơi pơtơi, bôh troh mơ̆ng Lâm Đồng ră anai hmâo sĭ laih kơ lu dêh čar tač rơngiao. Hrŏm hăng anun, yă Trương Thị Mai ăt rơkâo mơn hơdôm kual sang măi, gong gai tơring čar Lâm Đồng lăng ba djru dong, bơwih brơi tơlơi hơdip mơda kơ mơnuih mă bruă ƀơi hơdôm kual sang măi, biă ñu tañ ngă giong hơdôm rơwang bruă sang dô̆ mơnuih mơnam kơ mơnuih mă bruă. Tal anai, yă Trương Thị Mai hmâo ƀơk laih gơnam tết kơ kual sang măi Phú Hội; jao 200 anung gơnam kơ mơnuih mă bruă gah sang măi, mơnuih mă bruă ƀơi kual sang măi, rim anung gơnam hmâo nua 1 klăk 300 rơbâo prăk.

Ƀơi plơi prong Kon Tum, Kơ-iăng Khua dêh čar Trần Hồng Hà hrŏm hăng Grŭp hyu mă bruă dêh čar hmâo nao pơhmư̆ Jơlan hơdră “Tết tum jơngum – Bơyan bơnga gum djru” yua kơ Khul mut phung hăng Jơnum min djop djuai ania mơnuih mơnam dêh čar Việt Nam tơring čar Kon Tum pơphun. Pơhiăp amăng Jơlan hơdră “Tết tum jơngum – Bơyan bơnga gum djru” pioh kơ mơnuih mă bruă hăng sang anô̆ mơnuih ƀôn sang tơnap tap mơ̆ng tơring čar Kon Tum, Kơ-iăng Khua dêh čar ta Trần Hồng Hà mơ-ĭt tơlơi tơña bla mơ̆ng Khua git gai Ping gah dêh čar ta Nguyễn Phú Trọng; ƀing khua mua git gai Ping gah, Kơnuk kơna hăng pran jua jê̆ giăm mơ̆ng rim mơnuih truh ƀing khua mua, neh wa hăng tơlơi hơ-ưč hmưi thun phrâo klă hiam hloh. Hơ-ưč hmưi djop mơnuih, djop sang hmâo sa Tết pơđao, jơnap, sa thun phrâo rơnuk rơnang hăng pơđĭ kyar. Kơ-iăng Khua dêh čar ta bơni tơring čar Kon Tum hmâo bơwih brơi kơ mơnuih mă bruă hăng sang anô̆ mơnuih ƀôn sang hmâo tơlơi hơdip tơnap tap tal Bơyan bơnga truh Tết rai, hrŏm hăng anun rơkâo tơring čar pioh dong tơlơi lăng ba pioh hơdôm mơnuih hmâo tơlơi hơdip tơnap hrưn đĭ tơtlaih mơ̆ng ƀun rin kơjăp sui thun:

 “Hơdôm gưl Ping gah, gong gai tơring čar Kon Tum lăng ba dong, hmâo hơdôm hơdră bruă gum djru sang anô̆ ƀun rin, sang anô̆ ƀun rin ƀơƀiă hăng pơhlôm tơtlaih mơ̆ng ƀun rin kơjăp sui thun. Kơtưn bôh thâo, hơdră thâo ngă đang hmua, pơjing bruă, jơlan bơwih ƀong kơ mơnuih ƀun rin, ƀun rin ƀơƀiă hrưn đĭ amăng tơlơi hơdip mơda. Lăng ba lŏn kom pioh pơđĭ kyar sang dô̆ mơnuih mơnam, bơkơjăp drơi jăn, hơdôm hơdră pơkă kơ mơnuih mă bruă ƀơi hơdôm kual sang măi. Hơkrŭ đĭ pơphun, pơđĭ tui bôh tơhnal bruă mă mơ̆ng Khul mut phung”.

Tơlơi pơhing kơ bruă bơwih ƀong – mơnuih mơnam lŏn ia, Kơ-iăng Khua dêh čar Trần Hồng Hà pơtŏng sit lŏn ia hmâo yak rơgao laih thun 2023 bă kơ tơlơi tơnap hăng rơnoh đĭ kyar rơbêh kơ 5,05%, gah ƀut đĭ kyar amăng kual hăng rŏng lŏn tơnap. Ngă tui phiăn juăt gum djru tơdruă mơ̆ng djuai ania hăng pran jua klă hiam mơ̆ng rơnuk ta, Ping gah hăng Kơnuk kơna lăng ba na nao tơlơi hơdip mơda mơnuih ƀôn sang, bruă hrŏ trun ƀun rin, lăng anai lĕ tơlơi rơkâo ječ, jing bruă jao phun, bruă khom ngă mơ̆ng pơđĭ kyar tañ, kơjăp phik lŏn ia. Tal anai Kơ-iăng Khua dêh čar ta Trần Hồng Hà hrŏm hăng khua tơring čar Kon Tum hmâo ƀơk laih gơnam Tết kơ 200 čô mơnuih mă bruă hăng 50 bôh sang anô̆ mơnuih ƀôn sang tơnap tap hăng rim anung gơnam hmâo nua 1 klăk 300 rơbâo prăk.

Hlâo kơ anun, Kơ-iăng Khua mir sir dêh čar ta Võ Thị Ánh Xuân hrŏm hăng grŭp khua hyu mă bruă mơ̆ng Dêh čar ta hmâo nao čuă, ƀơk gơnam tam kơ sang anô̆ gah hơdră bruă, mơnuih mă bruă kơ sang bruă hmâo tơlơi hơdip tơnap tap ƀơi tơring glông Vũ Thư, tơring čar Thái Bình. Nao čuă, pơsur, ƀơk gơnam tam mơnuih mă bruă hmâo tơlơi hơdip tơnap ƀơi Sang bruă jar kơmar Bảo Hưng, Kơ-iăng Khua mir sir dêh čar ta Võ Thị Ánh Xuân lăi pơthâo, thun 2023 găh yŭ tơlơi git gai mơ̆ng Ping gah, tơlơi gir run mơ̆ng abih bang anom bruă kơđi čar gum hrŏm tơlơi gum hơgôp mơ̆ng hơdôm gưl mơnuih ƀôn sang, anom bơwih ƀong lŏn ia hmâo laih hơdôm bôh tơhnal yôm phăn amăng abih bang hơdôm mơta bruă.

Lăi rơđah, Ping gah, Kơnuk kơna lăng ba, bơwih brơi, pơđĭ tui tơlơi hơdip mơda, pran jua kơ mơnuih ƀôn sang, amăng anun hmâo mơnuih mă bruă kơ sang bruă. Kơ-iăng Khua mir sir dêh čar ta pơsit yôm tơring čar Thái Bình thun rơgao hmâo laih hơdôm bôh tơhnal ƀuh rơđah amăng pơđĭ kyar bơwih ƀong – mơnuih mơnam; lăi rơđah amăng bôh than hrŏm anun hmâo tơlơi gum hơgôp klă mơ̆ng mơnuih mă bruă amăng hơdôm bôh anom bơwih ƀong ƀơi tơring čar lăi hrŏm hăng mơ̆ng Sang bruă Jar kơmar Bảo Hưng lăi ha jăn. Kơ-iăng Khua mir sir dêh čar ta rơkâo tơring čar Thái Bình đing nao bơwih brơi tết kơ mơnuih ƀôn sang, biă ñu pel ĕp hơdôm bôh ang anô̆ ƀun rin, mơnuih mă bruă hmâo tơlơi hơdip tơnap pioh gơgrong hlâo djru gum, ƀu lui lơi hlơi gah tlôn./.