Hơdôm hrơi rơgao, hơdră anăn “Bơyan bơnga guai dêh čar pơđao pran jua ană plơi” dưi pơphun, yua tơhan pơgang guai dêh čar ƀơi Gia Lai, pơphun tui ƀrơ ƀrư̆ amăng djop să treng guai dêh čar tơring glông Ia Grai, Đưk Kơ, Čư̆ Prong gah tơring čar Gia Lai. Ƀơi rim hơdră pơphun, ƀing tơhan pơgang guai dêh čar hrŏm hăng mơnuih ƀôn sang amăng djop plơi pla ngă hrŏm ngui ngor mơak, anung ƀañ tek, ƀañ điơ̆, asơi ñar, atông čing suang arap, adoh bơni kơ bơyan phang bơnga čuh kiăng lir hơbit tơlơi khăp plah wah ling tơhan hăng ană plơi pla. Hrŏm hăng anun, hơmâo lu mơnuih pơdrong, ƀing čơmah pơphun djru, ƀơk soh sel gơnam sĭ mơdrô mơnong ƀong huă, brơi hơdôm rơtuh anung gơnam kah hăng abăn khăn, musker, braih hăng hơdrôm hră, gơnam yua hrăm hră brơi kơ čơđai sang hră. Đại tá Nguyễn Văn Nghị-Kơ-iăng khua kơđi čar anom bruă ping gah puih kơđông tơhan pơgang guai dêh čar tơring čar Gia Lai lăi:

“Ană plơi pla mơak biă mă, đăo kơnang kơ ƀing ling tơhan lăi hrŏm hăng tơhan pơgang guai dêh čar hnun mơ̆n, laih dơ̆ng kiăng hruă kjăp hloh tơlơi gum pơgôp ling tơhan hăng mơnuih ƀôn sang, amăng bruă kah pơpha nao rai tơlơi mơak hăng mông tơnap tap; Anai lĕ bruă mă pơtrut pran jua kiăng ană plơi pla dŏ glăi amăng plơi, ngă tui djơ̆ jơlan hơdră ping gah, tơlơi phiăn kơnuk kơna akŏ pơdong tơlơi hơdip mơda rơguăt amăng ƀôn ƀut, plơi pla ala ƀôn”.

Amăng hơdôm hrơi akŏ thun phrâo 2024, hơdôm bruă mă yôm tŭ yua, pơphun dik dăk yua djop puih kơđông ling tơhan pơphun, djru kơ mơnuih ƀôn sang mơak hrŏm. Yă Nguyễn Thị Lành, Kơ-iăng Khua git gai ping gah tơring glông Ia Grai, tơring čar Gia Lai brơi thâo:

“Ta dưi lăi pơpă hơmâo ao ia iom mơtah ling tơhan pơgang guai dêh čar dŏ, pơ anun hơmâo tơlơi mơtah mơda tơlơi hiam mơak ba tơlơi hơdip mơda trơi pơđao, yâo mơak brơi kơ mơnuih ƀôn sang. Ling tơhan pơgang guai dêh čar pơtô brơi mơnuih ƀôn sang pơđĭ kyar bơwih ƀong huă, pla phun boh troh, rông hlô mơnong, akŏ pơdong tơlơi hơdip mơda rơguăt hiam amăng plơi pla; biă mă ñu pơtô brơi ană plơi pla thâo yua prăk kăk pơkrem djơ̆ hơdră, kiăng djru pơblih tơlơi pơmin, bruă mă hrưn đĭ pơklaih mơ̆ng ƀun rin hơđong kjăp”.

Ƀơi să kual giăm guai dêh čar Krông Na, tơring glông Ƀuôn Đôn, tơring čar Dak Lak, ling tơhan pơgang guai dêh čar tơring čar Dak Lak ngă hrŏm hăng djop anom bruă ƀơi plơi pla pơphun hơdră anăn “Bơyan bơnga pơđao pran jua ană plơi Tết Giáp Thìn 2024”. Mơ̆ng mơguah sing bring mơtam, hơdôm rơtuh čô mơnuih ƀôn sang să Krông Na hăng kual ieo gah nao pơtum pơ sang ia jrao să Krông Na, sang să pioh gum hrŏm pơphun hrơi mơak čơkă thun phrâo. Mơnuih ƀôn sang dưi ngă hrŏm lu bruă mă mơak, tŭ yua kah hăng nao pơ anih pioh brơi ƀing ơi ia jrao pơkă lăng drơi jăn, tơlơi duăm ruă, tŭ mă arăng ƀơk ia jrao pơjrao duăm ruă huăi apah prăk ôh; ƀing ơi ia jrao tơña bla, pơpŭ thun phang phrâo, ƀơk ƀañ tek, gơnam têt, prăk hrăm hră kơ čơđai sang hră yua ling tơhan pơgang guai dêh čar hăng ƀing mơnuih čơmah djru....

Hrŏm hăng anun, mơnuih ƀôn sang hmư̆ tơlơi pơtô lăi, pôr brơi tơlơi pơhing ngă hrŏm hăng tơhan pơgang guai dêh čar hyu tir, pơgang jơlan guai dêh čar, tơmeh gong pơkă guai dêh čar hăng pơgang rơnuk rơnua treng jơlan guai dêh čar ta. Ayong Y Quyết Êban, djuai ania Bnông, mơnuih ƀôn sang ƀơi Ƀuôn Trí A, să Krông Na, tơring glông Ƀuôn Đôn brơi thâo, hơdôm anung gơnam arăng djru hăng pơphun bruă mă čơkă thun phrâo yua ling tơhan pơgang guai dêh čar pô pơphun, sa črăn ngă pơđao pran jua, mơak hrơi čơkă thun phrâo ƀong têt amăng plơi pla:

“Rai ngui hrŏm amăng hrơi mơak “Bơyan bơnga guai dêh čar pơđao pran jua ană plơi” gơmơi mơak biă mă. Hrŏm hăng khul khua mua pơphun hơdră ngui ngor tui tơlơi phiăn juăt đưm plơi pla, dŏ hơmâo hơdră pơkă lăng tơlơi duăm ruă hăng ƀơk ia jrao kơ ană plơi pla huăi apah prăk, tŭ mă gơnam ƀong têt kah hăng ƀañ tek, gơnam ƀong pơkŏn bơyan têt....Mơ̆ng hrơi mơak anai, mơnuih ƀôn sang dưi jĕ giăm, hrăm tui, lir hơbit tong ten plah wah tơhan hăng ană plơi, hơmâo tơlơi mơak hrŏm abih bang sit bơyan bơnga truh”.

Hơdră “Bơyan bơnga guai dêh čar-Pơđao pran jua ană plơi” lĕ bruă mă na nao rĭm thun mơ̆ng Anom bruă khua tơhan pơgang guai dêh čar tơring čar, kiăng djru ană plơi pla dŏ treng jơlan guai dêh čar hơmâo hrơi čơkă thun phrâo, ƀong têt mơak mơai; laih dơ̆ng kiăng ngă kjăp tui tơlơi khăp plah wah ling tơhan hăng mơnuih ƀôn sang dŏ ƀơi guai dêh čar, pơgang lŏn ia; juh alum pơtrut pơsur pran jua ling tơhan hăng ană plơi pla dŏ ƀơi kual ataih, amăng glai klô thâo gum pơgôp nao rai, gum pran jua djru ngă klă bruă pơgang guai dêh čar plơi pla rơnuk rơnua na nao.

Hơdră “Bơyan bơnga guai dêh čar pơđao pran jua ană plơi pla ƀrô čơkă thun phrâo Giáp Thìn 2024” dưi hơmâo Anom bruă tơhan pơgang guai dêh čar tơring čar Dak Lak pok pơhai ngă tui mơ̆ng lơ 13/1 truh lơ 4/2, ƀơi hơdôm să Krông Na, tơring glông Ƀuôn Đôn; să Ea Ƀŭng, Ia Rơvê hăng Ia Lôp tơring glông Ea Sup. Ƀrô tal anai, amra hơmâo hơdôm rơbâo anung gơnam hăng rơnoh prăk 752 klăk jao kơ hơdôm sang anŏ mơnuih ƀôn sang dŏ ƀơi guai dêh čar tơring čar Dak Lak. Đại tá Đỗ Quang Thấm-khua apăn bruă kơđi čar sang bruă ping gah tơhan pơgang guai dêh čar tơring čar Dak Lak brơi thâo:

“Thun 2024 lĕ ƀing gơmơi pơphun hơdră “Bơyan bơnga guai dêh čar pơđao pran jua ană plơi pla” ƀơi djop să ter guai dêh čar či Dak Lak. Jơlan hơdră gơmơi kiăng ngă lĕ, thun anai pơphun tañ hloh, kiăng djop pô dŏ ƀơi guai dêh čar plai ƀiă kơƀah, tơnap tap mơnong ƀong huă amăng bơyan têt. Mơ̆ng anun, kah pơpha djru nao rai hăng mơnuih ƀôn sang dŏ treng jơlan guai dêh čar, hrŏm hăng tơhan pơgang guai dêh čar dưi kjăp, pơgang pioh tơlơi dưi ngă pô, rơnuk rơnua ƀơi guai dêh čar ta khăp ƀu-eng”.