Amăng hơdôm hrơi rơnuč thun Giáp Thìn, Y Dũng, djuai ania M’nông, buh sum ao phrâo añra mơ̆ng ƀing apăn bruă mơ̆ng Puih kơđông tơhan pơgang guai blah amăng jang Thuận An pơgiăng glăi pơ plơi  Sa Par (să Thuận An, tơring glông Dak Mil, Dak Nông) či gum ngui hrŏm jơlan hơdră Bơyan bơnga tơhan pơgang guai pơđao pran jua ană plơi pla. Y Dũng thun anai glăk hrăm anih 6, jing ană rông mơ̆ng puih kơđông tơhan pơgang guai rơbêh 3 thun anai laih, hơmâo ƀing khua, ling tơhan čem rông hrăm hră pơ puih kơđông hlao mơtăm. Mơ̆ng sa čô čơđai hrăm ƀu thâo đơi ôh, ƀu khin pơhiăp, mơ̆ng tơlơi wai lăng, pơtô ba mơ̆ng ƀing ama buh ao mơtah, Y Dũng jing hrăm rơgơi hloh. Amăng hrơi mông mơ-ak čơkă thun phrâo ƀong Tê̆t hrŏm hăng tơhan pơgang guai, Y Dũng ăt hok kơdok mơn hrŏm hăng ƀing gŏp ñu ngui pơtun gai trul, dưi hrĕ, kơdăt kơsăk:“Kâo hơmâo ƀing anong met ngă tơhan pơgang guai lăng ba, pơtô ba klă biă, anun jing kâo thâo lu tơlơi hloh, kâo amra gir hrăm rơgơi đah mơ̆ng huăi ngă rơngiă pran ƀing met ngă tơhan. Thun phrâo kâo bơni hơ-ơč kơ ƀing met ngă tơhan pơgang guai hiam drơi jăn, mă bruă truh kih”.

Hrŏm hăng ling tơhan pơgang guai bah amăng jang Thuận An pơphun jơlan hơdră bơyan bơnga pơđao pran jua ană plơi, amai H’Loen, Khua hlăk ai plơi Bu Dak, să Thuận An brơi thâo, rup tơhan pơgang guai hiam biă hăng neh met wa pơ guai dêh čar. Hơdôm thun laih rơgao, tơhan buh ao mơtah lêng kơ gum hrŏm hăng neh met wa. Ƀing tơhan djru ba mơnuih ƀôn sang mă bruă, bơwih ƀong, pơkra sang dŏ brơi mơnuih ƀun rin, pơkra ming jơlan nao rai, bơnư̆ kŏng ia kiăng neh met wa hơmâo jơlan nao rai, tơjŭ pla hơmâo ia djŏp. Pơpă hơmâo tơlơi tơnap lĕ pơ anun hơmâo ƀing adơi ayong ngă tơhan. Sit hnun mơn, neh met wa čơkă Tê̆t hrŏm hăng ƀing tơhan buh ao mơtah jai hrơi pơđao pran jua.

“Neh met wa amăng plơi mơ-ak biă lơ̆m hơmâo čơkă Tê̆t hrŏm hăng tơhan pơgang guai. Ƀing ayong djru ba neh met wa pơ anai lu biă amăng tơlơi hơdip mơda wơ̆t hăng amăng bruă pơkra gơnam. Neh meh wa lĕ gum hrŏm hăng ling tơhan pơgang ba guai dêh čar. Thun phrâo kâo bơni hơ-ơč kơ tơhan pơgang guai hiam drơi jăn, mă bruă truh kih hăng gum pơgôp na nao hăng mơnuih ƀôn sang pơ guai dêh čar”.

Gum anung ƀañ čưng hăng tơhan pơgang guai laih anun neh met wa pơ plơi čơkă tê̆t, amai H Loren, nai pơtô čơđai sang hră muai Hoà Bình, plơi Sa Par, să Thuận An brơi thâo, lu thun rơgao, bruă čơkă tê̆t mơ-ak mơ-ai, khăp pap tui anai lêng kơ hơmâo prăp lui klă:“Ƀing nai gơmơi gum hrŏm hăng tơhan pơgang guai amăng lu bruă hăng ngă amăng lu thun laih. Ta dưi lăi, tơhan pơgang guai jing anih mơnuih ƀôn sang kơnang, gơmơi mơ-ak biă. Thun phrâo kâo ăt bơni hơ-ơč kơ ling tơhan hiam drơi jăn, ngă truh kih djŏp bruă hơmâo jao”.

Thượng tá Nguyễn Văn Thắng, Mơnuih apăn bruă kơđi čar Puih kơđông tơhan pơgang guai bah amăng jang Thuận An brơi thâo, anom bruă hơmâo jao bruă pơgang guai glông năng ai 10km laih anun să Thuận An (tơring glông Dak Mil). Khua mua, ling tơhan amăng puih kơđông lêng pơsit puih kơđông jing sang, guai dêh čar jing plơi pla, mơnuih ƀôn sang djŏp djuai ania jing adơi ayong pô. Hơdôm thun laih rơgao, puih kơđông tơhan lêng ngă klă tơlơi pơtrun “3 dŏ kơtă - dŏ kơtă pơ puih kơđông, dŏ kơtă pơ plơi pla, dŏ kơtă huă kơtit hrŏm mơnuih ƀôn sang” hăng “4 hrŏm - ƀong hrŏm - dŏ hrŏm, mă bruă hrŏm - hiăp tơlơi pơhiăp neh met wa”. Rim hrơi, hơdôm grup mă bruă dŏ kơtă pơ plơi pla, kơnang kơ ƀing tha plơi, khua plơi či pơtô pơblang, iâu pơthưr, djru mơnuih ƀôn sang hmư̆ tơhnai, thâo krăn djŏp tơlơi truh ƀơi guai, gŏng guai đah mơ̆ng thâo rơđah jơlan guai yua plơi pla, anom bruă wai lăng, lăi pơthâo tañ hơdôm tơlơi ngă soh tơlơi dưi wai lăng lŏn tơnah dêh čar. Biă ñu, bruă mơnuih ƀôn sang wai lăng jơlan guai, gŏng guai hơmâo ngă klă biă, ră anai ƀơi anih puih kơđông wai lăng hơmâo 6 grup wai lăng jơlan guai, gŏng guai. Mơ̆ng anun, amăng ƀrư̆ akŏ pơdong puih kơđông hơmâo mơnuih ƀôn sang gum pơgang, pơgang kjăp jơlan guai dêh čar.   

Thượng tá Nguyễn Văn Thắng ăt brơi thâo, kiăng djru ba hơdôm boh sang anŏ tơnap tap hăng neh met wa pơ hơdôm boh plơi ngui ngor mơ-ak brơi tê̆t, puih kơđông tơhan pơgang guai bah amăng jang Thuận An ngă hrŏm hăng Khul ia jrao kyâo bơrơkal mraih tơring glông Dak Mil hăng Jơnum min mơnuih ƀôn sang să Thuận An pơphun jơlan hơdră Bơyan bơnga pơđao pran jua ană plơi. Ƀơi mông ngui ngor anai, amra ƀơk brơi neh met wa lu gơnam yôm:“Anom bruă ngă hrŏm hăng Khul ia jrao kyâo bơrơkal mriah tơring glông Dak Mil hăng Jơnum min mơnuih ƀôn sang să Thuận An pơphun jơlan hơdră Bơyan bơnga tơhan pơgang guai pơđao pran jua ană plơi. Jơlan hơdră hơmâo brơi 200 anung gơnam, 25 pok hră pơhlôm nua ia jrao, 46 anung prăk hrăm hră, abih tih ñu rơbêh 200 klăk prăk. Hrŏm hăng pơphun ngui Bơyan bơnga tơhan pơgang guai pơđao pran jua ană plơi lĕ puih kơđông pơkiăo nao 2 grup ƀong tê̆t hrŏm hăng neh met wa, ngă klă bruă kơđi čar, tơlơi pơmin, gir bong kjăp tơlơi dưi lŏn ia, rơnuk rơnua ƀơi guai hơmâo anom bruă gơgrong wai lăng”.

Hrŏm hăng mơnuih ƀôn sang amăng dêh čar, ƀing khua, ling tơhan hăng mơnuih ƀôn sang ƀơi guai dêh čar să Thuận An, tơring glông Dak Mil, tơring čar Dak Nông glăk čơkă bơyan bơnga phrâo hiam ƀhêm tơlơi gum pơgôp, bă blai tơlơi khăp pap. Tơhan mơnuih ƀôn sang gum hrŏm ha pran jing pran kơtang kiăng guai dêh čar ƀơi Thuận An lăi hơjăn, tơring čar Dak Nông lăi hrŏm kjăp hloh hăng jai hrơi đĭ kyar hloh./.