Kơ-iăng Khua git gai wai lăng pơ ala mơnuih ƀôn sang dêh čar ta Nguyễn Khắc Định brơi thâo, hơdôm tơlơi phiăn dưi hmâo Khua pơ ala mơnuih ƀôn sang pel ĕp hmao tlôn pơkă laih hơdră pơtrun mơ̆ng Ping gah kơ čih pơkra, ngă giong tơlơi pơkă, pơtlaih hmao tlôn hơdôm tơlơi tơnap, ngă gal brơi hloh kơ mơnuih ƀôn sang, anom bơwih ƀong. Jơnum min apăn bruă Khua pơ ala mơnuih ƀôn sang rơkâo Gong gai dêh čar, hơdôm bôh ƀirô gah Gong gai dêh čar hmao tlôn mă yua kơčăo bruă pok pơhai ngă tui tơlơi phiăn, tơlơi pơtrun pơsit. Biă ñu tañ čih pơkra, mă yua tơlơi pơkă kơ 104 bôh yôm Tơlơi phiăn jao kơ Gong gai dêh čar, hơdôm Ding jum pơkă rơđah, pơtô brơi ngă tui Tơlơi phiăn lŏn drŏn (pơplih pơkra):

 “Tô̆ tui mă yua hăng pok pơhai kơčăo bruă rơđah pioh tañ ba hơdôm hơdră bruă pơkă amăng hơdôm tơlơi phiăn, tơlơi pơtrun pơsit mơ̆ng Khua pơ ala mơnuih ƀôn sang mut amăng tơlơi hơdip mơda. Biă ñu lĕ hơdôm hơdră bruă pơkă phrâo, pha ra, hơdôm hơdră bruă pơkă hmâo mă yua tañ hloh bơhmu hăng bôh tŭ yua hrŏm mơ̆ng Tơlơi phiăn. Tañ čih pơkra hăng mă yua tui tơlơi dưi yua hơdôm hră pơ-ar pơkă rơđah, pơtô ngă tui hăng giăm truh 400 bôh yôm dưi jao amăng hơdôm tơlơi phiăn hăng tơlơi pơtrun pơsit. Pơhlôm tơhnal klă, ha sa, ha amăng plĕ hăng hơdôm mơta hră pơ-ar tơlơi phiăn hmâo bơdjơ̆ nao, ƀu pioh bơrơkua, phrâo hmâo tơlơi gun anih dô̆ đôm amăng pơphun ngă tui”.

Kơ-iăng Khua dêh čar ta Trần Lưu Quang brơi thâo, tơdơi kơ pơđut hơdôm tal jơnum mơ̆ng Khua pơ ala mơnuih ƀôn sang, hơdôm ding jum, ƀirô dưm kơnar ding jum git gai čih pơkra hơdôm tơlơi phiăn, tơlơi pơtrun pơsit hmâo gum hrŏm lăi pơdah hăng Khua dêh čar mă yua ƀudah mă yua tui tơlơi dưi hơdôm Kơčăo bruă pioh pok pơhai ngă tui hơdôm tơlơi phiăn, tơlơi pơtrun pơsit dưi hmâo Khua pơ ala mơnuih ƀôn sang pel ĕp:

 “Kiăng pơkă rơđah hơdôm tơlơi phiăn tơlơi pơtrun pơsit dưi pel ĕp ƀơi tal jơnum lok 6 hăng tal jơnum ƀu hmâo pơkă hlâo tal 5, Gong gai dêh čar, Khua dêh čar, ƀing Khua Ding jum, Khua ƀirô dưm kơnar hăng Ding jum hmâo bruă jao mă yua 56 mơta hră pơ-ar, 29 Tơlơi pơtrun pơsit, 5 Tơlơi pơsit hăng 22 Tơlơi pơtrun pioh pơkă rơđah 10 tơlơi phiăn hăng tơlơi pơtrun pơsit. Ră anai hơdôm ding jum dưi jao git gai čih pơkra glăk pơphun pok pơhai ngă tui djơ̆ tơlơi pơkă mơ̆ng Tơlơi phiăn mă yua hră pơ-ar pơkă tơlơi phiăn hăng pran pơsit prong pioh pơhlôm rơnoh hăng anô̆ klă mơ̆ng hră pơ-ar”.

Kơ-iăng Khua Ding jum kông ngăn glai klô hăng rơhuông adai lŏn mơnai Lê Minh Ngân brơi thâo: Tơlơi phiăn lŏn drŏn (pơplih pơkra) hmâo lu bôh yôm phrâo hmâo tơhnal pơplih yôm phăn djru amăng tơhnal pơkă ngă giong tơlơi pơkă, hơdră bruă, pơđĭ tui bôh tŭ yua, bôh tơhnal wai lăng hăng mă yua lŏn. Tơdơi kơ Tơlơi phiăn dưi mă yua Ding jum hmâo đing nao ngă giong hơdôm hră pơ-ar pơkă rơđah, pơtô brơi ngă tui tơlơi dưi:

 “Hăng Tơlơi phiăn lŏn drŏn, Ding jum kông ngăn glai klô hăng rơhuông adai lŏn mơnai dưi pơpha git gai čih pơkra 10 mơta hră pơ-ar, hmâo 6 Tơlơi pơtrun pơsit hăng 4 Tơlơi pơtrun. Ră anai hơdôm ƀirô glăk čih pơkra tañ tui djơ̆ glông jơlan, tơlơi pơkă mơ̆ng Tơlơi phiăn mă yua hră pơ-ar pơkă tơlơi phiăn, kiăng mă yua tui tơlơi dưi ƀudah lăi pơthâo gưl hmâo tơlơi dưi mă yua amăng blan 5/2024. Kơnong hăng Tơlơi pơtrun pơsit kơ bruă rô̆ nao gah ia rơsĭ amra dưi lăi pơthâo amăng blan 3/2024 tui akô̆ tlôn ngă rơguăt pioh mă yua ngă tui mơ̆ng lơ 1 blan 4 tui djơ̆ bôh yua hmâo pơkă amăng Tơlơi phiăn”.

Kiăng pơđĭ tui bôh tơhnal bruă pok pơhai, ngă tui hơdôm Tơlơi phiăn, Tơlơi pơtrun pơsit, Khua Jơnum min bơwih ƀong Vũ Hồng Thanh rơkâo Gong gai dêh čar pơtô črâo ba bruă mă yua hơdôm hră pơ-ar pơkă rơđah ngă tui tơlơi phiăn amăng thun 2024, pơhlôm rơnoh, anô̆ klă, ha amăng plĕ hăng hơdôm tơlơi phiăn hmâo bơdjơ̆ nao phrâo, dưi hmâo Khua pơ ala mơnuih ƀôn sang pel ĕp kah hăng Tơlơi phiăn lŏn drŏn, Tơlơi phiăn bơwih ƀong sĭ mơdrô lŏn drŏn, Tơlơi phiăn hơdôm khul brơi čan prăk:

 “Hăng Tơlơi phiăn lŏn drŏn, Tơlơi phiăn bơwih ƀong sĭ mơdrô lŏn sang, Gong gai dêh čar pơtô črâo brơi bruă mă yua hơdôm hră pơ-ar tơlơi pơkă rơđah ngă tui tơlơi phiăn amăng thun 2024; tañ jao bruă pơkĕ hrŏm hăng rơnoh rơđah ngă giong pơhlôm hơdôm hră pơ-ar anai; hmao tlôn pơpha hăng prăp lui hơdôm tơlơi kiăng pơhlôm kơ bruă ngă tui Tơlơi phiăn lŏn drŏn, Tơlơi phiăn bơwih ƀong sĭ mơdrô lŏn sang hăng hơdôm hră pơ-ar pơkă rơđah; hmao tlôn djơ̆ tui tơlơi kiăng sit, pơđĭ dlông ba glăi bôh tơhnal wai lăng mă yua lŏn drŏn kah hăng tơhnal ba tơbiă lơm čih pơkra Tơlơi phiăn; črâo ba, pel ĕp glăi hơdôm hră pơ-ar gah yŭ tơlơi phiăn pơkon hmâo bơdjơ̆ nao rơkâo pơplih pơkra, pơhrua nao, tơdah kiăng”./.