Rơgao 80 thun pơklôn adih, lơ 25/1/1944 jing lơ 1/1 thun phrâo Giáp Thân, ƀơi anih gru phun dêh čar djă pioh anai jing sang mơnă ƀing ayăt ƀơi Ƀuôn Ma Thuôt, hơmâo tơlơi tơgŭ hơkrŭ rŭi tơhan, yua ƀing mơnă arăng mă krư̆ kơ bruă kơđi čar, ƀing wai lăng mơnă, ƀing ling tơhan, mơnuih mă bruă pơ anai pơphun. Mah pơphun mă ƀiă mông đôč samơ̆ bruă ngă anun pơdah rai tơlơi pơmin pran jua khin hơtai mơ̆ng tơhan hơkrŭ ta đưm adih pơkơdong glăi ƀing khua wai lăng mơnă mơ̆ng ayăt ngă pô.
Sang mơnă Ƀuôn Ma Thuôt jing anih djă pioh kah hăng ia mriah kơđom pioh pran jua hơkrŭ prong prong mơ̆ng tơhan hơkrŭ hơmâo tuh drah pơčah asar yua kiăng rơngai lŏn ia, rơnuk rơnua djuai ania. Ƀơi mông jơnum hơdor tơngia anai, abih bang dŏ tơpă, pran jua pơpŭ sit nik, ƀing khua mua nao jơnum pơyơr guang bơnga, čuh ñang h’ŭ laih anun lok glăi gru grua bruă ngă khin hơtai mơ̆ng ƀing tơhan hơkrŭ kơ lŏn ia ta đưm blah ayăt sua lŏn ia.
Viết bình luận