Tơring glông Čư̆ Kuin lĕ sa amăng hơdôm boh tơring glông ƀơi Dak Lak hơmâo lu mơnuih tui đăo. Amăng anun đăo khŏp (dưm dưm 67%), đăo hiam phrâo (dưm dưm 26%) hăng đăo phơ̆t (giăm 7%). Hăng hơnong pơkă hơmâo lu dong mơnuih apăn bruă Ping gah lĕ mơnuih tui đăo, lơ 14/12/2027 Ping gah tơring glông Čư̆ Kuin hơmâo pơjing hăng pơtrun akŏ bruă mrô 02 kơ “Pơtrut kơtang pơđĭ kyar mơnuih apăn bruă Ping gah lĕ mơnuih tui đăo pơlir hăng bruă dưm dăp, mă yua ƀing apăn bruă lĕ mơnuih tui đăo amăng anih anom kơđi čar ƀon lan”.

Hơnong pơkă mơng akŏ bruă mrô 02 lĕ kiăng pơplih tơlơi pơmĭn amăng mơnuih apăn bruă Ping gah hăng mơnuih ƀôn sang, sit biă ñu lĕ mơnuih djuai ania ƀiă tui đăo kơ tơlơi pơsit tong, lăp djơ̆ mơng Ping gah amăng ngă tui hơdră bruă gah tơlơi đăo. Mơng anun đăo gơnang nao tơlơi git gai mơng Ping gah, tơlơi đing nao, tơlơi git gai wai lăng mơng Kơnuk kơna. Laih dong, ăt pơgôp pơplih bruă pơmut mơnuih apăn bruă Ping gah amăng khul Ping gah, kơtưn tơlơi gơgrong amăng git gai, kjăp bruă mơng khul grup Ping gah hăng mơnuih apăn bruă Ping gah amăng kual mơnuih djuai ania ƀiă tui đăo.

Pok pơhai ngă tui hơdôm hơnong pơkă hăng hơdôm hơnong pơkă amăng akŏ bruă mrô 02 mơng Ping gah tơring glông, ƀing apăn bruă Ping gah hơmâo ngă tui hơdôm tơlơi pơtrun ba tơbiă mơng akŏ thun. Pơhmutu, ƀơi Ping gah să Hoà Hiệp hơmâo ngă tui tơlơi pơtrun tui akŏ bruă mrô 12 amăng kơtưn tơlơi git gai mơng Ping gah hăng bruă pơđĭ kyar mơnuih apăn bruă Ping gah. Amăng anun pơsit tong hơnong pơkă “Pơtrut bruă prap pơmut, pơtô hrăm, pơmut mơnuih apăn bruă Ping gah phrâo lĕ mơnuih djuai ania ƀiă hăng mơnuih tui đăo”. Mơng anun, hơdôm khul grup Ping gah să hơmâo pok pơhai khut khăt hơdôm hơdră hăng tui tơlơi pơphun phara. Ơi Trần Văn Du, Khua git gai Ping gah plơi Giang Sơn, să Hoà Hiệp, tơring glông Čư̆ Kuin, tơring čar Dak Lak brơi thâo:

“Khul apăn bruă Ping gah pơphun bruă mă, pơpha hơnong pơkă brơi ƀing apăn bruă Ping gah amăng khul grup kiăng ngă tui bruă jao prap pơmut. Hăng laih dong, pơpha brơi ƀing apăn bruă, khul grup ăt tŭ mă hơnong pơkă anai”.

Mơng hơdôm tơlơi pơhun, bruă mă sit nik amăng ƀon lan, djop khul grup hơmâo ruah mă ƀing mơnuih ba gru kual mơnuih djuai ania ƀiă tui đăo kiăng pơtô hrăm, pơmut amăng Ping gah, pơgôp hơmâo lu dong mơnuih apăn bruă Ping gah pơhrua brơi ƀon lan. Ơi Trần Văn Thục, Khua git gai Ping gah să Hoà Hiệp, tơring glông Čư̆ Kuin, tơring čar Dak Lak brơi thâo:

“Ƀing gơmơi pơphun jơnum kơ bruă pơđĭ kyar mơnuih apăn bruă Ping gah, amăng anun, đing nao bruă pơđĭ kyar mơnuih apăn bruă Ping gah amăng kual mơnuih djuai ania ƀiă, kah hăng pơđĭ kyar mơnuih apăn bruă Ping gah mơnuih djuai ania ƀiă. Kiăng kơ sui pơ anăp hơmâo lu dong mơnuih apăn bruă amăng anih anom kơđi čar, mơ̆ truh ră anai ƀing tha rơma ăt kiăng pơdơi mơn”.

Tui yă Phúc Bình Niê Kđăm, Khua git gai Ping gah tơring glông Čư̆ Kuin, hăng hơdôm tơlơi gir run pơsir hĭ gun găn, hơdeč hmar amăng hơdôm tơlơi pơkă mơng gơnong glông amăng pơđĭ kyar Ping gah, truh ră anai, Ping gah tơring glông Čư̆ Kuin hơmâo 33 grup Ping gah ƀon lan, hơmâo 25 Ping gah ƀon lan, 08 amăng plơi pla, hăng rơbêh 4.400 čô mơnuih apăn bruă Ping gah. Mrô mơnuih mut Ping gah lĕ mơnuih tui đăo jai hrơi lu tui, tơlơi anai pơgôp ngă pơplih bruă pơmut Ping gah, kơtưn amăng git gai, kjăp bruă mơng khul grup Ping gah:

“Mrô mơnuih apăn bruă Ping gah lĕ mơnuih tui đăo glăk jai hrơi lu tui hăng klă tui. Amăng thun 2026, abih tih mrô mơnuih apăn bruă Ping gah tui đăo đơ đam tơring glông lĕ 108 čô mơnuih. Tơdơi kơ pok pơhai ngă tui akŏ bruă truh ră anai, abih tih mrô mơnuih apăn bruă Ping gah lĕ mơnuih tui đăo amăng tơring glông lĕ 245 čô, dưm dưm 5,5% mrô mơnuih apăn bruă đơ đam tơring glông. Tơring glông ăt hơmâo dưm dăp mă yua 13 čô mơnuih apăn bruă Ping gah lĕ mơnuih tui đăo ngă ƀing apăn bruă phun hăng ngă khua mua, kơ-iăng khua khul grup kơđi čar mơnuih mơnam gưl să”.

Hơdôm boh than dưi ngă amăng bruă pơđĭ kyar mơnuih apăn bruă Ping gah lĕ mơnuih tui đăo hơmâo pơdah tơlơi lăp djơ̆ hăng sit nik ƀơi tơring glông Čư̆ Kuin, hơmâo dong mơnuih pơlir hơbit kơplah wah tơlơi đăo hăng tơlơi hơdip. Mơng anun pran gum pơgôp djop djuai ania, tơlơi đăo jai hrơi hrưn đĭ, pơgôp pơđĭ kyar bơwih ƀong huă mơnuih mơnam, pơgăn hĭ hơdôm tơlơi pơčut ngă soh mơng ƀing ayăt kiăng hluai tui tơlơi đăo ngă pơčlah, rung răng djop djuai ania amăng ƀon lan.