Ƀơi tơring glông Čư̆ Kuin, Khul ia jrao kyâo bơrơkal mriah tơring čar Dak Lak phrâo pơphun hơdră anăn Jơnum sang čơ mlia têt tơlơi khăp pap thun 2024. Hơdră anai hơmâo ƀơk 33 anung gơnam hăng 300 pok hră nao blơi gơnam 0 prăk, abih tih rơnoh prăk rơbêh 233 klăk, djru mơnuih ƀôn sang tơnap ƀơi tơring glông Čư̆ Kuin. Hơdôm mơta gơnam sĭ hăng rơnoh 0 prăk lĕ, ƀañ čưng, ƀañ kĕo, ia rơmă, ia mơsin, ia mơsi, sik, tơpung mih ta juăt lăi ƀôt ngot, mì tôm, braih.... Amăng hơdră djru anai dŏ hơmâo lu bruă mă hyu gum ba kah hăng čơkăp amŭ huăi apah prăk, kač rup boh hră hiam gru grua arăng pia thư pháp; čơgăn pơdă gơnam sĭ mơdrô mơnong ƀong huă dưm ƀañ čưng; čơgăn ngă anih čơphil rup djă pioh hăng ngă hrŏm tơlơi ngui ngor mơak gru đưm. Phrâo tŭ mă gơnam têt mơ̆ng hơdră anai, Ayong Y Gu Ƀyă, ƀuôn Ea Mtă, să Ea Bhŏk, tơring glông Čư̆ Kuin lăi:

“Kâo mơak biă mă, bơni kơ hơdôm ƀing hơmâo pran jua hiam klă thâo djru ba pơphun hơdră anai, yôm pơphăn hăng hok mơak lu pioh kơ ƀing tơnap tap ƀun rin kah hăng ƀing gơmơi, bruă ngă anai amra djru kơ gơmơi hơmâo mông mơak čơkă thun phrâo ƀong têt trơi pơđao hloh”.

Tui hăng yă Ayun H’Hương, Khua Khul sang ia jrao kyâo bơrơkal mriah tơring čar Dak Lak, hơdră pơphun sang čơ mlia têt khăp pap thun 2024, amra jao brơi 25.000 anung gơnam, abih tih rơnoh prăk lĕ 17,5 klai prăk, kiăng djru ba abih bang mơnuih tơnap tap amăng tơring čar. Rơngiao kơ 3 hơdră pơphun ƀơi hơdôm tơring glông kah hăng Čư̆ Kuin, Čư̆ Mgar hăng Ea Kar yua kơ khul ia jrao bơrơkal mriah tơring čar ngă hrŏm gong gai kơnuk kơna ƀơi tơring glông pơphun, hơdôm tơring glông dŏ glăi ruah mă hơdră djơ̆ găl pioh pơphun tui hluai anŏ thâo hơmâo mơ̆ng gơñu.

“Kơnang kơ tal jơnum pơdă sang čơ mlia têt khăp pap anai, bơni kơ hơdôm sang bruă sĭ mơdrô hơmâo djru, ƀing pơdrong čơmah pơčruh hrŏm kơ hơdră, ăt čang rơmang pơ anăp anai lu mơnuih djru, sang bruă sĭ mơdrô gum hrŏm ăt pơčruh prăk kăk, gơnam tam hrŏm sang bruă khul ia jrao kyâo bơrơkal mriah ngă tui hơdră djru kơ mơnuih mơnam tơnap tap ƀrư̆ hrơi klă hloh, pơgôp hrŏm brơi kơ mơnuih ƀôn sang čơkă têt ngă yang thun phrâo trơi pơđao, yâo mơak”.

Jơnum min mơnuih ƀôn sang tơring čar Dak Lak phrâo pơkra akŏ bruă djru rơnoh prăk hyu čuă hăng ƀơk gơnam kơ sang bruă, mơnuih mơnam tơnap tap amăng bơyan ngă yang thun phrâo ƀong têt Giáp Thìn 2024. Tui hăng anun, tơring čar Dak Lak pơsit mă yua rơnoh prăk hyu čuă jơmư laih anun ƀơk kơ mơnuih ƀôn sang, sang bruă amăng bơyan ƀong têt Giáp Thìn 2024 lĕ rơbêh 77 klai prăk.

Ƀrô djơ̆ tal anai, khua mua tơring čar Dak Lak pơphun khul grup hyu čuă jơmư, ƀơk 51 anung gơnam brơi kơ sang anŏ hơmâo djru kơnuk kơna ba gru hlâo hăng djop sang bruă kơnuk kơna, tơhan kông an, tơhan pơgang guai dêh čar hăng sng bruă tơhan blah ngă amăng tơring čar. Hrŏm hăng anun, Jơnum min djop djuai ania mơnuih mơnam tơring čar, sang bruă khul ia jrao kyâo bơrơkal mriah tơring čar Dak Lak ăt dăp hơdră jak iâu, ĕp prăk pioh hyu čuă jơmư, ƀơk gơnam kơ hơdôm sang anŏ ƀun rin, sang anŏ hơmâo djru kơnuk kơna dŏ pơ kual ataih, asuek, plơi pla mơnuih djuai ƀiă kiăng kơ abih bang mơnuih ƀôn sang dưi čơkă têt hok mơak, trơi pơđao.

Bruă pơgang djop pô kiăng hơmâo têt hăng ƀu lui raih kơ sa čô ôh hlăk dưi hơmâo Ding jum Bruă mă Tơhan rơka hăng mơnuih mơnam dêh čar hrŏm hăng djop gưl, anom bruă, plơi pla pok pơhai. Ơi Phạm Hồng Đào, Kơ-iăng Khua anom bruă mơ̆ng dêh čar pơhrŏ ƀun rin, Ding jum Bruă mă Tơhan rơka hăng Mơnuih mơnam lăi:

“Gong gai kơnuk kơna ăt kah hăng djop mơnuih čơmah, sang bruă sĭ mơdrô ăt hơmâo glông tơlơi pơhing bơlăi pơthâo, iâu pơtum bruă mă djrủ ba, kiăng abih bang čơkă thun phrâo mơak, tơpă ară kah hăng tơlơi git gai mơ̆ng Khul apăn bruă ping gah dêh čar, Kơnuk kơna hăng Khua dêh čar pơtrun. Djru braih akuăi, rim thun djru ba soh ƀơi mông rơnuč thun. Hrŏm hăng anun, ăt hơmâo gơnam djru mơ̆ng Khua mir sir, gơnam djru mơ̆ng djop tơring čar.Anŏ anun tui hluai thâo hơmâo, prăk kăk mơ̆ng phara ba tơring čar. Ding jum Bruă mă Tơhan rơka hăng Mơnuih mơnam ăt hơmâo hră mơ-it kơ djop tơring čar thâo laih, rơkâo djop sang bruă đing nao djru ba tơlơi hơdip mơda mơnuih ƀôn sang ƀong têt biă mă djru mơnuih ƀun rin tui tơlơi phiăn pơkă. Tơring čar hơmâo tơlơi gơgrong ba, hyu sem lăng, bruă ngă tui tơlơi djru kiăng djơ̆ pô, djơ̆ anăn tŭ mă tơlơi djru, ƀu lui hơmâo tơlơi pơhmao mă tơlơi djru anun, hyu brơi tă tăn ĕp kơmlai ča čot”.

Têt thun phrâo Giáp Thìn hlăk rai giăm yơh. Bruă đing nao djru ba têt kơ mơnuih ƀun rin, ƀing tơnap tap ƀu hơmâo anih ưh kơnang, kiăng pơhlôm djơ̆ djop pô dưi čơkă têt mơak, trơi pơđao jing hĭ gru grua hiam klă mơ̆ng djuai ania Việt Nam ta.