Plơi Kret Krot, să Hra, tơring glông Mang Yang hlâo adih hơmâo rơbêh ha mơkrah mrô sang anŏ ƀong ia bah arăng plư kiăo tui đăo Hà Mòn, ngă rung răng plơi pla. Hơdôm thun laih rơgao, hrŏm hăng bruă pơkơdong, lui hĭ tơlơi đăo sat, gong gai amăng ƀrư̆ akŏ pơdong, pơmut mơnuih ping gah phrâo, ngă kjăp tui anom bruă kơđi čar. mơ̆ng anih ƀu hơmâo mơnuih ping gah, ră anai amăng plơi hơmâo laih 9 čô mơnuih ping gah. Ping gah să Hra jao bruă kơ rim čô mơnuih ping gah ƀơi plơi gơgrong bruă wai lăng hơdôm ƀut sang anŏ. Tui anun, mơnuih ping gah ngă gru hlâo amăng pơđĭ kyar bơwih ƀong, akŏ pơdong tơlơi hơdip hiam amăng plơi pla, ngă tui klă hơdôm tơlơi pơtrun, jơlan hơdră ngă bruă mơ̆ng ping gah hăng kơnuk kơna, iâu pơthưr, pơtô lăi, pơtô ba mơnuih ƀôn sang ngă tui. Mơ̆ng anun hơmâo ƀuh, pơtô ba, pơđĭ kyar mơnuih rơgơi mơbruă jing mơnuih ping gah phrâo. Ayong Sin - mơnuih ping gah plơi Kret Krot, să Hra brơi thâo:“Mơnuih ping gah ngă tui klă tơlơi pơtrun mơ̆ng Ping gah, Kơnuk kơna. Hơmâo laih sa čô mơnuih ping gah ngă gru, ba jơlan hlâo amăng plơi, ngă hơget khŏm ngă djơ̆, kiăng neh met wa lăng tui”.

Abih bang să Hra tơring glông Mang Yang ră anai hơmâo rơbêh 2.000 boh sang anŏ, 63% mrô mơnuih lĕ djuai ania aset. Să Hra hơmâo1 5 grup ping gah, 177 čô mơnuih ping gah. Amăng anun, 3 boh plơi yôm phun kơ rơnuk rơnua kơđi čar lêng kơ hơmâo ngă giong laih anom bruă, mơnuih mă bruă ping gah. Rơbêh ha mơkrah amăng mrô mơnuih mă bruă amăng plơi pla lêng kơ mơnuih ping gah soh. Să gir truh pơ thun 2025 mrô anai hơmâo 80%. Anom bruă ping gah, mơnuih ping gah hơmâo hơkrŭ kjăp tui, pơđĭ kyar, jing anih kơnang kiăng hơđong kjăp ƀơi rim boh plơi pla. Yă Nguyễn Thị Huệ - Kơ-iăng khua Jơnum min pơ ala mơnuih ƀôn sang să Hra brơi thâo:“Tơdơi kơ hơmâo tơlơi jao bruă mơ̆ng Ping gah lĕ mơnuih ping gah kar hăng kâo anai gơgrong bruă amăng plơi ăt khŏm gir run abih pran jua mơn. Tal sa lĕ pơtô brơi grup ping gah jơnum djơ̆ tui tolwơi pơtô ba mrô 12 mơ̆ng Anom pơphun bruă Ping gah hăng tơlơi pơtô ba mrô 3 mơ̆ng Anom pơphun bruă ping gah tơring glông Mang Yang; ăt djru brơi grup ping gah amăng bruă git gai črâo bruă kơ grup ping gah dưi ngă bruă; djru ba mơnuih ping gah thâo hluh tơlơi gơgrong bruă prong mơ̆ng ƀing gơñu amăng plơi pla”.

Hơđong rơnuk rơnua kơđi čar, tơlơi hơdip mơnuih ƀôn sang pơplih phrâo. Thun 2023, prăk pơhrui yap tui akŏ mơnuih ƀơi să hơmâo rơbêh 40 klăk prăk, mrô sang anŏ rin dŏ glăi 13%, rim thun hrŏ mơ̆ng 5 truh kơ 7%. Ơi Đinh Văn Tâm - Kơ-iăng khua ping gah să Hra, tơring glông Mang Yang brơi thâo:“Amăng hrơi blan giăm anai gơmơi ăt hơmâo dưm dăp, pơtô brơi bruă jơnum ping gah amăng plơi pơhlôm klă, djơ̆ tơlơi pơtrun, gơmơi pơkiăo nao sa čô mơnuih ngă Kơ-iăng khua grup ping gah, hrŏm hăng grup ping gah prăp rơmet bruă yôm phun kiăng ngă. Pơhmutu kah hăng pơđĭ kyar ping gah giong anun lŏm lui tơlơi rin rơpa, pơkơdong glăi đăo sat Hà Mòn”.

Anom bruă kơđi čar amăng ƀrư̆ hơmâo pơđĭ tui anŏ klă, tŭ yua, pơhlôm rơnuk rơnua hơđong bruă kơđi čar, pơplih djŏp mơta tơlơi hơdip mơnuih ƀôn sang djuai ƀiă ƀơi să Hra./.