Hlâo adih, sang anô̆ amai Đinh Thị Trạm ƀơi plơi Groi, să Ya Hội, tơring glông Đak Pơ lĕ sang anô̆ ƀun rin. Thun 2018, sang anô̆ amai Trạm dưi gum djru tui sang anô̆ ƀun rin hăng mrô prăk 47 klăk prăk mơ̆ng Sang prăk gah hơdră bruă – mơnuih mơnam tơring glông Đak Pơ pioh pla 2 ektar đang keo. Mơ̆ng mrô prăk pơkrem pioh hăng gir run mơ̆ng drơi pô truh ră anai, sang anô̆ ñu hmâo 4 ektar đang keo, 5 ar đang hơbơi plum hăng rông dong un, rơmô. Akô̆ thun 2023, tơdơi kơ lu thun gir run bơwih ƀong huă, rơkơi bơnai ñu pơdŏng laih sang dô̆ phrâo hăng dưi sut lui anăn amăng hră čih anăn sang anô̆ ƀun rin mơ̆ng plơi Groi.

 “Rơkơi lĕ nao mă bruă pơ̆ anih ataih, kâo lĕ dô̆ pơ̆ sang pơkrem pioh hmâo ƀiă, thâo tơčoh sum ao, băn ao mơñam hrŏm hăng ƀing adơi amai pioh tơtlaih mơ̆ng ƀun rin”.

Tơring glông Đak Pơ ră anai dô̆ giăm truh 2000 bôh sang anô̆ ƀun rin hăng ƀun rin ƀơƀiă hmâo dong prăk pơhrui glăi, tơring glông Đak Pơ hmâo pok pơhai lu bruă djru tui jơlan gah "jao gai wah hloh kơ hring akan” pioh mơnuih ƀôn sang hmâo anô̆ yua, gơnam bơwih ƀong huă, hrưn đĭ tơtlaih mơ̆ng ƀun rin kơjăp sui thun. Truh ră anai, 7/8 mrô să, tơring kual mơ̆ng tơring glông hmâo pơphun pơtô pơhrăm bruă mă ƀơi plơi pla kơ năng ai ñu 1500 čô mơnuih, pơsit brơi 21 rơbâo pok hră pơgang gah ia jrao kơ mơnuih ƀun rin, ƀun rin ƀơƀiă, sang anô̆ hmâo rơnoh hơdip găp hơnong, mơnuih djuai ania ƀiă kual II, III hăng mơnuih Yuan hơdip mơda ƀơi kual tơnap tap. Ơi Huỳnh Văn Hơn - Kơ-iăng Khua Jơnum min mơnuih ƀôn sang tơring glông Đak Pơ brơi thâo, hrŏm hăng pran kơtang gah phun tơbâo phun hơbơi plum lĕ ră anai ƀơi anai hmâo dong anô̆ gal pơjing đang añam nao hrŏm hăng gơnam ngă rai, pơjing hơdôm mơta gơnam OCOP pioh hmâo dong prăk pơhrui glăi kơ mơnuih ƀôn sang, hrŏ trun rin rơpa kơjăp sui thun.

 “Jơlan hơdră pơkă mơ̆ng lŏn ia hrŏ trun kơjăp phik ƀơi plơi pla hluai tui iâo pơthưr hơdôm ngăn rơnoh pioh pơjing anih anom pơplih phrâo tơlơi hơdip mơ̆ng neh wa. Hrŏm hăng anun, rơgao hơdôm hơdră hơđong tơlơi hơdip mơda pioh djru neh wa amăng bruă tơjŭ pla rông hlô mơnong, pơtô brơi neh wa huăi ah gơnang, thâo pơphun bruă ngă đang hmua kiăng pơplih tơlơi hơdip mơda”.

Čư Păh ăt lĕ tơring glông hmâo lu să tơnap tap hăng mrô sang anô̆ ƀun rin lu. Hăng lu jơlan pơsir, mơ̆ng bruă lăi pơhing hyu, pơhrăm truh kơtưn hơdôm rơwang bruă tuh pơplai, thun 2023, abih bang mrô sang anô̆ ƀun rin đơ đam tơring glông hrŏ trun 3,82% bơhmu hăng thun 2021. Ơi Nay Kiên – Khua Jơnum min mơnuih ƀôn sang tơring glông Čư̆ Păh brơi thâo:

 “Dong mơng hơdôm prăk gah hơdră bruă pơkă, hơdôm hơdră pơkă mă yua pioh ngă brơi kual neh wa djuai ania ƀiă lĕ, bruă hrŏ trun ƀun rin dưi pơdah rơđah kah hăng hlâo adih hơdôm jơlan hơdră pla glăi kơphê, bôh ñu mơ̆ng djuai pơjeh phrâo, hơdră pla, bruă pơplih jơlan gah amăng hơdră phun pla mơ̆ng tơring glông, đing nao hơdôm phun pla sui thun, phun bôh troh hmâo nua lu hmâo bơdjơ̆ nao klă ƀơi anăp bruă hrŏ trun ƀun rin”.

Amăng rơwang 2021-2023, tơring čar Gia Lai pơpha rơbêh kơ 400 klai prăk pioh ngă tui hơdôm jơlan hơdră pơkă mơ̆ng lŏn ia. Rơngiao kơ ngăn drap djru mơ̆ng Sang prăk Kơnuk kơna, Gia Lai ăt ngă tui mơn bruă pơhrua hrŏm tuh pơplai mơ̆ng hơdôm jơlan hơdră, rơwang bruă; Lu anih anom hmâo hơdră ngă klă, jơlan pơsir sit nik lăp djơ̆ hăng bôh nik hmâo, ngă gal brơi pioh mơnuih ƀun rin pok prong pơđĭ kyar ngă đang hmua, rông hlô, pơđĭ tui prăk pơhrui glăi, tơtlaih mơ̆ng ƀun rin kơjăp sui thun. Mrô sang anô̆ ƀun rin ƀơi tơring čar mơ̆ng 12,09% thun 2021 hrŏ trun dô̆ 8,11% amăng rơnuč thun 2023. Amăng anun, mrô sang anô̆ ƀun rin lĕ neh wa djuai aniă ƀiă hrŏ trun mơ̆ng 25,58% thun 2021 trun dô̆ 17,05% amăng rơnuč thun 2023, djơ̆ tơhnal hăng hloh kơ tơhnal pơkă hrŏ trun mrô sang anô̆ ƀun rin amăng neh wa djuai ania ƀiă hơnong ñu rơbêh kơ 3% sa thun tui rơnoh pơkă ƀun rin lu bơnah rơwang 2022-2025.

Ơi Trường Trung Tuyến – Kơ-iăng Khua Grŭp djuai ania tơring čar Gia Lai brơi thâo, amăng thun 2024, tơring čar Gia Lai hrưn đĭ dong mrô sang anô̆ ƀun rin hrŏ trun ƀơi rơnoh 2%, mrô sang anô̆ ƀun rin djuai ania ƀiă hrŏ trun 3%, rim yak pơplih hăng pơđĭ tui tơlơi hơdip mơda mơnuih ƀôn sang.

 “Khul khua pơ ala mơnuih ƀôn sang tơring čar hmâo jơnum hăng pel ĕp tơlơi pơtrun pơsit hăng jao tơhnal pơkă kơ hơdôm tơring glông, hơdôm gơnong bruă amăng pok pơhai jơlan hơdră pơkă mơ̆ng lŏn ia hrŏ trun ƀun rin kơjăp sui thun lĕ bruă pok pơhai klă hăng ba glăi bôh tơhnal jơlan hơdră anai amra djru prong biă kơ bruă hrŏ trun ƀun rin amăng kual neh wa djuai ania ƀiă. Ră anai ƀing gơmơi glăk pơphô klă kơ Jơnum min mơnuih ƀôn sang tơring čar mă yua kơčăo bruă rơđah pok pơhai ngă tui jơlan hơdră. Amăng anun đing nao ngăn rơnoh kiăng hlâo pok pơhai bôh yôm amăng thun phrâo rơgao pok pơhai klă biă, hơdôm ngăn rơnoh anai amra djru kual neh wa djuai ania ƀiă pơplih, djru mrô sang anô̆ ƀun rin amăng kual neh wa djuai ania ƀiă pơ̆ anăp anai hrŏ trun"./.