Tơdơi kơ 3 thun dô̆ amăng sang mơnă pơwot glăi pơ̆ sang ƀơi plơi Tôr 1, să Glar, tơring glông Đak Đoa, blan 10/2023 phrâo rơgao, ayong Trôl dưi hmâo anom brơi čan prăk să, hrŏm hăng gong gai să tŭ ư hrŏm lăi pơthâo hăng djru brơi čan 50 klăk prăk. Hmâo prăk, ñu khin hơtai yua 10 klăk prăk blơi 2 drơi rơmô, laih anun pioh mă eh rơmô pruai kơ phun pla, hăng pioh rơmô tuh ană. 40 klăk prăk dô̆ glăi, ñu yua pơplih pơkra glăi 2 ektar đang kơphê. Ñu brơi thâo, ñu ol kơdol pran jua biă yua kơ hmâo tơlơi lăng ba, gum djru:

 “Kâo lĕ mơnuih hmâo tơlơi soh, samơ̆ ăt dưi lăng ba mơn hăng djru kâo. Kâo amra yua mrô prăk anai kơ đang kơphê. Kâo čang rơmang huăi hmâo tơlơi hne adih pioh tla glăi tañ hloh prăk čan kơ kơnuk kơna”.

Glăk dô̆ gun čơhmu kơphê ƀơi lan sang, amai Lê Thị Tuyết Nhung ƀơi grŭp mrô 2, thôn 3, să Nam Yang, tơring glông Đak Đoa brơi thâo, 2 tơn kơphê anai, ñu phrâo blơi mơ̆ng neh wa amăng să, kơnang kơ ngăn rơnoh čan mơ̆ng Sang prăk gah hơdră bruă. Rơgao hăng anai 2 blan, tơdơi kơ tơbiă mơ̆ng sang mơnă pơwot glăi pơ̆ sang, ñu akă ƀu thâo ngă hơget lĕ, yua kơ mlâo mlač kơ arăng, laih anun yua kơ ƀu hmâo prăk bơwih ƀong, hmâo hĭ gong gai hăng khul kông ang djru hơdră ngă hră pơ-ar, lăi pơthâo kơ ñu čan mrô prăk 100 klăk prăk gah hơdră bruă. Hăng tơlơi hơdeč hmar, ñu hmâo yua laih mrô prăk anai pioh pla hăng blơi sĭ kơphê amăng bơyan phrâo mơtăm. Amai Nhung brơi thâo:

 “Kâo pơmin mă yua prăk pla kơphê, dua lĕ blơi sĭ rim hrơi. Kâo phing kơ pran jua hăng ngăn rơnoh anai, kâo amra ngă klă. Hăng čang rơmang prăk anai pơ̆ anăp amra dưi djru mơnuih kah hăng kâo anai pioh hmâo jơlan bơwih ƀong”.

Thiếu tá Trần Thị Luận – Kơ-iăng Khua Grŭp pơsir kơđi tơlơi hăng djru tơlơi phiăn, gơgrong bruă pơmut glăi amăng mơnuih mơnam, Kông ang tơring glông Đak Đoa brơi thâo. Tơdơi kơ hmâo Tơlơi pơsit 22/2023 mơ̆ng Khua dêh čar pok pơhai ƀơi tơring čar mơtăm, mơ̆ng blan 10 truh blan 12/2023, Kông ang tơring glông Đak Đoa hmâo gum hrŏm klă laih hăng Sang prăk gah hơdră bruă pel ĕp glăi, pơsit pioh djru mơnuih phrâo tơbiă mơ̆ng sang mơnă pơwot glăi plơi pla amăng 5 thun jê̆ hăng anai. Rơgao kơ anun, hmâo laih 45 čô mơnuih dưi djru prăk bơwih ƀong amăng thun 2023, hăng mrô prăk hơnong ñu mơ̆ng 70 truh 100 klăk prăk sa čô mơnuih. Pơkă hlâo amăng thun phrâo 2024, bruă anai amra ngă dong, ngă anih gơnang, djru mơnuih jrôk jơlan phing kơ pran jua mut hrŏm djop mơnuih, hăng hrưn đĭ ngă pô amăng tơlơi hơdip mơda:

 “Kâo pơsit yôm biă hăng sang prăk gah hơdră bruă amăng djru ba, biă ñu mơnuih mă bruă brơi čan prăk hur har pran jua, hluh gah lăng tui hră čan prăk, djru ba ngă giong hră pơ-ar. Hmâo mơnuih ngă giong hră pơ-ar amăng 1, 2 hrơi, ƀing apăn bruă djru ngă giong pioh hmao pơsir prăk kơ mơnuih čan pioh pơđĭ kyar bơwih ƀong”.

Hơdôm blan rơnuč thun 2023 phrâo rơgao, ƀơi đơ đam tơring čar Gia Lai dô̆ hmâo hơdôm pluh čô mơnuih ngă tui giong hrơi pơkă dô̆ amăng sang mơnă pơwot glăi plơi pla ăt dưi dju ba mơn mơ̆ng ngăn rơnoh jơlan hơdră. Ơi Nguyễn Triều Quang – Kơ-iăng Khua Sang prăk gah hơdră bruă mơnuih mơnam tơring čar – brơi thâo: Ngă tui djơ̆ jơlan gah ƀu pioh hlơi lui lơi gah tlôn mơ̆ng jơlan hơdră, mơ̆ng krah blan 10/2023, sang prăk pơphun pok pơhai brơi čan.

Amăng rơbêh kơ 1 blan, pơsir brơi rơbêh kơ 4 klai prăk, brơi giăm truh 100 čô mơnuih hmâo djop tơlơi dưi čan. Bôh nik brơi ƀuh, prăk anai leng kơ dưi mă yua pioh kơ bơwih ƀong huă ngă đang hmua, sĭ mơdrô anet hăng hrăm bruă. Amăng hơdôm hrơi pơ̆ anăp, hrŏm hăng bruă pok pơhai dong bruă brơi čan prăk, sang prăk gum hrŏm dong hăng jơnum min, gơnong bruă, khul grŭp, gong gai lăng ba, pơsur, djru ba pioh mơnuih čan mă yua prăk ba glăi bôh tơhnal, pơjing lu tơhnal gal pioh gơñu hrưn đĭ amăng tơlơi hơdip mơda.

 “Hơdôm hrơi rơgao, Sang prăk gah hơdră bruă mơnuih mơnam hmâo gum hrŏm kơjăp hăng hơdôm khul kơđi čar mơnuih mơnam čơkă gơgrong ba hăng gong gai, kông ang, thâo rơđah tơlơi, pel ĕp tơlơi kiăng hăng mơnuih tơbiă mơ̆ng sang mơnă. Pơ̆ anăp anai, sang prăk thâo dong tơlơi, pok pơhai kơčăo bruă mơ̆ng Jơnum min mơnuih ƀôn sang tơring čar pioh ngă tui jơlan hơdră anai klă hloh”.

Jơlan hơdră brơi čan prăk hăng mơnuih phrâo tơbiă mơ̆ng sang mơnă tui Tơlơi pơsit mrô 22/2023 mơ̆ng khua dêh čar lơ 17/8/2023 lĕ jơlan hơdră klă hiam. Bruă tañ pok pơhai hăng pok pơhai ba glăi bôh tơhnal ƀơi tơring čar Gia Lai djru ngă tui laih pran jua klă ană mơnuih anun, djru ƀing jrôk jơlan hmâo anih kơnang kơjăp hơđong tơlơi hơdip mơda hăng hmâo tơhnal hrưn đĭ./.