Tơdơi kơ lu thun hơdip hăng tơlơi rin rơpa, sang anŏ amai Rahlan Siu H’Hằng, dŏ ƀơi plơi Tu 1, să Ia Ga, tơring glông Čư̆ Prong tơklaih laih mơ̆ng rin rơpa. Amai H’Hằng brơi thâo, sang anŏ ñu hơmâo 3 ha phun kyâo bạch đàn, laih anun ñu ăt hơmâo lu tơlơi pơmin či pơđĭ kyar bơwih ƀong mơn. Samơ̆ yua ƀu hơmâo prăk, anun jing amăng lu thun ñu glêh tơnap biă mă, bơwih ƀong ƀu đĭ ôh. Sui mơ̆ng anai 3 thun, sang anŏ ñu hơmâo djru čan 50 klăk prăk pioh kơ sang anŏ rin, ñu jing dưi ngă tơlơi ñu kiăng. Yua thâo bơwih ƀong, ră anai ñu hơmâo pơhrui glăi mơ̆ng 40 truh kơ 50 klăk prăk lơ̆m sa thun mơ̆ng bruă pơđĭ kyar bơwih ƀong:“Hlâo adih sang anŏ kâo tơnap biă mă, kiăng blơi hlô rông, pla gơnam ƀu hơmâo prăk či ngă ôh. Tơdơi kơ hơmâo čan prăk, jing kâo čan 50 klăk, blơi 1 drơi rơmô, pla thim kơphê, wai lăng đang kyâo bạch đàn dong. Ră anai prăk pơhrui glăi mơ̆ng 40 truh kơ 50 klăk/thun”.

Hrup hăng anun mơn, thun anai, sang anŏ ayong Ksor Tứ dŏ ƀơi ƀuôn Choanh, să Uar, tơring glông Krông Pa hok mơ-ak biă mă lơ̆m dưi man pơkra sang dŏ phrâo. Ñu brơi thâo, sui mơ̆ng anai 3 thun, yua hơmâo čan 40 klăk mơ̆ng sang prăk djru mơnuih tơnap tap, ñu pla tơbâo, blơi rơmô či bơwih ƀong. Tơdơi kơ 3 thun, ñu tla giong hnưh, pơkra sang dŏ hăng hơmâo 5 drơi rơmô. Ñu hok mơ-ak lăi:“Hlâo adih, ƀing gơmơi hơdip amăng sang ƀu rup ôh. Kơnuk kơna brơi čan djru bơwih ƀong, jing gơmơi dưi pơkra sang dŏ. Ră anai tơlơi hơdip hơđong laih, kâo pơƀut bơwih ƀong đôč yơh”.

Ră anai, prăk brơi čan mơ̆ng Sang bruă prăk djru mơnuih mơnam tơring čar Gia Lai hơmâo rơbêh 6.700 klai, hăng 153.925 čô tuai čan mă. Kơnong amăng thun 2023, Sang bruă prăk djru mơnuih mơnam tơring čar Gia Lai hơmâo prăk brơi čan 1.700 klai prăk, hăng rơbêh 41.500 wơ̆t čô mơnuih čan mă. Amăng anun, sang anŏ rin, sang anŏ djuai ƀiă hơmâo čan tui tơlơi pơtrun mrô 11/NQ-CP mơ̆ng Kơnuk kơna kah hăng brơi čan sang dŏ mơnuih mơnam, čan pơđĭ kyar bơwih ƀong - mơnuih mơnam kơ mơnuiuh ƀôn sang djuai ƀiă, jing rơbêh 13.000 boh sang anŏ. Ơi Đinh Văn Nghĩa - Kơ-iăng khua sang bruă prăk djru mơnuih mơnam tơring čar Gia Lai brơi thâo:“Sang bruă prăk djru mơnuih mơnam tơring čar lêng kơ lăng yôm bruă brơi čan kơ mơnuih ƀôn sang djuai ƀiă ƀơi hơdôm boh plơi pla. Gơmơi hơmâo ngă hrŏm kjăp tom djŏp gưl, anom bruă hăng plơi pla hơduah ĕp tơlơi kiăng hăng tơlơi bơwih ƀong mơ̆ng hơdôm boh sang anŏ rin, giăm rin, mơnuih ƀôn sang djuai ƀiă hăng sang anŏ hơmâo anăn kơnuk kơna djru, đah mơ̆ng čih pơkra hơdră ngă bruă, hơmâo pơkă rơnoh, brơi prăk čan kiăo tui tơlơi tơnap tap hăng tơlơi kiăng lăp djơ̆ hăng tŭ yua”.

Prăk brơi čan mơ̆ng Sang bruă prăk djru mơnuih mơnam djru ba hơdôm boh sang anŏ rin, giăm rin, sang anŏ mơnuih djuai ƀiă ƀơi Gia Lai pơsir hĭ  hơdôm tơlơi tơnap tap amăng tơlơi hơdip, pơđĭ kyar bơwih ƀong, hrưn đĭ tơklaih hĭ mơ̆ng tơlơi rin rơpa hơđong kjăp./.