Amăng akŏ bruă mơng Ding jum kông ang, kông ang tơring glông Ea H’leo hơmâo jao hơnong pơkă man pơdong 86 boh sang khăp pap. Tui thượng tá Phùng Minh Trí-Khua kông ang tơring glông Ea H’leo tơdơi kơ tŭ mă tơlơi git gai mơng gơnong glông, blan 3/2024, anom bruă hơmâo pơphô bruă brơi Jơnum min mơnuih ƀôn sang tơring glông Ea H’leo akŏ pơjing khul git gai ngă tui akŏ bruă; gum hrŏm hăng hơdôm anom bruă bơdjơ̆ nao, Jơnum min mơnuih ƀôn sang hơdôm boh să, tơring kual pel ĕp, ruah ƀing mơnuih dưi tŭ mă tơlơi gum djru. Lơm pơphun man pơdong, kông ang tơring glông hơmâo pơkiăo nao mơnuih djru, sit biă ñu lĕ ƀing hlăk ai mơng anom nao djru man pơdong sang brơi neh met wa…hăng tơlơi gir run mơng abih bang, kơnong giăm 2 blan, tơring glông Ea H’leo hơmâo man pơdong giong 86 boh sang, jao brơi hơdôm boh sang anŏ, tañ ƀiă 4 blan. Thượng tá Phùng Minh Trí brơi thâo:

“Tơdơi kơ giăm 2 blan pok pơhai ngă tui, sang tal 86 (anai lĕ sang man pơdong rơnuč tui akŏ bruă amăng tơring glông) hơmâo man pơdong giong. Anai lĕ bruă mă yôm phăn, sit nik hăng djru khăp pap, pơhlôm brơi tơlơi hơdip kơ mơnuih mơnam amăng tơring glông, djru brơi neh met wa hơmâo anih dŏ hơdip, hơđong bơwih ƀong huă”.

Ƀơi tơring glông Čư̆ Kuin bruă ngă tui akŏ bruă man pơdong sang khăp pap hơmâo pok pơhai tañ hloh mah bưp lu tơnap tap. Tui thượng tá Nguyễn Cao Quyết- Khua kông ang tơring glông, lu sang anŏ dưi tŭ mă tơlơi gum djru, samơ̆ lŏn kiăng man pơdong sang aka ƀu pơčlah ôh, aka ƀu pơplih mă yua lŏn, aka ƀu hơmâo hră pơ-ar lŏn sang. sa, dua boh sang anŏ ƀu hơmâo hră pơsit sang anŏ ƀun rin, giăm ƀun rin. Hrŏm hăng anun lĕ hơdôm anom bruă djru brơi aka ƀu mơ-it nao prăk djơ̆ hrơi mông. Kiăng pơsir hĭ tơlơi tơnap tap, gun găn, kông ang tơring glông gum hrŏm hăng hơdôm anom bruă bơdjơ̆ nao, Jơnum min mơnuih ƀôn sang hơdôm boh să, ječ ameč ngă hră pơ-ar djru brơi neh met wa; pơtrut hơdôm anom bơwih ƀong sĭ mơdrô djru brơi gek, pơsơi kiăng man pơdong sang. Hăng tơlơi gum djru mơng djop anih anom bơdjơ̆ nao, hơdôm tơlơi tơnap tap, gun găn hơmâo pơsir hĭ tañ hloh. Thượng tá Nguyễn Cao Quyết brơi thâo:

“Rơngiao kơ prăk djru mơng Ding jum kông ang hăng tơring čar, kông ang tơring glông ăt jak iâu gum pơgôp mơng ƀing mơnuih čơmah kiăng djru brơi mơnuih ƀôn sang. Ƀing kông ñơ̆n jak iâu djop khul grup, kông ang să nao djru man pơdong sang brơi neh met wa. Hăng hơnong pơkă man pơdong brơi kjăp, hiam, mă yua klă”.

Dak Lak lĕ tơring čar kual Dap kơdư hơmâo giăm 2 klăk čô mơnuih, mrô mơnuih ƀun rin giăm 8%. Kiăng djru ruh hĭ sang tơ̆I rơ̆I, sang dŏ jang jai, Ding jum kông ang hơmâo pok pơhai akŏ bruă man pơdong 1.200 boh sang khăp pap djru brơi hơdôm boh sang anŏ ƀun rin, sang anŏ tơnap tap, mơnuih djuai ania ƀiă, sang anŏ tui hơdră djru ƀơi Dak Lak hăng jao kông ang tơring čar git gai ngă tui. Hăng pran jua gơgrong hrŏm hăng tơlơi gir run mơng kông ang tơring čar Dak Lak hăng gong gai ƀon lan, 1.200 boh sang hơmâo man pơdong giong amăng rơnuč blan 7/2024, tañ ƀiă 3 blan tui pơkă hlâo, ba glăi tơlơi mơ-ak kơ hơdôm boh sang anŏ. Ayong Y Thon Niê (djuai ania Êđê) dŏ amăng ƀuôn Ma Sút, să Krông Jing, tơring glông M’Drak hok mơ-ak lơm đĭ dŏ sang phrâo, ñu brơi thâo:

“Sang kyâo sô hơđăp prong 20 met karê, amăng bơyan hơjan hli, ia tơdjoh, bơyan phang amruih, pơ-iă hang. Hơmâo Ding jum kông ang djru brơi sang dŏ kâo hok mơ-ak biă mă, ră anai huăi hŭi ia hơjan tơdjoh, pơ-iăng hang dong tah. Dua rơkơi bơnai hơđong pran jua bơwih ƀong huă, gir run hyu mă bruă arăng apah kiăng čem rông ană bă hrăm hră. Bơni kơ Ding jum kông ang hăng djop gưl, gơnong bruă”.

Tui Đại tướng Lương Tam Quang-Ding jum kông ang, 1.200 boh sang jao brơi sang anŏ tơnap tap ƀơi Dak Lak hơmâo man pơdogn tañ ƀiă hăng pran jua ječ ameč, gơgrong mơng kông ang, djop gưl ƀôn lan ƀơi tơring čar Dak Lak; tơlơi gum hrŏm mơng hơdôm anom bơwih ƀong sĭ mơdrô amăng ngă tui bruă jao djru brơi tơlơi hơdip mơnuih mơnam. Khua ding jum kông ang lăi pơtong, Ding jum kông ang amra tŏ tui ba jơlan hlâo amăng ngă tui jơlan hơdră “Đơ đam dêh čar gum tơngan hrŏm ruah hĭ sang tơ̆i rơ̆i, sang dŏ jang jai amăng đơ đam dêh čar”, anăm brơi blơi ôh dŏ glăi gah tlôn”

“Tŏ tui ngă tui tơlơi git gai mơng Khua git gai Ping gah dêh čar ơi Tô Lâm, Ding jum kông ang amra tŏ tui ba jơlan hlâo amăng pơplông: “Đơ đam dêh čar gum tơngan hrŏm ruh hĭ sang tơ̆i rơ̆i, sang dŏ jang jai đơ đam dêh ča”. Mơng anai truh thun 2025, pơgôp ngă tui sit nik hơnong pơkă ruh hĭ 153.000 sang dŏ jang jai, sang tơ̆i rơ̆i amăng đơ đam dêh čar, sit biă ñu lĕ ƀơi kual ataih, asuek amăng hơdôm boh ƀon lan kiăng pơhlôm hơđong, amăng anun hơmâo kual Dap kơdư./.