Truh ră anai, hră pơ-ar čih Tơlơi phiăn lŏn drŏn (pơplih pơkra) hmâo pơplih phrâo, abih bang pran jua Tơlơi pơtrun pơsit 18 mơ̆ng Ping gah dêh čar, kiăo tui pran jua Phiah phiăn, Tơlơi pơtrun mơ̆ng Ping gah hăng hơdôm tơlơi phiăn mă yua ră anai.

Pơhiăp amăng mông jơnum, Khua git gai wai lăng pơ ala mơnuih ƀôn sang dêh čar Vương Đình Huệ rơkâo đing nao hơdôm tơlơi dô̆ hmâo tơlơi gum pơhiăp pha ra kah hăng: mă glăi lŏn pioh ngă tui rơwang bruă sang dô̆ apah, rơwang bruă sang apah lu mơta, bơwih ƀong huă; Jơlan gah pơsit nua lŏn, tơlơi dưi, bruă gơgrong ruah mă jơlan gah pơsĭt nua lŏn; Rơwang bruă pơkom pioh lŏn, lŏn pioh pơđĭ kyar, pơplih bôh than mă yua. Khua git gai wai lăng pơ ala mơnuih ƀôn sang pel ĕp, lăng glăi Tơlơi phiăn lŏn drŏn (pơplih pơkra) amăng Tal jơnum ƀu pơkă hlâo lok 5.

Gah hră čih Tơlơi phiăn hơdôm Khul brơi čan prăk (pơplih pơkra), Khua git gai wai lăng pơ ala mơnuih ƀôn sang lăi rơđah anai ăt lĕ rơwang bruă Tơlơi phiăn yôm phăn, bơdjơ̆ nao dơlăm prăk kak, hơđong bơwih ƀong prong; pơhlôm, hơđong, prăk kak lŏn ia. Rơkâo ngă giong dong rơwang bruă Tơlơi phiăn pioh pơhlôm rơwang bruă Tơlơi phiăn lăng glăi anô̆ kơjăp ñu klă hloh, ha amăng plĕ hăng hơdôm tơlơi phiăn kah hăng Phiăn pơkă hrŏm, Phiăn pơsir kơđi, phiăn wai lăng mă jia... hăng djơ̆ tui tơlơi rơkâo sit, dăp glăi khul brơi čan prăk hăng sang prăk.

Gum pơhiăp kơ hră čih Tơlơi pơtrun pơsit kơ sa dua hơdră pơkă, hơdră djru pha ra pioh pơtlaih tơlơi tơnap, tơlơi gun, pơtrut kơtang rơnoh ngă tui hơdôm Jơlan hơdră pơkă mơ̆ng lŏn ia, Jơnum min apăn bruă Khua pơ ala mơnuih ƀôn sang tŭ ư tơlơi kiăng hloh mơ̆ng bruă mă yua hơdră pơkă, hơdră djru pha ra lĕ pơphun mơ̆ng bôh nik hmâo pioh pơtlaih hơdôm tơnap, tơlơi gun lơm pok pơhai ngă tui hơdôm Jơlan hơdră pơkă mơ̆ng lŏn ia pioh pơtrut tañ rơnoh bruă, bôh tơhnal mơ̆ng hơdôm jơlan hơdră anai pơ̆ anăp. Kơ-iăng Khua git gai wai lăng pơ ala mơnuih ƀôn sang Nguyễn Khắc Định rơkâo:

 “Tơlơi pơtrun pơsit lĕ hơdôm tơlơi, pơtlaih anô̆ tơnap hăng pơtrut tañ rơnoh bruă. Yua anun khom đing nao pơtlaih hăng pơtrut tañ. Sa lĕ, hmâo pơtlaih laih lĕ anăm pơhrua nao dong tah. Dua lĕ, pơtrut tañ hă anăm hmâo dong tah hơdôm mơta hră pơ-ar, pioh kaih hĭ dong, gun gan, rơngia hrơi mông, tuč rơnuč ñu jing kaih. Rơkâo lĕ kiăo tui Tơlơi pơtrun pơsit 98, Tơlơi pơtrun pơsit 100. Anăn rơguăt đôč hăng ăt tŭ ư hrŏm mơn anăn iâo lĕ Tơlơi pơtrun pơsit pơphô hlâo. Yua kơ bôh yôm hmâo pơphô laih, hmâo rơwang pơkă laih, hmâo mơnuih hăng jơlan hơdră anai kơnong amăng rơwang rơbêh kơ sa thun, giăm 2 thun dong”.

Khua git gai wai lăng pơ ala mơnuih ƀôn sang Vương Đình Huệ biă ñu pơtă bruă pơpha gưl, pơpha bruă apăn kơ gưl tơring glông amăng ngă tui jơlan hơdră pơkă mơ̆ng lŏn ia. Khă hnun hai, mông mă yua tâ̆o hloh lăng glăi, pioh kơ pơdŏng jơlan hơdră hăng pơphun ngă tui pơ̆ anăp:

 “Tơdah pơpha gưl kơ gưl tơring glông mơ̆ ră anai ƀu ngă tui bôh tŭ yua mơtăm mơ̆ ăt ƀu dưi djru mơn kơ bruă čih pơkra bôh yôm jơlan hơdră pơ̆ anăp anai, ta amra pioh pơkă amăng Tơlơi pơtrun pơsit mơ̆ng Khua pơ ala mơnuih ƀôn sang hăng lơm pơsit hơdôm jơlan hơdră pơkă mơ̆ng lŏn ia rơwang pơ̆ anăp. Bơ̆ tơdah pơsir hơdôm tơlơi ƀơi anăp ƀơi anai ƀudah hmâo bơdjơ̆ nao lĕ sa hơdră pơtrun sit nik pơplih hơdră pơtrun pioh hơdôm ƀirô mơ̆ng Gong gai dêh čar lơm pơdŏng jơlan hơdră kah mơ̆ng yap nao. Tui anun amra pha ra hloh ƀơi abih bang hơdôm tơlơi pơkă, hơdră bruă”.

Amăng mông jơnum, Kơ-iăng Khua dêh čar ta Trần Lưu Quang brơi thâo: Gong gai amra ngă giong hơdôm bruă dô̆ glăi, djơ̆ tui tơlơi kiăng ba tơbiă pơ̆ anăp anai tañ hloh:

 “Sa lĕ čang rơmang ƀing gih djru dong kiăng pơđut mông jơnum tal anai ƀing ta hmâo dong sa hơdră bruă pơtlaih pioh jơlan hơdră anai ngă tui hăng amra truh akô̆ djơ̆ hrơi pơkă. Dua lĕ, čang rơmang pơkă pơtlaih brơi truh đut tơhnal, tơdah ƀu tui anun khom pơtô glăi lu dong hăng bŏng glăi lu tơlơi tơnap pơkon. Tlâo lĕ, tơlơi hơget akă rơđah ƀing ta khom tŭ ư hrŏm tơlơi pơkă pioh pơtlaih, ngă gal brơi hmâo tơlơi pơsit pơ̆ anăp anai pioh pơtlaih brơi dong kơ bruă ngă tui 3 Jơlan hơdră anai”.

Amăng mông jơnum tal 29, Jơnum min apăn bruă Khua pơ ala mơnuih ƀôn sang dêh čar ăt gum pơhiăp mơn kơ bruă pơhrua nao Kơčăo bruă mă yua prăk găp ƀrô ngăn drăp kơnuk kơna rơwang 2021-2025 mơ̆ng prăk pơhlôm hlâo hrŏm pioh mă yua hăng ngăn rơnoh pơđĭ dong prăk pơhrui, pơkrem mă yua ngăn drăp kơnuk kơna thun 2022 kơ hơdôm bruă mă, rơwang bruă tuh pơplai bruă hrŏm hăng pơhrua nao Kơčăo bruă tuh pơplai bruă hrŏm găp ƀrô kơ Grŭp apui lơtrik Việt Nam mơ̆ng prăk pơhlôm hlâo mơ̆ng Kơčăo bruă hrŏm găp ƀrô̆./.