Pơhiăp pơtum glăi ƀơi mông jơnum, jŭ glăi boh than hmư̆ hing amăng bruă pơplih phrâo pơkra hră pơ-ar amăng hrơi blan rơgao, Khua dêh čar Phạm Minh Chính lăi, pơtruh pơplih phrâo anom bruă ngă hră pơ-ar, akŏ pơdong anom bruă bơwih brơi mơnuih ƀôn sang, mă bruă rơgơi, tŭ yua lêng kơ hơmâo Ping gah, Kơnuk kơna pơsit jing bruă yôm phun, kơtưn pơ anăp amăng bruă akŏ pơdong Kơnuk kơna tui tơlơi phiăn xã hội chủ nghĩa.

Brơi thâo, blan 2 thun 2024, Anom črâo bruă amra pơtrun hơdră ngă bruă thun 2024 mơ̆ng Anom črâo bruă, Khua dêh čar Phạm Minh Chính kiăng ding kơna amăng Anom črâo bruă ngă hlao hơdôm bruă mă, pơtrut pơplih phrâo anom bruă ngă hră pơ-ar, biă ñu lĕ pơplih phrâo bruă ngă hră pơ-ar nao hrŏm hăng pơplih yua mrô, pơmut hră pơ-ar amăng plang internet, gum ngă truh kih djŏp bruă gơñăm nao, bruă pơđĭ kyar bơwih ƀong huă - mơnuiuh mơnam thun 2024 hăng hrơi blan pơ anăp.