Khua git gai pơ ala mơnuih ƀôn sang dêh čar ơi Vương Đình Huệ brơi thâo, lăi nao đah kơmơi, jar kmar kah hăng Việt Nam lêng kơ pơpŭ hăng tơlơi hiam klă hloh. Khua mir sir Hồ Chí Minh ăt pơsit tong, “Lon ia Việt Nam hiam yua đah kơmơi, mah čơđai hlăk ai kah hăng tha rơma, gir run pơjing kiăng jai hrơi hiam klă ƀiă dong”. Mơng đưm đă ră hlâo yơh, đah kơmơi lêng pơgôp yôm phăn amăng pơđĭ kyar hăng pơjing sang anŏ yâo mơ-ak; amăng thun blan hơpă thơ, mah pơpă tŭ mơn, đah kơmơi Việt Nam lêng pơdah pran hơdip “Sông kơtang, pơsăn drơi, gir run, thâo bruă” kar hăng 8 boh hră wa Hồ pơpŭ brơi. Hrŏm hăng pơđĭ kyar amăng tơlơi hơdip phrâo, hơdôm anŏ hiam anun tŏ tui pơđĭ kyar, hrưn đĭ jing hơnong pơkă lăp djơ̆ amăng tơlơi hơdip phrâo anun lĕ: Hur har, luă gŭ, thâo djr, thâo bruă.

Khua git gai pơ ala mơnuih ƀôn sang dêh čar lăi pơtong, hơdôm rơwang mă bruă amăng Ƀirô hăng mơng akŏ rơwang bruă tal 15 truh ră anai, khua pơ ala mơnuih ƀôn sang lêng kơ pel ĕp, pơplih phrâo ba glăi boh tŭ yua djop mơta. Amăng boh than dưi ngă anun, lêng hơmâo tơlơi gơgrong mơng đah kơmơi ngă khua pơ ala, ƀing adơi amai amăng anom bruă mơng Ƀirô khua pơ ala mơnuih ƀôn sang dêh čar. Sit biă ñu, rơwang mă bruă tal 15 hơmâo lu đah kơmơi ngă khua pơ ala mơnuih ƀôn sang hloh pơhmu hăng 10 rơwang giăm anai, dưm dưm 30,26%, mrô anai hơmâo Ƀirô khua pơ ala mơnuih ƀôn sang hơdôm boh dêh čar lăng yôm. Amăng anun, hơmâo 3 čô Ding kơna Ping gah dêh čar, Ding kơna jơnum min apăn bruă Khua pơ ala mơnuih ƀôn sang, 32 čô lĕ kơ-iăng khua, Ding kơna khul apăn bruă amăng khul djuai ania, amăng jơnum min, khua mua anom bruă khua pơ ala mơnuih ƀôn sang, khua mua hơdôm anom bruă gah jơnum min khua pơ ala mơnuih ƀôn sang.

Ƀing khua mua hơmâo gir kơsem min djop hră pơ-ar, thâo hluh rơđah, hơmâo tơlơi pơgôp hiăp tơpă, klă hloh amăng hơdôm tal jơnum, pơgôp brơi Ƀirô khua pơ ala mơnuih ƀôn sang, anom bruă khua pơ ala mơnuih ƀôn sang, anom bruă gah jơnum min; ngă tui tơlơi gal kiăng klă dong hơdră bruă bơkơnar. Grup đah kơmơi ngă khua pơ ala hơmâo pơphun lu bruă mă sit nik, jing anih tum pơƀut, lăp djơ̆ kiăng đah kơmơi pơbưp nao rai, pơlăi nao rai hơdôm boh thâo kah hăng pơhrăm mơng ƀing đah kơmơi amăng jar kmar amăng hơdôm mông jơnum djop bơnah hăng dua bơnah.

Pơ ala brơi Ƀirô khua pơ ala mơnuih ƀôn sang, ơi Vương Đình Huệ lăng yôm hơdôm tơlơi gir run, bruă mă truh kih mơng ƀing đah kơmơi ngă khua mua gah gơnong glông hăng khua mua mơng anom bruă khua pơ ala mơnuih ƀôn sang, anom bruă kơsem min čih pơkra tơlơi phiăn; pơsit tong khua pơ ala mơnuih ƀôn sang lêng kơ hruă kjăp tơlơi črâo trun mơng Ping gah bơdjơ̆ nao đah kơmơi.

“Rơkâo hruă kjăp tơlơi pơtrun mrô 11 mơng Ding jum kơđi čar amăng bruă đah kơmơi amăng thun blah pơtrut pơplih tuh tia pơkra ming, pơplih phrâo lŏn ia, tơlơi črâo trun mrô 21 mơng Khul čih pioh kiăng tŏ tui pơtrut kơtang bruă đah kơmơi amăng rơnuk phrâo; pok pơhai ngă klă bruă jao, hơdră bruă amăng ngă tui hơnong pơkă bơkơnar đah rơkơi đah kơmơi, pơgôp ngă pơgiong hơnong pơkă pơđĭ kyar hơđong kjăp truh thun 2030, ngă ba glăi tŭ yua hơdră bruă lŏn ia amăng bơkơnar đah rơkơi đah kơmơi rơwang thun 2021-2030. Mah bruă bơkơnar truh ră anai ăt ngă klă, samơ̆ ƀing ta kiăng tŏ tui hruă kjăp. Kâo rơkâo djop gưl, djop anom bruă, ƀing khua mua lêng kơ hruă kjăp mơng tơlơi pơmĭn truh pơ bruă mă, amăng ngă tui bruă jao dong”.

Khua git gai pơ ala mơnuih ƀôn sang brơi thâo, pơ anăp anai Ping gah grup khua pơ ala git gai čih pơkra akŏ bruă, đĭ tui mrô đah kơmơi ngă khua pơ ala mơnuih ƀôn sang. Truh ră anai, Ƀirô khua pơ ala mơnuih ƀôn sang hơmâo ngă klă bruă ruah dưm dăp khua mua pơ ala mơnuih ƀôn sang, ƀing apăn bruă đah kơmơi djop gưl hăng mrô lu hloh; tŏ tui ngă ba glăi tŭ yua bruă mă mơng khua mua đah kơmơi. Khua git gai pơ ala mơnuih ƀôn sang ăt rơkâo kiăng tŏ tui gum hrŏm hăng djop khul grup kiăng kơtưn pơphun lu dong hơdôm bruă pel ĕp, hyu čuă lăng, kơsem min, krăo lăng…Hrŏm hăng anun, Ping gah grup khua pơ ala mơnuih ƀôn sang ăt kiăng đing nao bruă ruah mơnuih apăn bruă đah kơmơi, bơwih brơi tơlơi hơdip kơ đah kơmơi, amăng anun hơmâo hơdră bruă apah prăk, hơmâo akŏ bruă klă ƀiă dong, ba glăi tŭ yua mơng grup khua pơ ala mơnuih ƀôn sang đah kơmơi.

Khua git gai pơ ala mơnuih ƀôn sang đăo gơnang, ƀing đah kơmơi ngă khua pơ ala mơnuih ƀôn sang amra tŏ tui hơdôm boh than dưi ngă, hơmâo lu tơlơi gum pơgôp ƀiă dong amăng bruă mă, gum hrŏm ngă truh kih djop mơta kiăng pơdah gru grua hing ang hăng anăp nao tal hơdor glăi 80 thun Ƀirô khua pơ ala mơnuih ƀôn sang dêh čar Việt Nam./.