Đĭ pơhiăp ƀơi kông ti JA Solar Việt Nam, Khua git gai pơ ala mơnuih ƀôn sang dêh čar Vương Đình Huệ pơsit tong, Ƀirô Khua pơ ala mơnuih ƀôn sang, kơnuk kơna Việt Nam ƀuăn amra pơplih bruă tuh pơ alin, bơwih ƀong sĭ mơdrô brơi hơdôm anom bruă amăng djop anih anom bơwih ƀong, amăng anun hơmâo hơdôm anom bruă tuh pơ alin mơng tač rơngiao, pơgiong hơdră bruă, tơlơi phiăn.

Khua git gai pơ ala mơnuih ƀôn sang dêh čar čang rơmang kông ti JA Solar Việt Nam ba jơlan hlâo amăng bruă pơjing tơlơi bơwih ƀong huă; pơlir hơbit hơdôm anom bơwih ƀong sĭ mơdrô mơng Việt Nam kiăng hơmâo lu gơnam tuh tia pơkra pơjing, hơmâo rơnoh yôm. Ƀrô tal anai, Khua git gai pơ ala mơnuih ƀôn sang dêh čar Vương Đình Huệ hrŏm hăng ding kơna amăng grup hyu mă bruă hơmâo ƀơk gơnam brơi kông ñơn ƀơi kông ti JA Solar; ƀơk gơnam brơi sang anŏ tơnap tap, sang anŏ tui hơdră djru hluai tui Jơnum min djop djuai ania mơnuih mơnam Việt Nam tơring glông Việt Yên.