Ƀơi Gia Lai, Khua git gai pơ ala mơnuih ƀôn sang Vương Đình Huệ bơni biă kơ tơlơi gir run pơđĭ kyar bơwih ƀong huă - mơnuih mơnam mơ̆ng tơring čar, pơđĭ tui tơlơi hơdip mơda, prăk kăk kơ mơnuih ƀôn sang. biă ñu amăng bruă gru grua boh thâo - mơnuih mơnam hơmâo lu tơlơi pơplih klă, pơtrut đĭ hơdôm gru grua hiam mơ̆ng djŏp djuai ania tơring čar Gia Lai; anŏ klă bruă pơtô hrăm ia jrao. Hơdôm jơlan hơdră djru ba tơlơi hơdip mơnuih ƀôn sang, lŏm lui rin rơpa, hrŏ trun sang anŏ rin, djru bruă mă hơmâo lăng ba dưm kơnar, ƀơi abih bang; mrô sang anŏ rin hrŏ trun dŏ glăi 8,11%. Pơƀut git gai djŏp gưl, anom bruă, plơi pla ngă klă bruă djru tơlơi hơdip bơwih ƀong mơnuih ƀôn sang, lăng ba Mơnuih ƀôn sang amăng hrơi tê̆t, pơhlôm abih bang mơnuih lêng kơ hơmâo čơkă Tê̆t, ngui ngor bơyan bơnga. Anai jing tơlơi gir lăp djă pioh mơ̆ng tơring čar.

Khua git gai pơ ala mơnuih ƀôn sang ăt lăi mơn, yua hơmâo klin Covid-19, anun jing ăt dŏ hơmâo lu mơn sang anŏ tơnap tap, kông ñơn kơƀah bruă mă. Ƀơi anăp tơlơi anai, Ping gah, Kơnuk kơna ta ăt lăng ba kơ mơnuih ƀôn sang hrăng bruă pơtrun hră pơ-ar djru ba klă hloh. Biă ñu lĕ khul khua gum bruă ping gah hơmâo Tơlơi pơčrâo trun mrô 26 kơ lăng ba hrơi Tê̆t kơ sang anŏ rin.

“Pơgôp angin jing kơthel, pran jua “pap kơ arăng kar hăng pap kơ drơi pô mơn” mơ̆ng djuai ania Việt Nam jing hơmâo rŏng lŏn tơnah pơpŭ biă, jing bruă ngă na nao, biă ñu amăng hrơi thun phrâo, tê̆t truh. Yua Tê̆t kơ yôm hloh, ƀu hơmâo hrơi pơpă ôh yôm hloh kơ hrơi Tê̆t. Ƀing khua mơ̆ng Ping gah, Kơnuk kơna lêng kơ djru ba klă hloh tơdah dưi kiăng abih bang mơnuih, abih bang sang anŏ, hlơi hlơi lêng kơ dưi čơkă Tê̆t mơ-ak. Ƀing gơmơi lăng yôm, laih anun bơni biă mă kơ Ping gah, anom bruă kơđi čar tơring čar Gia Lai mah dŏ kơƀah lu, jing tơring čar rin, samơ̆ hơmâo lăng ba na nao tơlơi hơdip mơnuih ƀôn sang. Ƀing gơmơi kiăng anom bruă kơđi čar ƀing ta lăng ba hloh dong, hrŏm hăng anom bơwih ƀong, ƀing čơmah juăt djru mơnuih mơnam djru ba hloh kơ mơnuih ƀôn sang laih anun klă hloh lĕ djru pơđĭ kyar bơwih ƀong ngă hiư̆m pă kiăng neh met wa tơklaih hĭ mơ̆ng rin rơpa. Lăng ba kiăng pơđĭ tui mrô mơnuih blơi hră pơhlôm nua mơnuih mơnam, pơhlôm nua ia jrao”.

Amăng tal anai, Khua git gai pơ ala mơnuih ƀôn sang dêh čar Vương Đình Huệ hăng grup khua mua hơmâo brơi 400 anung gơnam kơ hơdôm boh sang anŏ hơmâo anăn kơnuk kơna djru, sang anŏ hơkrŭ lŏn ia, ƀing khua, ling tơhan blah ngă, sang anŏ rin, mơnuih djơ̆ jrao hret, kông ñơn, mơnuih mă bruă sang anŏ tơnap tap ƀơi tơring čar; iâu pơthưr mơnuih tơpuôl gum djru brơi 200 boh sang dŏ gum pơgôp djuai ania, hơmâo nua 10 klai prăk kơ Jơnum min djŏp djuai ania mơnuih mơnam tơring čar Gia Lai. Ăt amăng tal nao čuă hăng ngă bruă ƀơi Gia Lai mơn, Khua git gai pơ ala mơnuih ƀôn sang Vương Đình Huệ ƀuh ƀơi anăp bruă Sang bruă prăk TMCP Công thương Việt Nam (Vietinbank) brơi 10 klai prăk kơ tơring čar Gia Lai djru man pơdong Anom bruă tơhan kông an pơ să guai dêh čar.

Ăt amăng tal nao mă bruă pơ kual Dap Kơdư mơn, Khua git gai pơ ala mơnuih ƀôn sang Vương Đình Huệ jao bruă kơ ơi Bùi Văn Cường, Khua čih pioh hră pơ-ar, Khua anom bruă pơ ala mơnuih ƀôn sang dêh čar, mơ-it 300 anung gơnam tê̆t kơ tơring čar Dak Lăk. Tui hăng tơlơi pơčrâo trun mơ̆ng Khul khua gum bruă ping gah hăng tơlơi jao bruă mơ̆ng Ding jum kơđi čar, Khua git gai pơ ala mơnuih ƀôn sang dêh čar hơmâo brơi gơnam hăng bơni hơ-ơč Tê̆t ƀơi 3 boh tơring čar anun lĕ: Bạc Liêu, Gia Lai, Yên Bái. Khă hnun hai, hăng pran jua khăp pap mơ̆ng ñu, Khua git gai pơ ala mơnuih ƀôn sang hơmâo iâu pơthưr gum djru thim gơnam djru kơ hơdôm boh sang anŏ kơnuk kơna djru, mơnuih ƀôn sang tơnap tap pơ hơdôm boh tơring dong. Kơnong ƀơi Dak Lăk, Khua git gai pơ ala mơnuih ƀôn sang hơmâo mơ-it nao 300 anung gơnam (rim anung hơmâo nua 1 klăk 300 rơbâo) jao kơ khua mua tơring čar brơi kơ mơnuih ƀôn sang amăng hrơi Tê̆t Giáp Thìn truh. Khua git gai pơ ala mơnuih ƀôn sang dêh čar Vương Đìng Huệ mơ-it tơlơi bơni hơ-ơč hiam klă kơ Ping gah, gong gai, mơnuih ƀôn sang djŏp djuai ania tơring čar Dak Lăk ƀrô thun phrâo truh. Ơi Bùi Văn Cường brơi thâo:

“Ơi Vương Đình Huệ, Khua git gai pơ al mơnuih ƀôn sang dêh čar, Ding kơna ding jum kơđi čar jao kơ kâo laih anun mơ-it tơlơi bơni hơ-ơč hiam klă kơ ping gah, gong gai mơnuih ƀôn sang tơring čar Dak Lăk. Bơni hơ-ơč kơ thun phrâo hiam drơi jăn pran jua, yâo mơ-ak, truh kih. Bơni hơ-ơč kơ tơring čar pơđĭ kyar bơwih ƀong huă - mơnuih mơnam hloh dong, pơhlôm kjăp bruă pơgang rơnuk rơnua lŏn ia, akŏ pơdong ping gah akŏ pơdong anom bruă kơđi čar tŭ yua”.

Tui hăng ơi Nguyễn Đình Trung, Ding kơna ping gah, Khua git gai Ping gah tơring čar Dak Lăk: Tê̆t thun anai, tơring čar Dak Lăk jak iâu gum djru hơmâo rơbêh 80 klai prăk pioh lăng ba Tê̆t kơ sang anŏ hơmâo anăn kơnuk kơna djru, mơnuih ƀôn sang tơnap tap. Amăng hơdôm hrơi rơgao, khul grup mơ̆ng tơring čar ăt nao pơ kual ataih, asuek či brơi gơnam Tê̆t hăng čang rơmang ƀu hơmâo pô hlơi kơƀah asơi huă, ƀu pioh glăi pô hlơi gah tlôn./.