Ƀơi tơring čar Bạc Liêu, Khua git gai wai lăng pơ ala mơnuih ƀôn sang dêh čar ta Vương Đình Huệ hmâo nao čuă, ƀơk gơnam tam brơi rơbêh kơ 360 bôh sang anô̆ gah hơdră bruă, mơnuih ngă hơkrŭ đưm, sang anô̆ ƀun rin, mơnuih djơ̆ jrao dioxin, mơnuih mă bruă kơ sang bruă, mơnuih mă bruă hmâo tơlơi hơdip tơnap tap ƀuh ƀô̆ ƀơi Sang bôh thâo tơring čar Bạc Liêu. Khua git gai wai lăng pơ ala mơnuih ƀôn sang dêh čar ta Vương Đình Huệ lăi rơđah, ngă tui phiăn juăt gum djru tơdruă klă hiam mơ̆ng djuai ania na nao bơwih bởi kơ mơnuih ƀôn sang, biă ñu hlâo kơ rim tal Tết truh bơyan bơnga rai, Ping gah, Kơnuk kơna, Jơnum min djop djuai ania mơnuih mơnam dêh čar Việt Nam hăng hơdôm khul grŭp lăng ba na nao, gir run pioh djop ngăn rơnoh, pơphun lu bruă mă sit nik, rơđah bơwih brơi kơ hơdôm bôh sang anô̆ gah hơdră bruă, mơnuih djru ngă hơkrŭ đưm, sang anô̆ ƀun rin, hơdôm mơnuih gah hơdră bruă, mơnuih mă bruă kơ sang bruă, mơnuih mă bruă hmâo tơlơi hơdip mơda tơnap tap... pioh djop mơnuih, djop sang leng kơ dưi čơkă mơ-ak bơyan bơnga, čơkă Tết.

Pơ̆ anăp anai, Khua git gai wai lăng pơ ala mơnuih ƀôn sang dêh čar ta rơkâo hơdôm gưl ping gah, gong gai, Jơnum min djop djuai ania mơnuih mơnam dêh čar hăng hơdôm khul grŭp amăng đơ đam tơring čar lăi pơthâo abih, pok pơhai ngă tui klă Tơlơi črâo ba mrô 26 mơ̆ng Grŭp git gai ping gah kơ pơphun Tết Giáp Thìn thun 2024:

 “Prăp lui hơdôm tơlơi klă hloh pioh kơ mơnuih ƀôn sang mơ-ak bơyan bơnga, čơkă Tết mơ-ak klă, tâ̆o yâo, pơhlôm, pơkrem. Lăng ba dong, bơwih brơi kơ hơdôm bôh sang anô̆ gah hơdră bruă, mơnuih djru ngă hơkrŭ đưm, sang anô̆ ƀun rin, mơnuih djơ̆ jrao dioxin, mơnuih mă bruă kơ sang bruă, mơnuih mă bruă hmâo tơlơi hơdip tơnap tap... Hrŏm hăng anun lăi pơthâo nao rai na nao, hmư̆ lăng hơdôm tơlơi gum pơhiăp mơ̆ng mơnuih ƀôn sang, mơnuih mă bruă, kơsem min, pơjing hơdôm hơdră, hơdră bruă gum djru, ngă gal brơi pioh rim sang anô̆, rim mơnuih pơđĭ kyar bơwih ƀong huă, hrưn đĭ tơtlaih mơ̆ng ƀun rin sui thun. Tơdah ƀu dưi tơtlaih mơ̆ng ƀun rin thơ amra hơdai nao pơgang ba mơnuih mơnam pioh djru kơ mơnuih ƀôn sang. Ping gah kơnuk kơna hăng drơi pô kâo čang rơmang hơdôm bôh sang anô̆ gah hơdră bruă, sang anô̆ ƀun rin, neh wa hmâo tơlơi hơdip mơda tơnap gir run dong, hrưn đĭ, mă bruă klă, bơwih ƀong huă, amăng ƀrư̆ pơdŏng tơlơi hơdip mơda trơi pơđao, yâo mơ-ak. Ƀing adơi ayong mă bruă kơ sang bruă, mơnuih mă bruă gum djru hăng hơdôm tơlơi tơnap hrŏm mơ̆ng lŏn ia, plơi pla hăng anom bơwih ƀong; ngă tui tơpă hơdôm hơdră pơtrun mơ̆ng Ping gah, hơdră bruă, tơlơi phiăn mơ̆ng Kơnuk kơna, djru pơsir tơlơi rô nao rai mă bruă lăp djơ̆ hơđong, pơplih phrâo amăng anom bơwih ƀong, gum hrŏm hăng anom bơwih ƀong hơkrŭ glăi bruă bơwih ƀong huă”.

Tal anai Jơnum min djop djuai ania mơnuih mơnam dêh čar Việt Nam, Khul mut phung Việt Nam, Khul ia jrao kyâo bơrơkal mriah Việt Nam ƀơk 600 anung gơnam kơ hơdôm bôh sang anô̆ gah hơdră bruă, mơnuih djru ngă hơkrŭ đưm, sang anô̆ ƀun rin, mơnuih djơ̆ jrao dioxin, mơnuih mă bruă kơ sang bruă, mơnuih mă bruă hmâo tơlơi hơdip tơnap tap ƀơi tơring čar Bạc Liêu.

Ăt amăng rơwang hrơi tơjuh rơgao mơn, ƀơi Kual sang măi Suối Dầu, tơring glông Cam Lâm, tơring čar Khánh Hòa, Kơ-iăng Khua git gai wai lăng pơ ala mơnuih ƀôn sang dêh čar ta Nguyễn Khắc Định hrŏm hăng Khul khua hyu mă bruă nao čuă anih pơphun “Tết tum jơngum – Bơyan bơnga gum djru” hăng ƀơk gơnam tam kơ mơnuih mă bruă ƀơi tơring čar Khánh Hòa. Ăt tal anai mơn hmâo pơphun Jơlan hơdră Sang Čơ Tết Khul mut phung 2024 ƀơi 5 bôh anih anom amăng tơring čar. Ƀơi 5 anih anom anai, hmâo 10 čơgăn pơgăn gơnam brơi đôč, năng ai ñu 200 čơgăn gơnam sĭ hrŏ trun nuă hơdôm mơta gơnam kiăng yua hloh kơ mơnuih amăng khul, mơnuih mă bruă. Rơngiao kơ anun, Khul mut phung tơring čar Khánh Hòa dô̆ gum hrŏm hăng hơdôm bôh anom pơphun pel ĕp tơlơi suaih pral, lăi pơthâo tơlơi phiăn kơ hră pơgang kơ mơnuih mă bruă. Tết Giáp Thìn 2024, Khul mut phung hơdôm gưl ƀơi tơring čar Khánh Hòa hmâo pioh laih 50 klai prăk pioh tơña bla, bơwih brơi Tết kơ mơnuih mă bruă.

Ƀơi anih pơphun “Tết tum jơngum – Bơyan bơnga gum djru” hăng sang čơ mơ̆ng kual sang măi Suối Dầu, Kơ-iăng Khua git gai wai lăng pơ ala mơnuih ƀôn sang dêh čar ta Nguyễn Khắc Định hăng khua Phun akha Khul mut phung Việt Nam, Khua tơring čar Khánh Hòa ƀơk 400 anung gơnam kơ mơnuih mă bruă. Ră ruai hăng mơnuih mă bruă gah anom bơwih ƀong ƀơi kual Sang măi Suối Dầu, hơdôm ƀut sang măi amăng tơring čar Khánh Hòa, Kơ-iăng Khua git gai wai lăng pơ ala mơnuih ƀôn sang dêh čar ta Nguyễn Khắc Định mơ-ĭt tơlơi hơ-ưč hmưi Tết, tơña bla mơnuih mă bruă, hrŏm hăng anun čang rơmang hơdôm bôh sang anô̆ gir run mă bruă dong, yak rơgao tơlơi tơnap, hmâo sa tơlơi hơdip klă hloh. Kơ-iăng Khua git gai wai lăng pơ ala mơnuih ƀôn sang dêh čar ta Nguyễn Khắc Định pơtŏng sit:

 “Khua git gai Ping gah, Kơnuk kơna, gong gai tơring čar Khánh Hòa hmư̆ tui na nao, thâo hluh, lăng ba tơlơi hơdip mơda mơnuih mă bruă. Hăng čang rơmang adơi ayong, adơi amai gum hrŏm hơbit na nao, hur har mă bruă bơwih ƀong huă pơdŏng Kual sang măi, pơdŏng tơring čar Khánh Hòa hăng gum hơgôp hrŏm bôh than hrŏm mơ̆ng đơ đam dêh čar. Rơkâo hơ-ưč hmưi rim sang anô̆ mơnuih mă bruă kơ sang măi ƀơi tơring čar Khánh Hòa čơkă Tết tui phiăn juăt Giáp Thìn pơđao pran jua, tum jơngum, bă kơ pran jua kiăng khăp hăng yâo mơ-ak”./.