Tui tơlơi lăi pơthâo glăi hơdră bruă mơnuih mơnam mơ̆ng Khua pơ ala mơnuih ƀôn sang blan 10 hăng 11 thun anai, mơnuih pơ ala hăng mơnuih ƀôn sang đơ đam dêh čar ta pơdah pran jua đăo kơnang hăng tơlơi git gai mơ̆ng Ping gah, pơsit yôm hơdră pơtrun pơplih phrâo, dưm dăp pơphun jơlan mă bruă mơ̆ng abih bang bruă kơđi čar rơbô̆t, mă bruă tŭ yua, ba glăi bôh tơhnal. Bruă pơplih phrâo dong, dưm dăp pơphun bruă mă mơ̆ng abih bang glông bruă kơđi čar lĕ kiăng biă amăng rơnuk anai, mơnuih pơ ala hăng mơnuih ƀôn sang čang rơmang bruă ngă tui hơdră pơtrun anun amra pơjing pran pơtrut phrâo kơ bruă pơgang, pơdŏng hăng pơđĭ kyar lŏn ia, pơjing pran kưl đĭ pơplih phrâo, ngă giong abih bang hơdôm tơhnal pơkă amăng Tơlơi pơtrun pơsit Jơnum khua pơ ala đơ đam dêh čar tal 13 mơ̆ng Ping gah hmâo ba tơbiă. Hrŏm hăng anun, mơnuih pơ ala hăng mơnuih ƀôn sang čang rơmang lơm ngă tui hơdră pơtrun dưm dăp glông jơlan mă bruă rơbô̆t, mă bruă tŭ yua, ba glăi bôh tơhnal, kiăng đing nao pơhlôm bôh tŭ yua kơ mơnuih apăn bruă, mơnuih mă bruă. Amăng mông jơnum, Khua Jơnum min pơgang lŏn ia hăng rơnuk rơnua plơi pla Lê Tấn Tới lăi rơđah:

 “Rơgao kơ bưp mơnuih pơ ala phrâo rơgao. Kâo bưp mơnuih pơ ala kơ tơring čar Long An lăi ha jăn, kual lŏn dăo ia krông Cửu Long lăi hrŏm lĕ, anô̆ ƀuh rơđah hloh mơ̆ng mơnuih ƀôn sang tơring čar Long An lĕ dŏng yua biă kơ bruă ngă rơbô̆t glông jơlan mă bruă tui Tơlơi pơtrun pơsit 18 hmâo bơdjơ̆ nao amăng mơnuih mơnam prong biă. Lu ñu lĕ mơnuih ƀôn sang dŏng yua”.

Amăng mông bưp mơnuih pơ ala tơdơi kơ tal jơnum lok 8, Khua pơ ala mơnuih ƀôn sang dêh čar ta tal 15, mơnuih pơ ala kơ tơring čar Dak Lak ăt pơdah pran jua đăo kơnang, anăp nao pran jua klah čun ngă tui Tơlơi pơtrun mrô 18 mơ̆ng dêh čar kơ “Pơplih phrâo dong, dưm dăp, pơphun glông jơlan mă bruă amăng abih bang bruă kơđi čar”. Anai sit nik lĕ bruă hơkrŭ ngă rơbô̆t glông jơlan mă bruă mơ̆ng abih bang bruă kơđi čar, dưi hmâo mơnuih apăn bruă, mơnuih ping gah, mơnuih ƀôn sang đing nao. Mơnuih ƀôn sang Vũ Mạnh Khuông, ƀơi phường Thành Công, plơi prong Buôn Ma Thuột pơhiăp:

 “Dưm dăp glăi glông jơlan mă bruă mơ̆ng dêh čar truh plơi pla djơ̆ hăng pran jua mơnuih ƀôn sang, mơnuih apăn bruă ăt kah hăng mơnuih ƀôn sang đăo kơnang kơ Ping gah, Kơnuk kơna ngă tui dưm dăp glăi hơdôm ding jum, gơnong bruă dêh čar pioh pơđĭ dlông hơdră pơtrun mơ̆ng Ping gah lĕ ha sa tŭ yua ba glăi bôh tơhnal. Čang rơmang pơ̆ anăp anai Ping gah, Kơnuk kơna ngă tui djơ̆ pioh ngă hiưm hơpă djơ̆ tui tơlơi čang rơmang mơ̆ng mơnuih ƀôn sang”.

Amăng mông jơnum, Jơnum min apăn bruă Khua pơ ala mơnuih ƀôn sang dêh čar ta rơkâo ngă klă hloh dong bruă lăi pơhing. Yua kơ bruă dưm dăp bơdjơ̆ nao ană mơnuih, bơdjơ̆ nao tơlơi dưi yua mơ̆ng ană mơnuih. Khom pơkă lăng hmâo tơlơi amra hmâo, tơlơi tơnap hăng hơdôm jơlan gah pơsir pioh ngă tui truh kih hơdôm hơdră pơtrun dưm dăp pơphun glông jơlan mă bruă kơđi čar rơbô̆t, mă bruă tŭ yua, ba glăi bôh tơhnal. Kơ-iăng Khua git gai pơ ala mơnuih ƀôn sang Nguyễn Thị Thanh rơkâo lăng yôm hơdră pơkă hơdră bruă lăp djơ̆, gêh gal kơ mơnuih apăn bruă măng bruă dưm dăp, ngă kơjăp bruă ruah mơnuih mă bruă, dăp glăi mơnuih apăn bruă, mơnuih mă bruă:

 “Ƀing gơmơi pơmin khom hmâo hơdôm hơdră kơtang hăng thâo hloh bơhmu hăng hơdôm hơdră pơkă hlâo adih, pioh dưi pơsur mơnuih dô̆ 2 thun, 3 thun, 4 thun amra pơdơi brơi mơnuih apăn bruă hlăk ai, mơnuih apăn bruă dưi pơtô juăt djă pioh amăng glông jơlan mă bruă. Tơdah ƀing ta ƀu hmâo hơdră bruă klă thơ ƀu dưi djă pioh mơnuih apăn bruă mơ̆ ƀing ta khom djă pioh hăng ƀu dưi ba tơbiă ƀing mơnuih apăn bruă mơ̆ ƀing ta kiăng hơdai nao bruă mă pơkon”.

 Pơhiăp amăng mông jơnum, Khua git gai pơ ala mơnuih ƀôn sang dêh čar ta ơi Trần Thanh Mẫn rơkâo tañ ngă giong hơdôm jơlan gah, akô̆ bruă, pơplih pơkra hơdôm tơlơi phiăn bơdjơ̆ nao, pơphun pơplih phrâo, dưm dăp glông jơlan mă bruă rơbô̆t, mă bruă tŭ yua, ba glăi bôh tơhnal. Khua git gai pơ ala mnuih ƀôn sang rơkâo pơsir pơƀut tơlơi ƀom kiơng sui hrơi; črâo rơđah hơdôm ƀirô hmâo bruă gơgrong, hmâo tơlơi dưi pơsir hơdôm tơlơi ƀom kiơng lu mơnuih; biă ñu khom kiăo tui kơjăp anih anom pioh pơsir hluh gah, djơ̆ phiăn, pơsir pơđut mơ̆ng plơi pla:

 “Pel ĕp kiăng pơsir hluh gah. Tơdah arăng ƀom kiơng sit lĕ jak iâo pơpha mơta tơlơi, pơblang brơi. Dêh čar pơsir tơlơi hơget, anih anom khom pơsir tơlơi hơget pioh pơsir pơđut hĭ ñu. Samơ̆ hrŏm hăng anun khom thâo hluh hơdôm mơnuih hơpă ƀom kiơng, pô yua ƀing sat pơsur pơtrut pran jua …thơ khom pơsir”.

 Ăt amăng mông jơnum tal anai mơn, Jơnum min apăn bruă Khua pơ ala mơnuih ƀôn sang dêh čar hmâo pơsit pel ĕp Tơlơi pơtrun pơsit kơ bruă dưm dăp, pơjing anom bruă čar gưl tơring glông, gưl să rơwang 2023-2025 mơ̆ng tơring čar Ninh Bình./.