Kiăng pơhlôm abih bang lêng kơ ƀong Tê̆t, hrơi Tê̆t ngă yang thun phrâo Giáp Thìn thun anai, tơring čar Kon Tum pơsit mă yua rơbêh 8 klai prăk djru ba giăm 16.800 boh sang anŏ rin hăng giăm rin. Tui anun rơnoh djru kơ rim boh sang anŏ rin lĕ 600 rơbâo prăk hăng sang anŏ giăm rin lĕ 300 rơbâo prăk.

Rơngiao kơ anun, Khul pơlir hơbit mơnuih mă bruă tơring čar Kon Tum ăt brơi 2.700 anung gơnam, rim anung hơmâo 500 rơbâo prăk kơ ding kơna amăng khul, mơnuih mă bruă tơnap tap. Hrŏm hăng anun amăng hơdôm hrơi anai, ƀơi tơring čar Kon Tum, lu bruă lăng ba hrơi tê̆t kơ mơnuih ƀôn sang, biă ñu pơ kual ataih, asuek, pơ guai dêh čar ăt glăk hơmâo djŏp gong gai, khul grup gir ngă mơn.