Pơphun amăng hrơi mông hơdôm hrơi akŏ blan thun phrâo 2024, Tê̆t ngă yang thun phrâo glăk truh, Jơnum ƀu tui tơđar lok 5 mơ̆ng Khua pơ ala mơnuih ƀôn sang brơi ƀuh rơđah pran jua gir run mơ̆ng ƀing khua pơ ala amăng bruă gum hrŏm hăng Kơnuk kơna, pơsir hĭ mơtăm hơdôm tơlơi gun tơlơi tơnap gah tơlơi phiăn djru ba Tơlơi phiăn tŭ yua hloh; pơtrut rŭ glăi rơnoh đĭ kyar amăng thun 2024 ăt kah hăng hơdôm thun pơ anăp dong. Ƀơi sang jơnum, ƀing khua pơƀuh rơđah tơlơi pơmin pran jua ngă bruă, pơgôp hiăp đah mơ̆ng tañ hơmâo tơlơi pơtrun yôm pơsir hĭ tơlơi tơnap, tơlơi ngă gun gah tơlơi phiăn. Khua pơ ala Bùi Hoài Sơn, Grup khua mơ̆ng Hà Nội brơi thâo:“Ƀing ta hơmâo pơphun 5 wơ̆t jơnum ƀu tui tơđar. Tơdơi kơ hơdôm tơlơi pơsit hơmâo pơtrun rai lĕ ƀing ta khŏm pơphun ngă khut khăt mơtăm kiăng pran jua mơ̆ng khua mua pơ ala mơnuih ƀôn sang - Pran jua khut khăt, prăp rơmet hlâo, tañ mơ̆ng ataih dưi djơ̆ hăng tơlơi kiăng; lăi glăi hơdôm tơlơi tơnap tap amăng bruă mă mơ̆ng Kơnuk kơna. Tơdah ƀing ta dưi ngă lĕ hơdôm tơlơi gir run mơ̆ng ƀing khua pơ ala amra hơmâo bang hyu amăng tơlơi hơdip mơnuih tơpuôl”.

2 tơlơi phiăn hăng 2 Tơlơi pơsit hơmâo khua mua pơ ala pơsit ƀơi mông jơnum ƀu tui tơđar lok 5. Amăng anun, biă ñu lăp đing nao, ƀing khua pơ ala sit nik pơsit Tơlơi phiăn lŏn tơnah (pơkra glăi) hăng Tơlơi phiăn anom bruă brơi čan prăk (pơkra glăi), hăng lu khua mua tŭ ư.

Tơlơi phiăn lŏn tơnah (pơkra glăi) hơmâo pơsit amra pơhlôm bruă pơkă nua lŏn tơnah kiăo tui nua sit ƀơi anih sĭ mơdrô, pơhlôm abih bang mă yua lŏn tơnah dưm kơnar, ăt kah hăng tơlơi dưi wai lăng lŏn tơnah mơ̆ng mơnuih ƀôn sang, anom bơwih ƀong hơmâo pơgang. Mơ̆ng anun pơtrut tui anŏ yôm amăng tơlơi hơdip ăt kah hăng pơđĭ kyar bơwih ƀong huă mơ̆ng mơnuih ƀôn sang, hăng anom bơwih ƀong klă hloh. tơlơi kiăng lĕ Kơnuk kơna kiăng ječ ameč čih pơkra giong hơdôm hră pơ-ar pơtô ba rơđah rơđông tui tơlơi kiăng mơ̆ng Tơlơi phiăn đah mơ̆ng pơhlôm pơsir hĭ hơdôm tơlơi gun gah lŏn tơnah. Tơdơi kơ Tơlơi phiăn lŏn tơnah (pơkra glăi) hơmâo pơsit, Kơ-iăng khua ding jum Kông ngăn lŏn tơnah hăng Ayuh hyiăng Lê Minh Ngân brơi thâo:“Tâ̆o hloh kơ bruă pơphun ngă giong hlao hơdôm Tơlơi pơsit pơtô ba mă yua Tơlơi phiăn Lŏn tơnah hăng tơlơi pơkă gah tơlơi phiăn mơ̆ gah tơlơi dưi mơ̆ng Ding jum lĕ gơmơi amra ječ ameč, iâu pơthưr abih bang anom bruă, pơtrut tui pran jua mơ̆ng Tơlơi phiăn lŏn tơnah či pơphô kơ Kơnuk kơna, čih pơkra tañ hơdôm Tơlơi pơtrun pơtô ba Tơlơi phiăn lŏn tơnah kiăng lơ̆m Tơlơi phiăn dưi mă yua lĕ pơhlôm abih bang dưm kơnar, hơdôm hră pơ-ar pơtô ba bruă mă yua, hla tui, kiăng sit nik ba Tơlơi phiăn lŏn tơnah mut amăng tơlơi hơdip”.

Hăng tơlơi phiăn hơdôm anom bruă brơi čan prăk (pơkra glăi) hơmâo pơsit amra pơsir hĭ hơdôm tơlơi tơnap, tơlơi gun pơsir hĭ hnưh ƀu anăm tla, hơdôm mơta hnưh bơdjơ̆ nao trái phiếu; kiăng huăi bơrơkua, ngă rơđah rơđông hloh, bĕ hĭ ngă rung răng kơ sang bruă prăk, djru anih bơwih ƀong sĭ mơdrô prăk kăk mă yua rơđah rơđông, tŭ yua, hơđong kjăp. Pô pơ ala Hoàng Văn Cường, Ding kơna Jơnum min Prăk kăk mơ̆ng Ƀirô khua pơ ala mơnuih ƀôn sang čang rơmang:“Tơlơi phiăn hơdôm anom bruă brơi čan prăk (pơkra glăi) jing sa Tơlơi phiăn lăi nao dlăm biă kơ bruă prăk kăk. Čang rơmang mơ̆ng ƀing ta kơ tơlơi pơplih mơ̆ng sang bruă prăk mơ̆ng anom bruă brơi čan jing prong biă, biă ñu lĕ bơdjơ̆ nao bruă mă yua boh thâo măi mok wai lăng sang bruă prăk kah hăng: sem lăng hnưh tla kaih, ƀu anăm tla, wai lăng bruă bơrơkua, yôm hloh lĕ khŏm dưi wai lăng abih bang prăk mut tơbiă”.

Ƀơi mông jơnum ƀu tui tơđar lok 5, Khua pơ ala mơnuih ƀôn sang dêh čar ăt pơsit 8 tơlơi pơkă phara hơjăn pioh ngă jơlan hơdră dêh čar pơtrun. Anai jing tơlơi pơkă phara hơjăn lăp djơ̆ pơsir hĭ tơlơi tơnap, pơtrut tañ bruă mă, pơhlôm ngă tŭ yua 3 jơlan hơdră dêh čar pơtrun. Tơlơi anai yôm biă mă kơ bruă man pơdong plơi pla phrâo, hrŏ trun hơđong sang anŏ rin, pơđĭ kyar tơlơi bơwih ƀong - mơnuih mơnam kual mơnuih ƀôn sang djuai ƀiă hăng čư̆ siăng. Pô pơ ala Nguyễn Quốc Luận, Grup mơ̆ng Yên Bái lăi:“Prăk brơi kơ tơring glông hlao mơtăm. Ngă tui anun amra djru hơdôm boh tơring, biă ñu tơring glông dưi pơsir hĭ lu tơlơi tơnap tap, biă ñu amăng bruă brơi prăk, kiăng tơring glông thâo prăp rơmet mă pô pok pơhai ngă jơlan hơdră”.

Pơphun amăng ƀiă mông mơn, hăng lu bruă mă, laih anun yôm biă, Jơnum ƀu tui tơđar lok 5 brơi ƀuh tơlơi gơgrong bruă, pran jua ngă bruă khut khăt mơ̆ng ƀing khua pơ ala đah mơ̆ng hơmâo tơlơi pơplih phrâo pơtrut đĭ kyar bơwih ƀong, đĭ kyar tañ, hơđong kjăp. Pran jua pơplih phrâo, sit nik yua kơ mơnuih ƀôn sang mơ̆ng anun jai hrơi hơmâo ƀuh rơđah hloh, sit nik hloh./.