Dưi hmâo Ling tơhan pơgang guai dêh čar gum djru na nao lĕ sang anô̆ ayong Rơmah Tíu hăng amai Rơlan Blớc, djuai ania Jarai ƀơi plơi Tung, să Ia Nan, tơring glông Đức Cơ. Dua thun hlâo adih, sang anô̆ ayong Tíu lĕ sa amăng hơdôm bôh sang anô̆ ƀun rin, kơƀah ngăn rơnoh pioh pơđĭ kyar bơwih ƀong sang anô̆. Pơhrui glăi biă ñu hluai tui kơ bruă hyu mă bruă arăng tui bơyan ƀu hơđong ôh. Kơnang kơ tơlơi djru gum mơ̆ng Ling tơhan pơgang guai dêh čar ƀơi puih kơđông Ia Nan hăng gong gai ƀơi anai, sang anô̆ ñu dưi hmâo kơnuk kơna djru phun pla pioh pla 3 ar đang kơphê, dưi hrăm tŭ hơdră bơwih brơi, pơgang hlôm hlâo kơman klan mŏt pơčrăm phun pla. Truh ră anai, 3 ar đang kơphê hmâo bôh laih, hrŏm hăng 2 ar hmua pơdai hăng 8 ar đang kơ su, hmâo ba glăi laih kơ sang anô̆ prăk pơhrui glăi hơđong năng ai ñu 100 klăk prăk sa thun.

 “Ƀing ling tơhan ăt kah hăng khul grŭp hăng să ăt djru mơn kah hăng mơnuih amăng sang anô̆, pơtô brơi čre than, pruai kơmok, ră anai sang anô̆ hmâo bruă bơwih ƀong huă hơđong hloh, bơwih brơi kơ ană bă hrăm hră trơi pơđao”.

Tui hăng mrô yap mơ̆ng să Ia Nan, tơring glông Đức Cơ, să anai hmâo 1.951 bôh sang anô̆, hăng giăm truh 9.000 čô mơnuih. Să hmâo 7/9 bôh plơi djơ̆ tui plơi pla phrâo. Mrô sang anô̆ ƀun rin hrŏ trun ƀơƀrư̆ tui hơdôm thun hăng truh rơnuč thun 2023, să kơnong kơ dô̆ 100 bôh sang anô̆ ƀun rin, hmâo 4,9% mrô sang anô̆. Kơ-iăng Khua Jơnum min mơnuih ƀôn sang să Ia Nan - Phạm Văn Thúy brơi thâo, amăng hơdôm thun rơgao gong gai plơi pla hăng khul Ling tơhan pơgang guai dêh čar pơdŏng Puih kơđông ƀơi să gum hrŏm na nao pơdŏng kơčăo bruă, jơlan gah rơđah djru mơnuih ƀôn sang pơđĭ kyar bơwih ƀong, pơdŏng plơi pla phrâo.

 “Mơ̆ng hrơi hmâo mơnuih apăn bruă ƀơi să gơgrong bruă ƀơi hơdôm bôh sang anô̆ mơnuih ƀôn sang ăt ƀuh mơn, kah hăng hơdră hmua pơdai ăt kah hăng phun pla sui thun, mơnuih mă bruă tơhan pơgang guai dêh čar lăng ba biă hăng djă tơngan črâo bruă, biă ñu hơdôm bôh sang anô̆ dưi hmâo ling tơhan pơgang guai dêh čar ƀơi anai djru gum, hơdôm bôh sang anô̆ hmâo tơtlaih laih mơ̆ng ƀun rin, hrưn đĭ hơđong tơlơi hơdip mơda”.

Trung tá Lê Hồng Tuấn, Khua Puih kơđông pơgang guai dêh čar ƀơi Ia Nan, tơring glông Đức Cơ brơi thâo, hăng čang rơmang gum hrŏm gong gai să djru mơnuih ƀôn sang pơđĭ kyar bơwih ƀong huă, pơđĭ tui prăk pơhrui glăi, hrŏ trun ƀun rin kơjăp sui thun hăng anai ăt lĕ sa bruă jao yôm phun, na nao mơ̆ng Ling tơhan pơgang guai dêh čar pioh pơhlôm rơnuk rơnua guai dêh čar, hơđong bruă kơđi čar, hơđong pơhlôm abih bang mơnuih mơnam ƀơi guai dêh čar, anih anom Puih pơđông wai lăng.

 “Ngă tui jơlan hơdră pơkă mơ̆ng lŏn ia mơ̆ng Ping gah hăng Kơnuk kơna amăng pơdŏng plơi pla phrâo amăng hơdôm thun rơgao, puih kơđông pơkiăo nao 9 čô mơnuih ping gah gum hrŏm jơnum ƀơi 9 grŭp ping gah plơi mơ̆ng să Ia Nan, 15 čô gơgrong lăng ba 158 bôh sang anô̆. Gum hrŏm hăng jơlan hơdră pơđĭ kyar bơwih ƀong mơnuih mơnam ƀơi să amăng hơdôm thun rơgao Ping gah, Grŭp git gai Puih kơđông hmâo jơlan hơdră kĭ pơkôl hăng Ping gah, Jơnum min mơnuih ƀôn sang să djru pơđĭ kyar bơwih ƀong, hrŏ trun rin rơpa, pơdŏng plơi pla phrâo pioh să amăng ƀrư̆ kơjăp kơtang gah bruă bơwih ƀong, djơ̆ tui bruă pơgang rơnuk rơnua amăng rơwang phrâo”.

Hrŏm hăng djru mơnuih ƀôn sang pơđĭ kyar bơwih ƀong, Ling tơhan pơgang guai dêh čar tơring čar Gia Lai dô̆ hmâo lu hơdră, jơlan hơdră hơđong tơlơi mơdip mơda mơnuih mơnam. Amăng thun 2023, hmâo pơdŏng laih 13 bôh sang brơi kơ mơnuih ƀun rin ƀơi guai dêh čar, djă pioh lăng ba 63 čô čơđai sang hră amăng Jơlan hơdră “Čung tơkai adơi nao sang hră” hăng "Ană rông puih kơđông pơgang guai dêh čar"... Tui hăng Đại tá Nguyễn Văn Nghị, Kơ-iăng Khua git gai Ping gah Ƀirô git gai khul ling tơhan pơgang guai dêh čar tơring čar Gia Lai, puih kơđông amra ngă tui dong hơdră pơtrun, hơdră bruă mơ̆ng Ping gah, Kơnuk kơna kơ pơdŏng, pơgang guai dêh čar, pơdŏng plơi pla phrâo hăng hrŏ trun ƀun rin kơjăp sui thun ƀơi kual guai dêh čar.

 “Ră anai ƀơi guai dêh čar hmâo 3 bôh tơring glông hăng 7 bôh să, tơlơi hơdip mơda mơ̆ng neh wa ƀơi anai bưp lu tơlơi tơnap biă. Kiăng ngă klă bruă pơđĭ kyar bơwih ƀong, bôh thâo – mơnuih mơnam, ƀing gơmơi lăi pơthâo dong truh mơnuih apăn bruă tơhan, ling tơhan hơdôm puih kơđông pơgang guai dêh čar ngă tui klă bruă jao mơ̆ng puih kơđông amăng pok pơhai hơdôm jơlan hơdră, hơdôm bôh yôm bơdjơ̆ nao truh plơi pla anun lĕ pơđĭ kyar bơwih ƀong, bôh thâo – mơnuih mơnam, djru mơnuih ƀôn sang hrŏ trun rin rơpa. Ƀing gơmơi ăt amra pơkiăo nao mơn 196 čô mơnuih ping gah djru hơdôm bôh sang anô̆ amăng 800 bôh sang anô̆ ƀơi kual guai dêh čar”.

Hăng pran jua “Puih kơđông sang, guai lŏn ia lĕ plơi pla, neh wa djop djuai ania lĕ adơi ayong kiăn pruăi”, Ling tơhan pơgang guai dêh čar tơring čar Gia Lai hmâo gum hrŏm klă laih hăng hơdôm gưl Ping gah, Gong gai amăng bruă djru mơnuih ƀôn sang kual guai dêh čar pơđĭ kyar bơwih ƀong – mơnuih mơnam. Kơnang kơ anun, lu sang anô̆ tơtlaih mơ̆ng ƀun rin, pơplih tơlơi hơdip mơda ƀơi kual lŏn guai dêh čar dô̆ lu tơlơi tơnap tap./.