Mơguah lơ 12/3, Khul djru sang anŏ tơhan djai pơsăn drơi kơ lŏn ia Việt Nam pơphun bưp ƀing hyu mă tơlơi pơhing phrâo Bơyan bơnga Giáp Thìn 2024. Trung tướng Hoàng Khánh Hưng, Khua khul djru sang anŏ tơhan djai pơsăn drơi kơ lŏn ia Việt Nam brơi thâo: Khul hơmâo tơlơi gum hrŏm amăng bruă pơpŭ kơ tơhan djai pơsăn drơi mơ̆ng Phun kông ti pơkra jơlan rơdêh treng Việt Nam kơ bruă lui hĭ mă prăk pơgiăng tơlang tơhan hăng lui mă prăk wĕ rơdêh kơ sang anŏ tơhan djai pơsăn drơi kiăo tui mơ̆ng kual Dơnung nao pơ Kơdư. Anai jing bruă klă biă mă, pơdah pran jua “mơñum ia hơdor kơ pô klơi” mơ̆ng djuai ania Việt Nam ta.

Amăng thun 2024, Khul djru ba sang anŏ tơhan djai pơsăn drơi Việt Nam ngă klă dong bruă pơpŭ hơdor bơni kơ tơhan djai pơsăn drơi kah hăng: Hơduah ĕp anăn tơhan djai pơsăn drơi, hyu ĕp, rŭ tơlang tơhan; brơi sang dŏ hơdor tơngia, hră pơkom prăk, brơi prăk hrăm hră kơ sang anŏ hơmâo tơhan djai pơsăn drơi kơ lŏn ia...Biă ñu amăng thun anai, Khul ngă hrŏm hăng Phun kông ti Jơlan rơdêh treng Việt Nam djru pơgiăng tơlang tơhan hăng lui mă prăk rơdêh kơ sang anŏ tơhan kiăo tui ba glăi tơlang tơhan djai pơsăn drơi glăi pơ plơi pla hăng rơdêh treng.