Ƀơi mông bưp mơnuih ƀôn sang ruah khua să Đưng K’Nơ̆, tơlơi K'Ho lăi Dơng K'Nơh tơring glông Lạc Dương, tơring čar Lâm Đồng, mơnuih ƀôn sang ruah khua rơkâo đĭ hăng Kơnuk kơna tañ ngă pơgiong jơlan Ngŏ Trường Sơn, jơlan tơring čar mrô 722 găn nao pơ tơring čar pioh pơkĕ nao rai tơkuh hăng lu arăt jơlan prong gêh găl bơwih ƀong huă sĭ mơdrô amăng kual plơi pla, boh nik ñu dăng hrĕ apui lơtrik ba nao pơ đang hmua, bơwih brơi bruă ngă hmua pla pơjing kơ mơnuih ƀôn sang hăng ngă hơđong tơlơi hơdip mơda, pơtrut pơđĭ kyar bơwih ƀong huă.....Mơnuih ƀôn sang ruah khua pơ anai đing nao biă mă kơ bruă wai pơgang glai rưng hăng jơlan hơdră pơgang ba anŏ tŭ yua kơ mơnuih ƀôn sang amăng bruă wai pơgang glai rưng, kiăng pơđĭ tui rơnoh pơhrui glăi ngă hơđong tơlơi hơdip mơda mơnuih ƀôn sang. Mơnuih ƀôn sang ruah khua ăt lăi pơthâo, hơdră tla prăk apah pơgang ayuh hyiăng anih dŏ jum dar hơmâo ngă tui lu thun hăng anai, samơ̆ yua kơ lŏn glai ataih, prong aka ƀu hơmâo bơnư̆ pơkong ia anun mơnuih ƀôn sang tŭ mă anŏ bơwih ƀong huă mơ̆ng bruă anai ƀu lu ôh pơkă hăng lu anih pơkŏn. Mơnuih ƀôn sang ruah khua ƀôn Niêng Oañ, ră anai iâu thôn 1, să Đưng K'Nơ̆ rơkâo đĭ, Kơnuk kơna kiăng sem glăi ngă bơkơnar, djơ̆ găl amăng bruă tla prăk apah wai pơgang glai rưng, tui anun kah mơnuih ƀôn sang mơ̆ng tong ten hăng bruă wai lăng glai rưng hăng hơđong bơwih ƀong huă hơdip mơda.

“Bruă tla prăk pơgang ayuh hyiăng lŏn glai lĕ să gơmơi hơmâo mă prăk apah ƀiă đơi pơkă hăng să arăng pơkŏn, yua anun tơnap biă kơ mơnuih ƀôn sang. Lơ̆m anun, lu mơnuih ƀôn sang pơ anai kơnang kơ bruă wai pơgang glai rưng soh bơwih ƀong huă anun yơh kơƀah na nao. Ƀing gơmơi čang rơmang kiăng hơmâo pơkra glăi rơnoh prăk apah kơ bruă pơgang ayuh hyiăng lŏn glai”.

Pơhiăp ƀơi mông bưp mơnuih ƀôn sang, ơi Phan Đình Trạc, ding kơna ding jum kơđi čar, ding kơna khul git gai ping gah, Khua anom bruă pơgăn ƀong kông ngăn mơ̆ng ping gah lăi, tơlơi rơkâo đĭ mơ̆ng mơnuih ƀôn sang lăp biă mă. Grup pơ ala mơnuih ƀôn sang tơring čar Lâm Đồng rơkâo đĭ hăng kơnuk kơna hơdôm bruă brơi sem lăng, pơsir laih dơ̆ng kơsem min glăi hơdră kiăng pơhlôm hơđong brơi kơ mơnuih ƀôn sang hơdip mơda kơnang kơ glai klô.

  “Anih pơpă dưi pơgang glai klă lĕ ƀu hơmâo ring bruă bơnư̆ pơkong ia, rơnoh prăk apah pơgang glai rơgêh biă mă, pơ anun hơmâo yơh tơlơi mơnuih ƀôn sang phă glai pơrai rưng, tơdah tui anun răm ƀăm lu hloh hă ƀudah pơđĭ lu rơnoh prăk apah wai pơgang rưng răm ƀăm hloh? Tơlơi anai ƀing ta khom jŭ yap ngă hiư̆m pă boh tơhnal rơnučkiăng pơgang glai rưng ayuh hyiăng hiam klă. Boh nik ñu, khom hơmâo hơdră ngă bruă hơduah ĕp phun pla pơjing jrao akha kyâo ba pla amăng đang kyâo glai, pioh kơ mơnuih ƀôn sang ngă rah bruă pơgang glai rưng hăng pla phun pla dưi sĭ hơmâo rơnoh, pơhrui glăi prăk kăk rông hơdip sang anŏ. Kâo pơmin lĕ kơnong ngă tui anun yơh mơ̆ng dưi djă pioh pơgang glai klô tŭ yua hăng pơđĭ tui rơnoh pơhrui glăi kơ pô mă bruă”.

Ƀơi mông jơnum, bưp mơnuih ƀôn sang ruah khua ƀơi K’Đơn, tơring glông Đơn Dương, mơnuih ruah khua pơdah rai pran jua đăo kơnang hăng lăng yom boh tơhnal amăng bruă pơhlôm pơgăn hưp ham ƀong kông ngăn, biă mă ngă tui khut khăt amăng bruă dăp glăi hơbôt hloh sang bruă, mơnuih mă bruă kơnuk kơna, mơnuih apăn bruă ping gah. Laih dơ̆ng, mơnuih ruah khua rơkâo grup khua mua pơ ala mơnuih ƀôn sang dêh čar ƀơi tơring čar Lâm Đồng đing nao lu tơlơi aka ƀu găl amăng bruă ngă tui tơlơi phiăn lŏn mơnai, tơlơi phiăn ngă hrŏm bơwih ƀong, bruă brơi apah, sĭ kông ngăn hră jao lŏn, pơkă rơnoh yua lŏn, sĭ lŏn tơnah hăng djop ring bruă dŏ mă bruă man pơdong. Mơnuih ruah khua rơkâo đĭ tuh pơ alin čuk pơkra glăi jơlan nao rai amăng hmua đang, pơkra tơdrông tua găn ia čroh hnoh brơi mơnuih ƀôn sang nao hmua, ngă amuñ ƀiă hră pơar brơi gêh găl kơ mơnuih ƀôn sang pơdong pưk sang, pơhrêp glăi sang tơ̆i, djru hlâo rơnoh prăk čan brơi mơnuih ƀôn sang tuh pơ alin ngă hmua pla pơjing.....Lăp đing nao, mơnuih ruah khua ăt lăi pơthâo tơlơi ƀing khua apăn bruă kơnuk kơna ngă tơnap kơ mơnuih ƀôn sang, sit nao ngă hră pơar, dŏ ngă gleh glar, rơngiă hrơi mông dŏ tơguan, biă mă ñu ngă hră yua lŏn, mơnuih ƀôn sang khom rô nao rai lu wơ̆t.

Tui hăng ơi Phan Đình Trạc, anai lĕ tơlơi hơmâo sit nik, pơdjơ̆ nao bruă mă, tơlơi dŏ dong ƀong huă rim hrơi mơ̆ng mơnuih ƀôn sang, kiăng djop anom bruă, gong gai kơnuk kơna khom pơsir. Amăng anun, đing nao bruă ngă hră pơar, ngă tơnap kơ mơnuih ƀôn sang, khom ĕp lăng tong ten hlơi pô ñu, khom thâo laih anun pơsir kơđi truh kih, tơpă ară.

“Hră pơar nao ngă ƀơi sa bit anih brơi glăi, pơkra nao pơkra rai lu wơ̆t, laih anun ngă pơƀuh thâo tơlơi pơhing mơnuih mơ-it, ƀu lăi pơthâo mơnuih mơ-it hră pơar ôh, pung kơ mơ-it mơnuih ngă gong jơlan, apah prăk djă brơi. Tơlơi anun hă, tơlơi thâo amăng bruă mă, anŏ glăm ba mơ̆ng mơnuih apăn bruă hăng ană plơi pla, ƀudah dŏ gah klôn kơ tơlơi soh sat anun hơgĕt, hơmâo tơlơi hiư̆m pă” Ră anai, Khua git gai ping gah ơi Tô Lâm lăi pơtong lu wơ̆t laih anun ƀing ta khom khut khăt ngă tui sa bruă hơkrŭ phrâo pơphun glăi bruă mă, sang bruă kơnuk kơna, brơi hơbôt hloh, pơđĭ tui boh tŭ yua mơ̆ng ƀing mă bruă kơnuk kơna, tơdah dŏ lui na nao hơmâo tơlơi djơh hăng anai sit mơ̆n amra ƀu anăm pơsir ôh bruă mơnuih ƀôn sang kơnang. Kâo rơkâo ƀing ta khom ngă rơđah tơlơi anai, tơdah hơmâo biă mă khom pơsir truh kih, laih anun lăi pơthâo kơ mơnuih ƀôn sang ruah khua ƀơi anai thâo”.