Kơnang kơ anun, tơlơi hơdip neh wa mơnuih ƀôn sang ƀơi plơi prong, biă ñu ƀơi hơdôm bôh plơi djuai ania ƀiă amăng plơi prong Plei Ku hmâo pơplih laih amăng djop mơta.

Hơdôm thun jê̆ hăng anai, tuai mơ̆ng lu anih anom nao pơ̆ Plei Ku pioh hơduah ĕp lăng bôh thâo đưm, gơnam ƀong huă mơ̆ng mơnuih ƀôn sang ƀơi anai jai hrơi jai lu tui. Thun 2019, ping gah Rmah Hiu ƀơi plơi Tiêng 1, să Tân Sơn, plơi prong Plei Ku hmâo khin hơtai laih pok sa bôh sang sĭ mlia gơnam Jarai amăng rơwang đang sang pô. Anih anom sĭ mlia hmâo sang dlông đưm gah djuaia nia Jarai, dưi pơhrôp nao čing, hơgor, rêu, ƀudah kut klao... leng kơ hơdôm gơnam lăng juăt biă amăng tơlơi hơdip mơda, ngă đang hmua hăng akan krô, mơnŭ amăng đang, akan amăng čroh ia, dưi hmâo neh wa djuai ania Jarai amăng plơi rông, pla, hyu mă. Khă gơnam pioh yua tơnă hơbai hăng hơdôm hơdră tơnă hơbai ƀu tơnap mơn, samơ̆ dưi pơjing rai anô̆ jơman mơ̆ng ñu, djru tuai mơ̆ng lu anih nao čuă ngui ƀong lông lăng jai hrơi jai lu tui. Lơm pơkra sang sĭ mlia, hluai tui grŭp ping gah plơi Tiêng 1, ping gah Rmah Hiu dưi hmâo hơdôm hơdră pơtrun kơ pơđĭ kyar bruă tuai cucă ngui hăng pơgang bôh thâo đưm. Hrŏm hăng anun, ñu hmâo gum hrŏm tum djop mơn hơdôm anih pơhrăm pơhlôm hơdjă gơnam ƀong huă hăng hơdră pơphun bruă tuai čuă ngui plơi pla. Nao djơ̆ jơlan, sang sĭ mlia jai pơđĭ kyar, ayong Hiu hmâo prăk pơhrui glăi dưi dăi mơn hăng djru lu neh wa amăng plơi hmâo dong prăk pơhrui glăi: 

 “Sang anô̆ hmâo tơlơi pơmin pok anih sĭ mlia pioh hmâo prăk mă yua kơ sang anô̆ hăng pơjing jơlan pơhrui glăi prăk kơ neh wa. Tơlơi kiăng mơ̆ng tuai lĕ kiăng lăng ƀuh tơlơi yun suang hăng jua čing hơgor djuai ania Jarai. Kâo iâo grŭp atông čing hơgor amăng plơi nao pơdah atông čing hơgỏ. Kâo tla prăk kơ grŭp, pioh gơñu ngă tui phiăn juăt đưm, sa lĕ hmâo dong prăk phrui glăi, dua lĕ djă pioh gru grua bôh thâo dưm”.

Tân Sơn lĕ să kual kơtuai guai plơi prong Plei Ku. Ƀơi anai hmâo 5 bôh plơi, thôn. Amăng anun hmâo 2 bôh plơi Tiêng 1 hăng Tiêng 2 lu ñu hơdôm bôh sang anô̆ djuai ania Jarai. Mơ̆ng thun 2016 truh ră anai, kơnang kơ pok pơhai Tơlơi pơtrun pơsit 06, hơdôm bôh plơi neh wa ƀơi să dưi đing nao pơdŏng phrâo, pơkra glăi jơlan răm hăng hơdôm sang jơnum plơi pla. Mơnuih ƀôn sang dưi pơhrăm ngă bruă wai lăng tuai čuă ngui plơi pla, pơgang bôh thâo đưm čing hơgor, mơñăm băn ao đưm... Amăng bruă ngă đang hmua, neh wa dưi djru pla glăi phun kơphê, pơkra jơlan nao rai amăng krah đang hmua hăng pơjing kual pla gơnam tui tơhnal pơkă sĭ kơ dêh čar tač rơngiao. Biă ñu, 63 wot bôh sang anô̆ ƀun rin, ƀun rin ƀơƀiă dưi djru abih bang 1 klai 300 klăk prăk pioh sut lui sang tơ̆i, djru pơjeh pla, hlô rông mơ̆ng ngăn rơnoh gah hơdôm jơlan hơdră. Ră anai, amăng 350 bôh sang anô̆ mơnuih ƀôn sang Jarai amăng să Tân Sơn, ră anai kơnong kơ dô̆ 3 bôh sang anô̆ ƀun rin, pơhrui glăi hơnong ñu sa akô̆ mơnuih rơnuč thun 2023 lĕ 43 klăk prăk. Hrŏm hăng anun, hơdôm bôh plơi leng kơ hmâo grŭp atông čing, grŭp rơngaih mơñam, jing anih djru neh wa bơkơtuai, pơtô glăi lu gru grua bôh thâo đưm pha ra ha jăn gah djuai ania Jarai. Ơi Rčom Joi, mơnuih ping gah plơi Tiêng 2, să Tân Sơn, plơi prong Plei Ku brơi thâo: 

 “Ră anai, sang hơpă leng kơ hmâo kơphê, hmâo lŏn ngă hmua pơdai. Neh wa mơ-ak pran jua biă. Ră anai kơnuk kơna mă yua prăk pơkra jơlan; tơhan plơi pô lăi pơhing kơ hră pơgang gah ia jrao ăt hmâo mơn 95%”.

Ơi Phạm Văn Hiếu – Khua git gai Ping gah să Tân Sơn, plơi prong Plei Ku brơi thâo, tơhnal pơkă mơ̆ng Tơlơi pơtrun pơsit 06 Grŭp mă bruă Ping gah plơi prong Plei Ku lĕ đing nao iâo pơhrui, ngă tui ba glăi bôh tơhnal hơdôm ngăn rơnoh yua pơđĭ kyar bơwih ƀong – mơnuih mơnam kual neh wa djuai ania ƀiă. Yua anun, hơdôm thun rơgao, Ping gah să hăng hơdôm grŭp ping gah plơi, thôn hmâo git gai, črâo ba abih bang glông bruă kơđi čar pok pơhai ngă tui hơdôm jơlan hơdră, hơdră bơwih ƀong hăng hơdôm hơdră bruă lăp djơ̆ hăng hơdôm bôh plơi djuai ania ƀiă. Amăng anun, ping gah hăng gong gai gum hrŏm neh wa amăng pơplih hơdră phun pla, hlô rông; mă yua bôh thâo phrâo măi mok amăng ngă đang hmua, mơ̆ng anun pơđĭ dong prăk pơhrui glăi, hrŏ trun ƀun rin kơjăp sui thun.

 “Mơ̆ng hrơi hmâo jơlan hơdră hăng tơlơi pơtrun pơsit mơ̆ng Ping gah tơring čar, plơi prong lĕ tơlơi hơdip mơda neh wa dưi pơplih rơđah, mrô sang anô̆ ƀun rin hrŏ trun rim thun. Lu sang anô̆ dưi hmâo kơnuk kơna, jơnum min djop djuai ania mơnuih mơnam, ƀing thâo tơngia đing nao, anun tơlơi pơplih, pơhlôm tơlơi hơdip mơda”.

Hơdôm bôh tơhnal ƀơi să Tân Sơn, plơi prong Plei Ku, Gia Lai brơi ƀuh, bruă ba hơdôm Tơlơi pơtrun pơsit mơ̆ng ping gah mut amăng tơlơi hơdip mơda, pơjing laih lu bôh tơhnal sit nik, ngă pơplih ƀô̆ mơta tơlơi hơdip mơnuih mơnam, pơđĭ dlông tơlơi hơdip mơda mơ̆ng mơnuih ƀôn sang./.