Ră anai, tơring čar Dak Lak hơmâo rơbêh 252.000 čô tuai čan prăk mơ̆ng Sang bruă prăk kơnuk kơna djru mơnuih mơnam tơnap tap, hăng rơnoh prăk dong hnưh truh 14.000 klai prăk. Sang anŏ dưi čan lĕ, hơdôm sang anŏ ƀun rin, giăm či ƀun rin, sang anŏ hơmâo anăn kơnuk kơna djru, mơnuih ƀôn sang djuai ƀiă, čơđai sang hră, tơdăm dra čơđai sang hră gưl prong sang anŏ ƀun rin; hơdôm sang anŏ kiăng djru gah bruă ngă hmua, sĭ mơdrô, pơdong sang dŏ, pơkra đing ia yua….

Prăk čan anai kiăng djru pơgăn hyu čan prăk gah rơngiao arăng mă kơmlai lu ƀơi kual ataih, kual tơnap tap; djru lu plơi pla ngă giong tơhnal pơkă pơdong plơi pla phrâo, kiăng ngă hơđong bruă kơđi čar, rơnuk rơnua mơnuih mơnam amăng tơring čar. Khă tui anun, bruă pok pơhai ngă tui Hră pơtrun 78 truh ră anai hơmâo lu tơlơi gun hĭ; rơnoh brơi čan ƀiă đơi; lu jơlan hơdră ƀu găl dơ̆ng tah; prăk čan nao mă bruă apah pơ tač rơngiao lĕ ƀiă đơi; kơmlai dŏ lu.

Ƀơi mông mă bruă lu tơlơi pơgôp hiăp lai nao kơ prăk čan pioh hrăm hră, djru kơ čơđai sang hră dưi čan 100 klăk prăk sa čô; rơnoh prăk čan pioh sĭ mơdrô đĭ brơi đĭ tui truh 200 klăk prăk, pơhrơ̆i thun blan tla hnưh hăng ƀing mơnă abih thun arăng krư̆ mơ̆ng 5-10 thun, glăi pơ sang anŏ laih; laih anun pok tui lu anăn mơnuih dưi čan pioh nao mă bruă apah pơ tač rơngiao. Grup hyu ĕp lăng hơmâo čih pioh tơlơi rơkâo mơ̆ng tơring čar Dak Lak, laih anun amra kơsem min tong ten pioh čih pơkra tơlơi phiăn pơkă brơi djơ̆ găl hăng djop mơnuih amăng dêh čar. Laih dơ̆ng, kiăng sem lăng čih pơkra tơlơi phiăn ngă tui phara kơ tơring čar Dak Lak, kah hăng bruă brơi ba yua prăk ƀơi tơring čar, brơi ngă rơnoh prăk čan djru mơnuih mơnam tơnap tap.