Pơhiăp pơđut mông jơnum, Khua git gai pơ ala mơnuih ƀôn sang dêh čar, Vương Đình Huệ rơkâo, ƀing pơ ala mơnuih ƀôn sang dêh čar ăt pơđĭ tui pran jua mă bruă “Pô čih pơkra tơlơi phiăn, prăp lui, krăo lăng tŭ yua, pơsit bruă hmao kru, pơtrut kơtang pơđĭ kyar”, kiăng hrŏm hơbit hăng kơnuk kơna, djop anom bruă amăng glông kơđi čar ngă tui tŭ yua bruă mă pơđĭ kyar bơwih ƀong huă mơnuih mơnam thun 2024 hăng mơ̆ng thun 2021-2025, ba dêh čar pơđĭ kyar hmar hloh hăng hơđong kjăp. Bruă khua mua pơ ala mơnuih ƀôn sang dêh čar pơsit hĭ Tơlơi phiăn lŏn mơnai čih pơhrua, ngă giong sa amăng hơdôm bruă mă phun pơkra rai tơlơi phiăn dêh čar, sa bruă mă yôm mrô sa amăng tal XV.

Khua mua pơ ala mơnuih ƀôn sang dêh čar ăt pơsit hĭ Hră pơtrun kơ tơlơi phiăn ngă tui bruă yôm phara kiăng lông ngă tui hơdră dêh čar pơtrun. Tui hăng Khua git gai pơ ala mơnuih ƀôn sang dêh čar Vương Đình Huệ, anai lĕ yak nao tŏ tui boh tơhnal sem lăng prong hloh sa hnong bruă mơ̆ng khua mua pơ ala mơnuih ƀôn sang dêh čar amăng mông jơnum lok hlâo kơ anun. Brơi kah pơpha yua rơnoh prăk 64.000 klai, brơi kơ bruă mă, kơčăo bruă gah 5 mơta bruă: pơgang lŏn ia, rơnuk rơnua dêh čar, wai lăng mơ̆ng kơnuk kơna, boh thâo ia rơgơi phrâo hăng jơlan glông nao rai, amăng anun hơmâo giăm 58.000 klai prăk brơi kơ 32 kơčăo bruă čuk pơkra jơlan glông phun yôm.