Tui hăng Y Thanh Hà Niê Kdăm Khua anom bruă djuai ania mơ̆ng sang bruă pơ ala mơnuih ƀôn sang dêh čar, Ngă Kơ-iăng khua grup pô krăo lăng prong hloh mơ̆ng anom bruă khua pơ ala mơnuih ƀôn sang dêh čar brơi thâo, boh tơhnal ngă tui hơdôm hơdră dêh čar pơtrun man pơdong plơi pla phrâo, krăo lăng bruă ngă tui pơhrŏ ƀun rin hơđong kjăp hăng pơđĭ kyar bơwih ƀong huă mơnuih mơnam amăng kual plơi pla mơnuih djuai ƀiă hăng čư̆ siăng boh tơhnal tal blung dưi ngă tui ba glăi boh tŭ yua hiam klă; atur kơ tơlơi bơwih ƀong huă, mơnuih mơnam amăng kual plơi pla, čư̆ siăng pơblih tui. Hrŏm hăng anun hơdôm tơlơi gun, tơlơi kơƀah ngă kơ bruă ngă tui ba yua prăk mơ̆ng dêh čar djru truh thun 2025 brơi 3 hơdră dêh čar pơtrun lĕ tơnap tap biă mă.

Pơdjơ̆ nao lu hơdră pơsir kiăng pơtrut tañ mă yua prăk tuh pơ alin kơ bruă čar, djop hơdră dêh čar pơtrun kiăng pơđĭ tui boh tŭ yua ba yua prăk kăk, djru hrom ngă tui tơhnal pơkă mơ̆ng dêh čar hăng ngă giong bruă čuk pơkra jơlan glông bơwih brơi pơđĭ kyar bơwih ƀong huă hăng tơlơi hơdip mơda mơnuih ƀôn sang ƀơi mông jơnum rơnuč thun phrâo anai, Khul khua mua pơ ala mơnuih ƀôn sang tơring čar Dak Lak, ơi Võ Ngọc Tuyên, Khua Gơnong bruă man pơphô hăng tuh pơ alin tơring čar Dak Lak brơi thâo:

“Thun blan pơ anăp, ƀing gơmơi đing nao kơ hơdrôm hơdră dêh čar pơtrun. Hơmâo tơlơi ngă hrŏm klă plah wah Gơnong bruă Man pơphô hăng Tuh pơ alin laih anun lu anom bruă. Hơdră dêh čar pơtrun kơ man pơdong plơi pla phrâo lĕ hơmâo Gơnong bruă Ngă hmua hăng Pơđĭ kyar plơi pla, hơdră pơhrŏ ƀun rin hơđong kjăp lĕ hơmâo Gơnong bruă Bruă mă Tơhan rơka hăng Mơnuih mơnam, hơdră pơđĭ kyar bơwih ƀong huă kual mơnuih ƀôn sang djuai ƀiă hăng čư̆ siăng lĕ hơmâo Anom bruă Djuai ania ƀing gơmơi amra pơčrong sai amăng Khul khua git gai hơdră dêh čar pơtrun kiăng hơmâo hơdră ngă sa hnong laih anun pel ĕp hlâo mơtam hlâo kơ jao akŏ bruă tuh pơ alin mơ̆ng akŏ thun pioh pok pơhai kiăng mă yua rơnoh prăk hmao kru tuh pơ alin kơ bruă čar”.

Ƀơi mông jơnum anai, khul pơ ala mơnuih ƀôn sang tơring čar Dak Lak hơmâo ngă hră pơtrun kơ bruă jao rơnoh pơkă, tơhnal mă bruă, akŏ bruă či ngă tui ba yua rơnoh prăk mơ̆ng dêh čar laih anun prăk tơring čar pok pơhai ngă tui tơhnal pơkă mơ̆ng dêh čar pơtrut bơwih ƀong huă ƀơi kual mơnuih djuai ƀiă dŏ hăng kual čư̆ siăng thun 2024 truh 660 klai prăk.

Ăt ƀơi mông jơnuč rơnuč thun 2023 mơ̆n, khul pơ ala mơnuih ƀôn sang tơring čar Gia Lai, ơi Phạm Minh Trung, Khua gơnong bruă Kông ngăn hăng pơgang ayuh hyiăng anih dŏ tơring čar rơkâo đĭ djop tơring glông khom ngă hrŏm, pok pơhai tañ ngă hră pơar yua lŏn brơi mơnuih ƀôn sang tui hơdră dêh čar pơtrun pioh pơđĭ kyar bơwih ƀong huă kual djuai ƀiă dŏ:

“Kơ bruă pơpha lŏn, brơi mơnuih ƀôn sang djuai ƀiă amăng hơdră bruă dêh čar pơkă pơđĭ kyar bơwih ƀong huă mơnuih mơnam anih djuai ƀiă dŏ, jơnum min mơnuih ƀôn sang tơring čar hơmâo jao kơ Gơnong bruă Kông ngăn hăng pơgang ayuh hyiăng anih dŏ brơi lăi pơthâ, pơtô brơi tong ten lŏn dŏ. Gơnong bruă hơmâo ngă hră pơtô brơi hơdră ngă tui phara laih kơ djop tơring glông. Rơkâo kơ djop tơring glông dăp hơdră, čih anăn pioh pơsit, pok pơhai ngă tui”.

Hăng pran jua mă bruă prăp lui hlâo, lăi tơpă, ƀu bĕ hơgĕt ôh, hmao kru pơhaih sit nik hơdôm tơlơi tơnap gun gan, ƀing pơ ala mơnuih ƀôn sang dêh čar hrŏm kơnuk kơna hơduah ĕp hơdră pơsir djơ̆ găl hloh, boh nik ñu thun blan ngă tui 3 hơdră mơ̆ng dêh čar pơtrun mơ̆ng thun 2021-2025 dŏ dua thun đôč abih yơh. Jơnum lok 6, khua mua pơ ala mơnuih ƀôn sang dêh čar tal XV hơmâo pơsit hrŏm hră pơtrun kơ bruă krăo lăng ngă tui 3 hơdră dêh čar pơtrun. Pô pơ ala Rčom H’Phik, grup pơ ala mơnuih ƀôn sang dêh čar ƀơi Gia Lai lăi lĕ:

“Hră pơtrun hơmâo tơlơi git gai kiăng ječ biă yơh, djơ̆ găl hăng pran jua mơnuih ƀôn sang, anŏ phun amra pơsir brơi hơdôm anŏ gun, đôm hĭ lơ̆m ngă tui pok pơhai 3 hơdră bruă mơ̆ng dêh čar pơkă”.

Anai lĕ tal blung a, sa kơčăo bruă krăo lăng prong hloh pơgôp 3 hơdră bruă mơ̆ng dêh čar pơkă yôm kơ lŏn ia. Pơhiăp ƀơi ông jơnum, Khua pơ ala mơnuih ƀôn sang dêh čar, Vương Đình Huệ lăi pơtong: bruă krăo lăng hăng pran jua ngă tui na nao man pơdong hăng bong ba mơtam, amăng anun man pơdong yơh âtur phun pioh kơ djop bruă ngă tui kiăng ƀrư̆ hrơi tŭ yua hloh.

“Khua mua pơ ala mơnuih ƀôn sang dêh čar tŭ ư pioh kơ kơnuk kơna tañ dăp hơdră, pơdah thâo hăng ƀing pơ ala mơnuih ƀôn sang dêh čar ƀơi mông jơnum lok giăm hloh pơ anăp anai, Kơčăo bruă čih pơkra hră pơtrun lông ngă tui tơlơi pơtrun, jơlan hơdră phara laih anun bruă pơpha gưl mă bruă truh pơ tơring glông pơsit mă anăn, dăp bruă, pơpha rơnoh prăk tuh pơ alin mă yua prăk mơ̆ng kơnuk kơna brơi yua amăng bruă ngă tui hơdră mơ̆ng dêh čar pơkă”.

Hrŏm hăng bruă pơsit hĭ Hră pơtrun krăo lăng prong hloh kơ bruă pok pơhai ngă tui hră pơtrun mơ̆ng khua mua pơ ala mơnuih ƀôn sang dêh čar kơ djop hơdră dêh čar pơtrun, khua mua pơ ala mơnuih ƀôn sang jao kơ kơnuk kơna pơdah đĭ hăng ƀing pơ ala mơnuih ƀôn sang dêh čar amăng mông jơnum lok giăm hloh pơ anăp, kơ sa pok hră pơtrun pơkă bruă ngă phara hơjăn, jao gưl tơring glông, tŭ mă tơlơi dưi pơhrŏ bruă ngă hră pơar kiăng hmao pơsir hĭ tơlơi gun, đôm lơ̆m ngă brơi hră pơar, djru kơ bruă pok pơhai djop hơdră dêh čar pơtrun dưi tŭ mă boh tơhnal klă hiam, djơ̆ hrơi blan pơkă, pơjing anŏ đăo kơnang hăng ba glăi tơlơi hơdip mơda mơak klă kơ mơnuih ƀôn sang.