Truh ră anai Ding jum Kông ngăn lŏn mơnai hăng ayuh hyiăng git gai čih pơkra 6 Tơlơi pơtrun hăng 4 Tơlơi phiăn khŏm ngă, amăng anun, hăng Tơlơi pơtrun čih pơkra rơđah hơdôm tơlơi mơ̆ng Tơlơi phiăn lŏn tơnah hơmâo 10 črăn, 115 mơta tơlơi pơkă rơđah rơđông 51 tơlơi hơmâo jao amăng Tơlơi phiăn, pơƀut amăng hơdôm tơlơi pơkă hrŏm kah hăng: bruă kiăng ngă, mơnuih mă bruă mơ̆ng anom bruă ngă hră lŏn tơnah, anom bruă pơđĭ mrô lŏn; čuk pơkra, mă yua lŏn tơnah; pơđĭ kyar, wai lăng, mă yua lŏn; jao lŏn, brơi mă yua jăng jai, pơplih bruă mă yua lŏn; pơsir bruă bơrơsua lŏn tơnah, bơtơhmal bruă ngă soh tơlơi phiăn lŏn tơnah hăng mơnuih ngă soh tơlơi phiăn lŏn tơnah lơ̆m glăk ngă bruă gah lŏn tơnah. Kơ-iăng khua ding jum kông ngăn lŏn mơnai hăng ayuh hyiăng Lê Minh Ngân brơi thâo:

“Ding jum kông ngăn lŏn tơnah hăng ayuh hyiăng mă tơlơi pơgôp hiăp mơ̆ng hơdôm gơnong bruă, anom bruă bơdjơ̆ nao mơ̆ng 63 boh tơring čar, ƀon prong, kiăo tui 4 mông jơnum ƀơi hơdôm kual; mă tơlơi pơgôp hiăp čih amăng hră pơ-ar ƀơi hơdôm ding jum, anom bruă, khul grup bơdjơ̆ nao pơhmư̆ tơlơi lăi pơthâo, pơgôp hiăp hăng pơdah pơ Ding jum Tơlơi phiăn sem lăng pơsit brơi. Him lăng lơ 19/4/2024 Khul amra jơnum pơtŏng glăi hơdôm Tơlơi pơtrun anai”.

Ƀơi mông jơnum, khua mua ding jum bruă hmua hăng pơđĭ kyar plơi pla brơi thâo: hơmâo lu tơlơi phrâo hơmâo amăng mông čih pơkra glăi, pơhrua tui Tơlơi pơtrun 156 mơ̆ng Kơnuk kơna pơkă rơđah rơđông hơdôm tơlơi mơ̆ng Tơlơi phiăm Đang glai, ăt kah hăng čih pơkra tơlơi pơtrun rơđah rơđông kơ lŏn ngă hmua. Ding jum bruă hmua hăng pơđĭ kyar plơi pla glăk mă tơlơi pơgôp hiăp kơ dua tơlơi pơtrun anai tui hăng tơlơi phiăn...

Pơtŏng glăi Ding jum Kông ngăn lŏn mơnai hăng ayuh hyiăng hơmâo ngă bruă tañ, djơ̆ hăng tơlơi git gai mơ̆ng Kơnuk kơna, Kơ-iăng khua dêh čar ơi Trần Hồng Hà lăi: kiăng ngă rơđah hơdôm tơlơi dŏ hơmâo lu tơlơi pơmin phara kơ anih anom ngă bruă, anom bơwih ƀong, khul grup anom bruă kơđi čar - mơnuih mơnam...hăng tơlơi pơkă duh prăk, gum djru, pơdong plơi phrâo, pơsit nua lŏn; čih pơkra, pơtrun hră pơ-ar tum teč đôč hăng Tơlơi pơtrun bơtơhmal ngă soh gah lŏn tơnah...Kơ-iăng khua dêh čar kiăng: Ding jum bruă hmua hăng pơđĭ kyar plơi pla pơhlôm pơƀuh Tơlơi pơtrin rơđah rơđông kơ lŏn ngă pơdai djơ̆ hrơi pơkă, kiăo tui bruă jao, djơ̆ anih jao ngă bruă, djơ̆ hră pơ-ar, ba tơbiă hơdôm tơlơi kiăng hơmâo, rơnoh pơkă krăp lăng, pel ĕp, pơtŏng glăi bruă ngă tui djŏp tơlơi pơtrun kơ lŏn glai, lŏn ngă hmua...

“Khŏm ngă tui tơlơi pơkă pơhlôm djŏp tơlơi pơtrun hơmâo lăi nao djŏp tơlơi hơmâo mơ̆ng Tơlơi phiăn lŏn tơnah, pơhlôm djơ̆ phiah phiăn, djơ̆ tơlơi phiăn, Tơlơi pơtrun ƀu dưi pleh ploh hăng Tơlơi phiăn. Kiăng ƀing khua ngă bruă jao bruă djơ̆ anih mă bruă, nao hrŏm hăng tơlơi kiăng, rơnoh pơkă đah mơ̆ng dưi ngă, anun jing phun atur kiăng ƀing ta dưi krăp lăng”.

Kơ-iăng khua dêh čar kiăng Ding jum Tơlơi phiăn, Ding jum Kông ngăn lŏn mơnai hăng ayuh hyiăng ngă hrŏm, ječ ameč prăp rơmet hră pơ-ar pơdah pơ Khua mua pơ ala mơnuih ƀôn sang čih pơkra Tơlơi pơtrun brơi Tơlơi phiăn lŏn tơnah thun 2024 dưi mă yua amăng lơ 1/7/2024. Ding jum man pơkra ječ ameč čih pơkra hră pơ-ar pơkă rơđah rơđông Tơlơi phiăn sang dŏ thun 2023 hăng Tơlơi phiăn sĭ mơdrô lŏn tơnah sang dŏ thun 2023 đah mơ̆ng tañ mă yua hrŏm hăng Tơlơi phiăn lŏn tơnah thun 2024 amăng lơ 1/7/2024.