Pơhrŏ 10% mrô sang anŏ ƀun rin ră anai, hơdôm thun hlâo kơ anai, anai lĕ mrô rơnoh sa tơlơi dŏ čang rơmang đôč, ƀơi anŏ ƀu pơmin nao ôh ngă tui hơdră pơhrŏ ƀun rin ƀơi djop tơring čar kual kơdư yŭ Tây Bắc rim thun, yua kơ ƀuh sit nik, rơnoh pơkă juăt ñu mơ̆ng 3-4%. Samơ̆ ƀơi tơring glông Sông Mã, tơring čar Sơn La, amăng 3 thun giăm anai, mrô sang anŏ ƀun rin hrŏ trun rơbêh 10%. Hơmâo hơdôm boh să kah hăng Chiềng Khoong, Mường Hung….mrô anai dŏ lu hloh kơ anun. Ơi Đặng Văn Cương, Kơ-iăng Khua jơnum min mơnuih ƀôn sang să Chiềng Khoong, tơring glông Sông Mã, tơring čar Sơn Lan brơi thâo:

“Amăng hơdôm thun laih rơgao, să Chiềng Khoong hrŏ trun mơ̆ng 10-14% mrô sang anŏ ƀun rin, kah hăng thun 2023 lĕ 14%, akŏ bruă či ngă tui amăng thun 2024 lĕ 12%”.

Tui hăng ơi Cương lăi, dưi hơmâo boh tơhnal kah hăng anai lĕ yua hơmâo djop gưl anom bruă, gong gai kơnuk kơna mơ̆ng tơring čar trun pơ tơring glông, să hơmâo ngă tui khut khăt brơi pơblih pơjeh djuai phun pla hlô mơnong rông kiăng pơđĭ kyar bruă pơkra ming gơnam sĭ mơdrô tui hăng anŏ gêh găl mơ̆ng plơi pla. Kah hăng să Chiềng Khoong, hneč mă anŏ thâo hơmâo gêh găl lŏn hmua, lŏn đang pơprong, ngă tui jơlan hơdră mơ̆ng tơring čar pơtrun, tơring glông pơtô brơi pơblih đang kơtor, đang hơbơi plum ƀu tŭ yua pioh pla phun boh troh truh ră anai, đơ đam đang boh troh amăng să hơmâo giăm 1.400 hektar, amăng anun đang boh sầu riêng rơbêh 1.100 hektar.

Ƀơi tơring čar Yên Bái, pơtong rơđah hơdră pơtrun mơ̆ng dêh čar brơi pơtrut pơđĭ kyar bơwih ƀong huă kơ mơnuih mơnam kual djuai ƀiă hăng čư̆ siăng mơ̆ng thun 2021-2030 jing sa bruă mă yôm biă mă, kiăng ngă tui hơdră pơđĭ kyar hơđong kjăp amăng kual plơi pla mơnuih djuai ƀiă hăng čư̆ siăng, yua kơ anun, tơring čar, plơi pla pơ anai kơtưn ngă tui lu hơdră pơsir bruă ngă tui hơdră anai. Amăng anun, rơngiao kơ nao jơnum, hră tui bruă mă mơ̆ng dlông pơtô brơi, tơring čar Yên Bái ăt đing nao kơ bruă pơphun brơi khul, grup hyu ĕp lăng, hrăm tui tơlơi thâo thăi, găn rơgao amăng bruă mă ngă hmua pla pơjing mơ̆ng djop tơring čar amăng kual, ĕp lăng ngă tui hơbô̆ bruă bơwih ƀong huă tŭ yua, kiăng pơblih tơlơi pơmin, pơđĭ tui tơlơi thâo hluh kơ mơnuih ƀôn sang djuai ƀiă pơđĭ kyar bơwih ƀong huă hăng pơtrut tañ pơhrŏ mrô sang anŏ ƀun rin. Ayong Giàng A Tuấn, dŏ pơ să La Pán Tần, tơring glông Mù Cang Chải, tơring čar Yên Bái lăi:

“Tơdơi kơ ta dưi hrăm tui, thâo ƀiă amăng bruă mă, hơmâo bruă mă hơđong, sa hrơi mă bruă dưi ĕp mơ̆ng 400-500 rơbâo prăk”.

Hrŏm hăng rơnoh prăk čan mơ̆ng Hơdră dêh čar pơtrun, kiăng pơtrut bruă mă bơwih ƀong huă kơ mơnuih mơnam kual mơnuih djuai ƀiă hăng čư siăng mơ̆ng thun 2021-2030, mơ̆ng akŏ thun truh ră anai, tơring čar Yên Bái ăt hơmâo pơtum lu mơnuih djru hrŏm, prăk kăk čan pioh pơtrut bơwih ƀong huă pơđĭ mơnuih mơnam kual djuai ƀiă hăng čư̆ siăng, pơtum djru nao kơ bruă ngă hmua pla pơjing, tuh pơ alin čuk pơkra jơlan glông nao rai, bruă pơtô hrăm, bruă ia jrao, pơhrŏ ƀun rin, man pơdong plơi pla phrâo….Yua kơ anun yơh, mrô sang anŏ ƀun rin đơ đam tơring čar amăng thun 2023 hrŏ trun 3,76%, lu hloh rơnoh pơkă hlâo kơnong 3,5%.

70 thun laih rơgao, tơdơi kơ pơklaih rơngai, Điện Biên ră anai jing sa amăng hơdôm tơring čar pơđĭ kyar hmar hloh amăng mrô 14 boh tơring čar amăng kual čư̆ siăng hăng treng tơkai čư̆ pơ Kơdư dêh čar. Thun 2023, rơnoh pơđĭ kyar GRDP mơ̆ng tơring čar dưi ngă 7,1%, lu hloh tơhnal pơkă mơ̆ng Hră pơtrun jơnum ruah khua ping gah tơring čar, tŭ mă boh tơhnal lu hloh pơkă hăng lu tơring čar pơkŏn amăng dêh čar, sa amăng mrô 14 boh tơring čar pơđĭ kyar hmar amăng kual čư̆ siăng treng tơkai čư̆ gah Kơdư. Rơnoh prăk pơhrui glăi mơ̆ng bruă mă čơkă tuai nao ngui hơmâo 1.750 klai laih anun jing thun blung a tơring čar ngă tui bruă čơkă tuai nao ngui truh 1 klăk wơ̆t. Mrô sang anŏ ƀun rin dŏ năng ai 26%.

Ơi Lê Thành Đô, Khua Jơnum min mơnuih ƀôn sang tơring čar Điện Biên brơi thâo: Dưi hơmâo boh tơhnal lĕ yua tơring čar hơmâo hneč mă anŏ gêh găl mơ̆ng tơring čar hơmâo laih mơ̆ng hlâo, biă mă ñu rơnoh gru grua phun anih anom blah ngă hing ang Điện Biên Phủ; pơđĭ tui boh tơhnal bruă mă pơhưč tuyh pơ alin hăng pơhrui prăk arăng nao tuh pơ alin mă bruă. Hrŏm hăng anun, ngă tui sa hnong, tŭ yua hloh hơdôm bruă pơtrun ngă, hơdră pơsir kơƀah prăk kăk tuh pơ alin, kơƀah mơnuih mă bruă, boh nik ñu rơnoh tuh pơ alin hăng boh tŭ yua amăng bruă mă bơwih brơi kơ djop bruă phun, yôm, anŏ kơtang gêh găl tuh tia pơkra ming, bruă ngă hmua pla pơjing tui boh thâo ia rơgơi, čơkă tuai hyu ngui….

Ơi Lê Thành Đô, Khua jơnum min mơnuih ƀôn sang tơring čar Điện Biên lăi pơtong

“Amăng hrơi blan pơ anăp, khua mua tơring čar ƀuăn amra gir run hloh, pơblih phrâo bruă mă thâo pơčeh hmar ƀiă, ngă tui khut khăt hloh amăng bruă git gai, wai lăng, pơčrâo bruă tui tơlơi pơtrun, lăng anŏ gêh găl, djơ̆ hrơi mông găn rơgao hĭ tơlơi lông lăng, tơnap tap, kiăng akŏ pơdong bruă mă pơđĭ kyar tơring čar Điện Biên jing tơring čar pơđĭ kyar hmar hloh amăng kual”.

Bruă ngă tui hơdră pơhrŏ ƀun rin tañ, hơđong kjăp ƀơi hơdôm tơring čar kual Tây Bắc (Kơdư Yŭ) hơmâo boh tơhnal tŭ yua klă hiam, yua djop gưl anom bruă ping gah, gong gai kơnuk kơna tơring čar, plơi pla ngă tui hơdră mă bruă djơ̆ găl, pơtum abih bang glông amăng bruă kơđi čar mut hrŏm djru mă bruă hur har, sem hơduah, pơtrut ngă tui laih anun ba yua anŏ gêh găl, tơlơi kơtang mơ̆ng rim kual, plơi pla, tơring čar….Boh nik ñu, Hră pơtrun mrô 11 lơ 10/2/2022 mơ̆ng Ding jum kơđi čar kơ anăp ngă bruă pơđĭ kyar bơwih ƀong huă mơnuih mơnam, pơhlôm rơnuk rơnua amăng kual treng tơkai čư̆ hăng kual čư̆ siăng gah kơdư dêh čar ta truh thun 2030, lăng nao pơ anăp adih truh thun 2045 hlăk ngă tui, pok pơhai lăng kah hăng gai trul pơtrut djru hrŏm amăng kual pơđĭ kyar kơtang hloh.