Thun 2023 laih rơgao, khul apăn bruă Ping gah plơi Chứ, să Ya Ly, tơring glông Sa Thầy hơmâo pơmut 2 čô mơnuih apăn bruă Ping gah phrâo djuai ania Jarai anun lĕ A Nói hăng Phạm Quang Anh. Khua git gai ngă rah khua plơi Chứ, A Thoải brơi thâo, khul ăt hơmâo ruah mă 3 čô mơnuih ba gru djuai ania Jarai, hơmâo Y Phư, A Hlưm hăng A Num kiăo tui hrăm anih pơtô mut Ping gah. Ƀing gơñu lĕ ƀing ba gru amăng pơđĭ kyar bơwih ƀong amăng sang anŏ anun lĕ ba jơlan amăng man pơdong plơi pla phrâo. Tui Khua apăn bruă Ping gah A Thoải, tơdah kiăng mơnuih ƀôn sang hmư̆, đăo gơnang hăng ngă tui rĭm čô mơnuih apăn bruă Ping gah kiăng bơwih ƀong rơgơi, ba jơlan hlâo amăng hơdôm bruă mă ƀơi ƀon lan:

“Thun laih rơgao, khul apăn bruă Ping gah gơmơi hơmâo pơmut 2 čô mơnuih apăn bruă Ping gah, rơnuč thun pơmut dong 1 čô. Ƀing gơmơi hơmâo rơkâo kiăo tui hrăm hlâo pơmut lĕ 3 čô. Amăng thun anai amra pơhlôm pơmut 5 čô tui hơnong pơkă. Yua kơ hơmâo tơlơi đing nao, git gai na nao, pơsur pran jua hmao tlôn yua anun kah dưi ngă. Ră anai, ƀing gơmơi glăk tŏ tui pok pơhai man pơdong plơi pla phrâo, kiăng hur har, pơtô pơblang lăp djơ̆, gum pơgôp, hơdeč hmar. Man pơdong plơi pla phrâo kiăng ba glăi boh tŭ yua sit nik. Kơnuk kơna hơmâo đing nao kiăng ƀing ta hrưn đĭ, anăm dŏ tơguăn kơnuk kơna, gơgrong mă pô. Tơdơi anai, ană tơčô amra tŭ mă hơdôm tơlơi dưi anai, anun lĕ jơlan hiam ruah, tơlơi hơdip hiam klă djop mơta, anai lĕ tơlơi mơ̆ ƀing gơmơi glăk anăp nao”.

Ping gah să Ya Ly, tơring glông Sa Thầy, ră anai hơmâo 9 khul apăn bruă Ping gah hăng 81 čô, amăng anun hơmâo 34 čô mơnuih apăn bruă lĕ djuai ania ƀiă. Mơng akŏ rơwang mă bruă truh ră anai hơdôm khul Ping gah să Ya Ly hơmâo pơmut 22 čô mơnuih apăn bruă Ping gah phrâo. Kơnong thun 2024 khul apăn bruă 3 boh plơi: Chư, Tum, Chờ him lăng pơđĭ kyar mơng 5-7 čô mơnuih apăn bruă Ping gah phrâo lĕ djuai ania ƀiă amăng plơi pla.

Khua git gai Ping gah să Ya Ly Phan Chí Thiện brơi thâo: hluai tui bruă mă, hơdôm mông jơnum pơƀut, bruă mă mơng mơnuih ƀôn sang, gưl Ping gah, khul grup hăng rĭm čô mơnuih apăn bruă Ping gah lêng gơgrong pơhrăm, ĕp ƀing mơnuih phrâo, ba gru amăng plơi pla. Kiăng khul prong kơtang, gum pơgôp tum pơƀut abih bang mơnuih ƀôn sang amăng hrơi blan pơđĭ kyar mơnuih apăn bruă Ping gah lĕ kiăng ruah ƀing mơnuih arăng đăo gơnang amăng tơlơi hơdip, bruă mă rĭm hrơi hăng thâo rơgơi amăng bơwih ƀong. Laih dong đing nao, črâo ba, čung ba ƀing hlăk ai thâo hră. Khua git gai Ping gah să Ya Ly, ơi Phan Chí Thiện pơsit tong, yua hơmâo pơjing khul grup, Ping gah jai hrơi prong kơtang, ngă tui pran gơgrong mơng rĭm čô mơnuih apăn bruă Ping gah, sit biă ñu lĕ amăng 3 boh plơi pla djuai ania ƀiă, truh rơnuč thun 2023 să Ya Ly, tơring glông Sa Thầy hơmâo pơgiong 19/19 hơnong pơkă man pơdong plơi pla phrâo:

“Hluai tui ƀing apăn bruă Ping gah amăng khul apăn bruă, ƀing apăn bruă ƀơi khul grup ngă rah khua plơi, mơnuih apăn bruă Ping gah ƀơi rĭm boh plơi pla djru brơi lu biă mă kơ Ping gah să amăng bruă pok pơhai hơdôm tơlơi črâo trun, hơdră mơng Ping gah, tơlơi phiăn mơng Kơnuk kơna. Sit biă ñu amăng thun laih rơgao, lơm ƀing gơmơi man pơdong plơi pla phrâo, ƀing gơmơi pơsur neh met wa pơyơr lŏn, pơkra jơlan, djru hrơi mă bruă, rơmet pơagaih jum dar mơtah-agaih-hiam amăng plơi pla, anai lĕ hơmâo tơlơi gơgrong mơng ƀing apăn bruă Ping gah”.

Thun 2023 Ping gah tơring glông sa Thầy, tơring čar Kon Tum hơmâo pơmut 97 čô mơnuih apăn bruă Ping gah phrâo, dưm dưm 102% pơhmu hăng hơnong pơkă đĭ tui mrô mơnuih apăn bruă Ping gah truh pơ 2.033 čô. Truh ră anai abih bang 64 plơi pla amăng tơring glông hơmâo pơgiong bruă pơsit brơi Khua git gai Ping gah ngă ruah khua plơi ƀudah khua anom bruă djop djuai ania mơnuih mơnam. Yă Y Sâm, kơ-iăng khua git gai Ping gah tơring glông, Khua khul pơ ala mơnuih ƀôn sang tơring glông Sa Thầy brơi thâo, kiăng ƀing hlăk ai amăng plơi pla thâo hră dưi pơmut amăng Ping gah, Ping gah tơring glông Sa Thầy hơmâo đing nao amăng bruă pơjing khul apăn bruă prong kơtang pơlir hăng bơwih ƀong-mơnuih mơnam amăng plơi pla pơđĭ kyar.

“Ƀing gơmơi đing nao bruă pơđĭ kyar mơnuih apăn bruă Ping gah kual ƀon lan hăng sit biă ñu bruă pơđĭ kyar mơnuih apăn bruă Ping gah djuai ania ƀiă. Ƀing gơmơi hơmâo pơtrut pơđĭ kyar bơwih ƀong amăng sang anŏ mơnuih djuai ania ƀiă, anun lĕ đing nao yua boh thâo amăng pla pơjing, rông hlô kiăng mơnuih ƀôn sang đăo gơnang amăng bruă git gai mơng Ping gah. Găn bruă mă tong ten mơng rơnuk hlăk ai pơdah tơlơi đing nao mơng gong gai, Ping gah nao kơ bruă pơđĭ kyar bơwih ƀong kah hăng bruă pơmut ƀing apăn bruă Ping gah hlăk ai. Hluai tui anun ƀing gơmơi ăt prap lui, pơtô hrăm brơi hlăk ai kiăng pơmut amăng Ping gah”.

Mơng bruă pơjing khul apăn bruă hơđong kjăp pơlir hăng pơđĭ kyar bơwih ƀong-mơnuih mơnam amăng ƀôn lan, tui sem lăng mơng Ping gah tơring glông Sa Thầy, jơlan gah bruă mă mơng khul apăn bruă amăng djop plơi pla hơmâo pơplih, lăp djơ̆, sit nik ƀiă dong. Anai lĕ tơring glông giăm guai amăng tơring čar Kon Tum hăng anai lĕ kual tơlơi bơwih ƀong-mơnuih mơnam tơnap tap hlâo anun truh rơnuč thun 2023 tơring glông Sa Thầy hơmâo 4 boh să đĭ plơi pla phrâo, pơhrui rĭm akŏ mơnuih giăm 52 klăk prăk. Đơ đam tơring glông hơmâo 54/64 plơi pla tŭ yap plơi pla gru grua./.