Ayong Đinh Văn Tây dŏ ƀơi să Ia Klar nao pơ anih ngă hră hăng brơi glăi hră pơ-ar ngă pơgiong kơ mơnuih ƀôn sang amăng tơring glông Đức Cơ, tơring čar Gia Lai kiăng kơ ngă hră duh jia. Rơngiă giăm 30 mơnit ñu dưi ngă pơgiong hră pơ-ar:

“Mơnuih apăn bruă ƀơi anai hur har pran jua, mă bruă tañ biă mă. Kâo juăt rai ha wŏt amra ngă pơgiong mơtăm, tơdah gun găn hơget thơ ƀing gơñu amra lăi pơthâo kiăng ta pơplih pơkra glăi, tơdah huăi hơget amra tañ biă mă”.

Tui yă Hồ Thị Hiền, kơ-iăng khua anom bruă ngă hră pơ-ar tơring glông Đức Cơ, djơ̆ pran, ƀu djơ̆ pran hăng tŭ biă mă lĕ 3 tơhnal pơkă kiăng mơnuih ƀôn sang ƀơi Đức Cơ čom puang tơdơi kơ nao bưp ƀing apăn bruă ngă hră pơ-ar. Thun 2022, mrô djơ̆ pran amăng ngă hră pơ-ar mơng tơring glông Đức Cơ dong tal 5 amăng mrô 17 boh tơring glông, plơi prong:

“Tơlơi pơsit mơng mơnuih ƀôn sang hăng bruă djru ngă hră pơ-ar mơng anom bruă kơnuk kơna lơm ƀing gơñu nao mă bruă kiăng ngă hră pơ-ar, tơdơi kơ prap lui djop hră pơ-ar, ƀing gơñu amra hơmâo ƀing apăn bruă črâo brơi bruă ngă hră pơ-ar, tơdơi anun ƀing apăn bruă amra brơi hră pơ-ar kơ mơnuih ƀôn sang kiăng lăi pơthâo bruă mă ƀơi anai djơ̆ hăng tơlơi kiăng hă ƀŭ. Tơdah djơ̆ pran ƀing gơñu amra čih lăi pơthâo, tơdah aka ƀu tŭ ư ôh amra čih lăi pơthâo kiăng tŏ tui pơplih pơkra pơ anăp dong kiăng klă ƀiă dong”.

Ăt đĭ tui mrô pơkă djơ̆ pran mơnuih ƀôn sang, anom bơwih ƀong sĭ mơdrô lơm nao ngă hră pơ-ar, ƀơi tơring čar Quảng Ninh, hơdôm pok hră pơ-ar tui tơlơi glăm ba kiăng ngă brơi mơng ƀon lan lêng kơ hơmâo tĕp lăi pơthâo ƀơi hơdôm anih anom mă bruă hăng plang điện tử. Ơi Bùi Tuấn Anh, kơ-iăng khua gơnong bruă ngă hră pơ-ar tơring čar Quảng Ninh brơi thâo:

“Quảng Ninh git gai djop gưl gong gai, gưl să pơtô pơblang hăng lu mơta tơhnal. Mơng tĕp lăi pơthâo ƀơi anih anom mă bruă ƀơi să, sang gru grua truh pơ bruă pơtô pơblang amăng loa, anom pôr pơhing rĭm tlam mơmŏt kiăng hơdôm tơlơi pơkă, hơdră bruă mơng gơnong glông, ƀon lan tan truh pơ mơnuih ƀôn sang, kiăng mơnuih ƀôn sang hluh rơđah hăng pơgôp hiăp. Hăng hơdôm tơlơi pơmĭn phara, ƀing gơmơi amra pơphun rĭm blan kiăng hmư̆ tơlơi pơgôp hăng pơsir hĭ hơdôm anŏ aka ƀu klă”.

Sa, dua boh tơring čar, plơi prong anun lĕ Quảng Bình, Quảng Trị, ƀôn prong Hồ Chí Minh hơmâo ngă truh kih tơlơi pơčeh “Mơnuih ƀôns sang čom puang” hăng 6 tơhnal pơkă hơmâo: Pran mă bruă, črâo ba; hrơi mông mă bruă; hrơi mông brơi glăi hră pơ-ar tui tơlơi pơkă; prăk duh ƀu sit nik hăng bruă mă djơ̆ tơlơi kiăng. Mrô pơkă djơ̆ pran mơng kơnong hơmâo 7 amăng puang 9, hơmâo đĭ rơbêh puang 8, đa hơmâo anih puang 9. Nai prin tha Lê Đặng Trung, Khua kông ti sem lăng hrơi mông sit nik, sa amăng hơdôm anom bruă blung a mut hrŏm čom puang brơi thâo:

“Kiăng ngă pơjuăt brơi mơnuih ƀôn sang wŏt hăng ƀing apăn bruă, anai lĕ tơlơi pơgôp hiăp tơdơi kơ ngă tui hơdôm bruă anai, anai lĕ sa bruă kiăng ngă. Kâo pơmĭn anai lĕ tơlơi truh kih prong biă mă, yua sui laih among rơkâo brơi, ƀu djơ̆ kơnong mơng anom bruă kơnuk kơna đôč ôh mơ̆ wŏt mơng mơnuih ƀôn sang dong. Hăng plang lăi pơthâo tañ, tơpă sit, ngă gêh gal kiăng mơnuih ƀôn sang dưi lăi pơthâo mơ̆ ƀu hŭi hơget ôh, laih dong ăt dưi pơsit tong amăng bruă pơsir hĭ hơdôm tơlơi pơgôp hiăp”.

Thun 2022, mrô pơkă mă bruă djơ̆ pran amăng ngă hră pơ-ar ƀơi 63 boh tơring čar, ƀôn prong lĕ 80,08%. Tui jŭ yap mơng Ding jum wai lăng ngă hră pơ-ar, mrô anai amăng thun 2023 (amra lăi pơthâo amăng rơwang tal 2 thun 2024), amra truh pơ 87,7%. Hơdôm bruă pơplih khut khăt amăng ngă tui yua boh thâo phrâo anăp nao pơjing lŏn ia hiam klă, bruă ngă hră pơ-ar jê̆ giăm, yua kơ mơnuih ƀôn sang glăk ba glăi lu tơlơi dưi yôm, pơtrut pơsur rĭm čô mơnuih, ƀon lan pơgiong gơnam măi mok pioh yua amăng pơplih ngă hră pơ-ar./.