Amăng rơwang bruă phrâo rơgao, bruă “Čơđai gưl dlông 5 klă” jing bruă čơđai gưl dlông phun, dưi hơdôm gưl Khul čơđai gưl dlông Việt Nam đing nao pok pơhai hluh gah hăng lu jơlan gah phrâo, pơčeh phrâo. Kiăng ƀuh rơđah hloh bôh tơhnal dưi ngă, pơsit hơdôm jơlan gah pơplih phrâo amăng bruă pok pơhai bruă “Čơđai gưl dlông 5 klă” pơ̆ anăp anai, Võ Đức Phúc, pơ ala kơ Khul čơđai gưl dlông Việt Nam ƀôn prong Hồ Chí Minh lăi lĕ: pơplih phrâo lĕ tơlơi sit yơh, jing tơlơi phun bruă mă jing gru nam kiăng mă čơđai gưl dlông lĕ pô phun mơ̆ng bruă mă anai.

 “Ƀing ta pơplih phrâo tơlơi pơmin, mă tơlơi pơmin djơ̆ lĕ phun than kơ tơlơi pơmin djơ̆, tơhnal lăng phrâo, bruă mă lăp djơ̆. Hăng čơđai gưl dlông, ƀing ta khom pơplih phrâo tơlơi pơmin tui jơlan gah pioh čơđai gưl dlông thâo, hluh, đăo gơnang, kiăng khăp bruă, mơ̆ng anun drơi pô ƀing gơyut pơtrut pioh jing mơnuih hăng pơđĭ kyar. Hăng hơdôm gưl mơnuih apăn bruă, ƀing ta khom pioh kơ ƀing gơyut tơlơi pơmin lĕ, ƀing gơyut jing pô črâo bruă, laih anun jing pô čơkă mă bruă. Ƀing gơyut khom jing pô kơjăp pran jua mơ̆ng bruă mă pioh ană mơnuih jing pô, asar pông mơ̆ng bruă mă”.

Anăn pia bruă mă: Čơđai gưl dlông Việt Nam, kơjăp gru grua – hmâo lu tơlơi čang rơmang – pơčeh phrâo pơgi kơdih anai – pơdŏng lŏn ia amra rŭ tơgŭ kơtang tit amăng čơđai gưl dlông Việt Nam čang rơmang pơđĭ kyar lŏn ia pơdrŏng kơtang, thâo rơgơi, yâo mơ-ak, pơtŏng sit tơlơi đăo gơnang mơ̆ng čơđai gưl dlông pioh kơ Ping gah, Kơnuk kơna, hơdră pơkă djop mơnuih dưm kơnar. Mai Hải Yến, Khua Khul čơđai gưl dlông Sang hră pơtô bruă mơnuih apăn bruă ƀôn prong Hồ Chí Minh lăi lĕ:

 “Jơnum thun anai kâo lăng djơ̆ pran biă hăng bôh pia yua kơ ñu hmâo gru nam klă biă hăng kâo biă ñu lăng djơ̆ pran hăng bôh pia "Kơjăp gru grua" anun kâo čang rơmang amăng rơwang bruă pơ̆ anăp, Khul čơđai gưl dlông Việt Nam ăt kah hăng hơdôm gưl khul amra pơjing lu anih anom pioh ƀing gơyut bư̆ bôr tơlơi pơmin, pơhrăm pran jua kơnuih mă bruă pioh ƀing gơyut dưi pơtŏng sit gru grua rơnuk pô ăt kah hăng tô̆ tui bruă pơdŏng pơjing gru grua čơđai gưl dlông Việt Nam".

Hăng anăn ñu “Jơlan gah pơtrut kơtang hơdôm bruă mă pơjing anih anom pơsĭt jơlan gah, bư̆ bôr tơlơi pơmin hơdip kơ čơđai gưl dlông amăng tơlơi phrâo”, Vũ Thu Hằng, čơđai gưl dlông 5 klă ƀôn prong Hà Nội lăi pơthâo amăng mông Jơnum Khul čơđai gưl dlông Việt Nam:

 “Amăng mông pơplih mrô ăt kah hăng đơ đam rŏng lŏn tơnah pơphun kơtang kah hăng ră anai brơi ƀing ta lu tơhnal pơđĭ kyar samơ̆ hrŏm hăng anun ba tơbiă hơdôm tơlơi tơnap tơlơi lông amăng bruă pơhrăm pran jua kơđi čar kơ čơđai gưl dlông...”

Kiăng djơ̆ tui tơlơi kiăng mơ̆ng bruă hơkrŭ amăng rơwang phrâo, bruă mă mơ̆ng čơđai gưl dlông hăng khul čơđai gưl dlông khom ƀu pơdơi tơlơi gir run hrưn đĭ, pơplih phrâo kơtang bôh yôm hăng jơlan gah bruă mă, ngă tui bruă ba jơlan hlâo pơčeh phrâo mơ̆ng čơđai gưl dlông. Nguyễn Tuấn Thành, Sang hră jar kơmar (Đại học quốc gia Hà Nội) lăi lĕ, hrŏm hăng tơlơi gum hrŏm mơ̆ng Khul čơđai gưl dlông, rim čơđai gưl dlông khom gơgrong hlâo, gir run, pơčeh phrâo amăng djop bruă mă pơhrăm, bơkơtuai pioh pơčeh phrâo pơgi kơdih anai, pioh Việt Nam jing lŏn ia dưm kơnar hăng hơdôm bôh dêh čar 5 kual kah hăng Wa Hồ čang rơmang:

 “Bruă mă khul, grŭp brơi kâo tơlơi pơbưp nit nik hăng hơdôm rơwang bruă hmâo sit, hăng ană mơnuih sit nik, pơđĭ tui bruă mă grŭp, khom pơplih tañ drơi pô hiưm hơpă amăng anih anom tui anun. Hăng kâo hmâo pok prong tô nao rai mơ̆ng kâo hloh dong hơdôm tơlơi rô nao rai rơnuk anai leng kơ ƀing gơyut rai mơ̆ng hơdôm bruă mă grŭp, khul anun lĕ hrăm ƀơi sang hră anih hrăm hmâo grŭp gơyut gum hrŏm. Kâo gum hrŏm bruă pơplông pok phun bruă mă lĕ ta ăt khom hmâo team (grŭp) anun jing bruă pô pok prong tô nao rai amăng bruă mă mơnuih mơnam tui anun djru kâo jing hơdôm grŭp gơyut hăng dưi ngă tơhnal pơkă hrŏm”.

Čang rơmang pơdŏng Khul čơđai gưl dlông Việt Nam kơjăp kơtang, djru pơdŏng, pơgang Ping gah hăng glông bruă kơđi čar, ngă tui ha amăng plĕ hơdôm jơlan gah pơdŏng Khul kơjăp kơtang, grum hrŏm hơbit prong čơđai gưl dlông; gum hrŏm klă pơdŏng, pơgang Ping gah hăng glông bruă kơđi čar. Nguyễn Nguyệt Anh, Kơ-iăng Khua Khul čơđai gưl dlông Vinh lăi lĕ, hrom hăng bruă hrăm hră lĕ čơđai gưl dlông khom gơgrong hlâo hmâo lu tơlơi pơčeh phrâo, kơsem min bôh thâo, djru bôh thâo kơ lŏn ia, pơđĭ dlông bôh thâo kơ drơi pô:

 “Bruă mă mơ̆ng čơđai gưl dlông ƀu djơ̆ kơnong kơ hrăm bruă ôh mơ̆, dô̆ kơsem min bôh thâo phrâo dong, anun lĕ anô̆ pha ra hăng ƀing gơyut čơđai sang hră gưl 3. Pơ̆ anăp anai, čang rơmang lĕ, hăng hơdôm bruă kơsem min bôh thâo phrâo hmâo hơdôm bruă pơplông klă hloh hăng hmâo tơlơi gum djru pơtô pơhrăm na nao mơ̆ng ƀing nai pơtô, ƀing juăt bruă gah bôh thâo phrâo”./.