Blan 5/2023, Thiếu tá tơhan plơi juăt bruă Lê Thị Minh Thủy nao mă bruă ƀơi bul ia rơsĭ Trường Sa. Tơdơi kơ 35 thun, yap mơ̆ng hrơi ama ñu, Lê Đình Thơ pơsăn drơi lơm dô̆ mă bruă pơgang bul ia rơsĭ Trường Sa, ñu mơ̆ng dưi ngă tui tơlơi čang rơmang mơ̆ng pô – Nao čuă hăng tuĭ ñang kơ ama ñu hrŏm hăng 63 čô ƀing gŏp ama ñu. Amăng krah ia rơsĭ tơglăk Trường Sa, ñu ruai glăi kơ ama ñu amăng pran jua hmư̆ kơ tơlơi hơdip mơda, bruă mă ră anai hăng tơlơi čang rơmang dưi tô̆ tui yak ama ñu kač rup hla kak ia rơsĭ, djru pơgang ia rơsĭ, bul ia rơsĭ mơ̆ng Lŏn ia.

 “Lơm kâo nao pơ̆ Trường Sa, sit nik hmâo sa tơlơi mưn ƀuh tơnap lăi pơdah biă. Anai lĕ tơlơi mơ̆ kâo dô̆ pơmin sui laih. Lơm dưi tlaih guang bơnga hrŏm hăng ƀing adơi ayong, adơi amai ƀơi ƀat tô hơdor glăi kơ ama ñu hrŏm hăng 63 čô ƀing gŏp ama ñu hmâo pơsăn laih drơi jăn amăng lơ 14/3/1988, čang rơmang pơtă hăng ama hrŏm hăng ƀing gop ama rơbuh đih lĕ: Ama hăng ƀing met wa hơđong pran jua, ană hăng ƀing gŏp tô̆ tui dong tơlơi čang rơmang mơ̆ng ama hăng ƀing met wa, amra gir run lu hloh dong”.

Ama amai Minh Thủy, pơsăn drơi Lê Đình Thơ hmâo ha tal lĕ mơnuih apăn bruă Grŭp pơkă čih kač rup hla kak hăng kơsem min ia rơsĭ, pơsăn drơi lơm ñu 1 thun. Hơdôm blan tơdơi kơ hrơi ama ñu rơngiă, amĭ ñu ăt rơngiă hĭ mơn. Ñu prong đĭ amăng tơlơi kiăng khăp mơ̆ng sang anô̆ gah ama hăng amĭ ñu hăng tơlơi lăng ba mơ̆ng ƀing met wa amăng puih kơđông mơ̆ng amĭ ama. Hrăm giong Đại học Mỏ - Địa chất, hrăm gah pơkă lăng hla kak, ñu nao mă bruă ƀơi Grŭp pơkă čih kač rup hla kak hăng kơsem min ia rơsĭ, hăng čang rơman dưi yak tui jơlan mơ̆ ama pô hmâo nao.

Amăng tal nao mă bruă pơ̆ Trường Sa, rơngiao kơ bruă tŭ yua dưi čuă anih ama pô mă bruă, amai Minh Thủy ƀơi anăp lăng hyu hơdôm pŏng pơgăn luh tuh, hơdôm bơnư̆, akô̆ kli, tơdrŏn bôh pơtâo sa hô, ƀơi anăp lăng ƀuh ia ayom ia rơsĭ ƀơi anih dơlăm, dơlăm pha ra. Anun lĕ hơdôm anô̆ kiăng sit yôm phăn kơ bruă čih kač hla kak ia rơsĭ mơ̆ng ñu hăng ƀing gŏp.

Tơlơi tŏng ten, kơđiăng hăng hor kơ bruă, tơlơi kiăng khăp kơ bruă hmâo mut laih amăng drơi jăn ñu, amăng rim gru kač, bruă mă hmâo jao. Thủy ruai glăi, rim wot hmâo mă mrô mơ̆ng hơdôm anih anom amăng anom bruă, ñu gir run tum pơƀut, pơsir, čih dăp hăng pơdah tơpă, djơ̆ sit hloh, ngă hiưm hơpă hơdôm rup kač ia rơsĭ klă hiam hloh, pơhlôm abih bang kơ mơnuih hyu amăng ia rơsĭ. Amăng thun rơgao, ñu hrŏm hăng ƀing gŏp ngă giong hla kak čih mrô ƀơi anih anom hăng pơjing hla kak ƀơi tur ia rơsĭ mrô 1:100000 hmâo 196 tơhla; dăp hơdră, tŭ mă hơdôm rơtuh tơhla hla kak mrô pioh kơ bruă pơgang lŏn ia. Amai Lê Thị Minh Thủy hur har lăi pơthâo kơ hơdôm hơdră mă yua măi mok phrâo amăng bruă hla kak.

 “Thun giăm anai hloh pioh ƀing gơmơi hmâo dăp hơdră lĕ 196 tơhla hla kak ƀơi tur ia rơsĭ tal blung a pioh mă yua anăn phrâo lĕ Arcgis. Tơdơi kơ rơwang bruă ngă anun ƀing gơmơi dưi hmâo Khua dêh čar pơsit yôm. Rơngiao kơ hơdôm hla kak dăp hơdră amăng hơdôm anăn dưm amăng măi mơ̆ ƀing gơmơi ăt ngă mơn sui hăng anai, ƀing gơmơi dô̆ pok prong tơbiă dăp hơdră hơdôm anăn dưm amăng kompiutơr phrâo, črăn prong mă yua tơlơi Anglê yơh lu. Ngă juăt hăng hơdôm anăn phrâo dưm amăng măi hmâo pok tơbiă kơ ƀing gơmơi lu jơlan nao amăng bruă hla kak atur ia rơsĭ”.

Rơngiao kơ bôh thâo bruă hrăm dơlăm, amai Thủy rŏng hrăm mă tơlơi Anglê, hyu hơduah ĕp hăng mă yua lu anăn phrâo amăng măi, djru bruă dăp hơdră hla kak, kah hăng Arcgis, Paperchat Composer... Amai Thủy ăt lĕ sa amăng hơdôm mơnuih ba jơlan hlâo amăng bruă mă yua hơdră măi mok mrô amăng dăp hơdră hla kak, ngă juăt hăng hơdôm tơlơi phrâo amăng hla kak mơ̆ng rŏng lŏn tơnah. Rơngiao kơ mông mă bruă amăng anom, mơmot ñu hyu hơduah ĕp lăng ha jăn hơdôm bôh thâo phrâo, hơdôm gơnam mă yua kơsem min... Pran jua kiăng khăp hăng hơdôm hla kak ia rơsĭ, bul ia rơsĭ ngă ñu hmâo pran dong, kơjăp pran jua amăng bruă mă. Thiếu tá Nguyễn Văn Dũng, Khua Grŭp dăp hơdră hla kak lăng ƀuh kơ amai Lê Thị Minh Thủy:

 “Hăng bruă khua grŭp dăp hơdră hla kak, amai Thủy ngă giong klă na nao bruă mă; hơdôm tơlơi rơkâo, bruă jao dăp hơdră hla kak ia rơsĭ dưi hmâo khua git gai grŭp jao, ñu hmâo ngă giong klă, kơjăp. Bruă jao kơ ñu lĕ hơđong pran jua biă. Ñu hur har pran jua, thâo gir hrăm tui. Amăng bruă hla kak lĕ prong biă; khă dô̆ hlăk ai samơ̆ ñu gir pơhrăm, pơhrăm tui hăng tañ pơplih phrâo hloh kơ pô pơkon. Hăng mơnuih apăn bruă hlăk ai, samơ̆ Thủy dưi hmâo Khua anom bruă đăo gơnang, pơpha bruă gum hrŏm amăng lu rơwang bruă yôm phăn, kah hăng: rơwang bruă pơkă kual ia rơsĭ lŏn ia, rơwang bruă kơ hla kak ƀơi atur ia rơsĭ djru kơ bruă Ding jum, Anom bruă hla kak..."

Kreh kruñ gah tlôn hơdôm hla kak pioh rim tal nao pơ̆ ia rơsĭ mơ̆ng khul hơđong pran jua dong, hơdôm tơlơi gir run amăng bruă mă mơ̆ng Thiếu tá tơhan plơi juăt bruă Lê Thị Minh Thủy dưi čih djă pioh hăng lu hră bơni, ƀăng bơni mơ̆ng hơdôm gưl, Khul tơhan ia rơsĭ hăng Ding jum khul ling tơhan dêh čar, hơkrŭ đĭ pơgang hăng wai lăng Lŏn ia./.