Hăng bruă ngă kơđiăng hloh, tong ten hăng gơgrong ba, ƀơi mông jơnum lok 6, khua mua pơ ala mơnuih ƀôn sang dêh čar pơsit brơi kơdŭn glăi dơ̆ng ƀiă hrơi blan pioh ba yua ngă tui sit nik tơlơi phiăn lŏn mơnai čih pơhrua phrâo pioh ĕp lăng tong ten hloh anŏ bơbeč djơ̆, kiăng sit ngă tui tơlơi phiăn anai dưi pơhlôm brơi djop bruă mă amăng tơlơi hơdip mơda, biă mă ñu, tơlơi dŏ aka ƀu gêh găl, bơrơkua nao rai hăng tơlơi phiăn pơkŏn. Tơlơi anai hơmâo lu mơnuih tŭ ư hrŏm, dong yua mơ̆ng ƀing pơala mơnuih ƀôn sang. Khă tui anun, pô pơ ala Phạm Văn Hòa, grup pơ ala mơ̆ng tơring čar Đồng Tháp lăi lĕ, bruă pioh sui đơi, aka pơsit hĭ tơlơi phiăn Lŏn mơnai amra ngă tơnap kơ mơnuih ƀôn sang:

“Aka ƀu pơsit tơlơi phiăn Lŏn mơnai čih pơhrua glăi kâo pơmin kiăng biă mă yơh. Samơ̆, Tơlơi phiăn Lŏn mơnai khom pơsit amăng akŏ thun mơtam ƀu dưi lui sui ôh. Pioh glăi sui dơ̆ pă, ñu ngă tơnap lu amăng bruă mă, kơ yua Tơlơi phiăn Lŏn mơnai či ngă rung răng, gun hĭ amăng bruă mơnuih ƀôn sang. Yua kơ anun, Tơlơi phiăn Lŏn mơnai aka ƀu pơsit hĭ ôh lĕ hơmâo tơlơi jơnum ječ ameč akŏ thun 2024”.

Truh abih blan 12/2023, Tơlơi phiăn Lŏn mơnai čih pơhrua glăi hơmâo sem glăi tong ten laih amăng 232 lơ̆m 265 mơta tơlơi pơkă. Giong ĕp glăi, dŏ 35 mơta tơlơi, glông pơkă dưi hơmâo lu anom bruă brơi čih pơhrua glăi. Jơnum min bơwih ƀong huă mơ̆ng sang bruă pơ ala mơnuih ƀôn sang dêh čar lăi lĕ, tơdah jơnum ječ ameč amăng blan 1/2024, bruă pơsir prong biă mă, hrơi blan mă bruă ƀiă đơi, pơdah thâo hăng ƀing pơ ala mơnuih ƀôn sang pơsit hĭ kah hăng sa tơlơi lông lăng prong.

Ră anai, dŏ 3 mơta boh yôm phun ăt či lăi pơthâo hăng Jơnum min phun apăn bruă pơ ala mơnuih ƀôn sang dêh čar rơkâo Kơnuk kơna brơi ngă rơđah hloh, anŏ pơkă, kơnôl lăng nao tui tơlơi pơgôp hiăp sit nik laih anun dăp hơdră tong ten: pô mă yua lŏn pioh pơgang rơnuk rơnua dêh čar lir hơbit hăng bruă mă ngă hmua pơkra pơjing, man pơdong anih bơwih ƀong huă; kơ tơlơi dưi hăng bruă khom ngă mơ̆ng sang bruă sĭ mơdrô gah ling tơhan, kông an sit mă yua lŏn anih pơgang rơnuk rơnua, hơđong lir hơbit hăng bruă mă pơkra ming, ngă hmua bơwih ƀong huă; kơ boh yôm phun pơkă nua lŏn hăng tơdah tơlơi gêh găl ngă tui kơ rim hơdră.

Khua pơ ala mơnuih ƀôn sang dêh čar Vương Đình Huệ lăng yôm kơčăo bruă Tơlơi phiăn Lŏn mơnai čih pơhrua glăi yua yôm biă mă. Anun yơh, bruă čih pơkra glăi, pơhrua nao dơ̆ng hơdôm mơta tơlơi amăng tơlơi phiăn anai khom găn rơgao 3 wơ̆t jơnum lok laih samơ̆ ăt dŏ lu boh yôm pơkă kiăng pơtong glăi ten. Khua pơ ala mơnuih ƀôn sang dêh čar lăi, kiăng sem glăi lu tơlơi pơmin bruă kiăng hăng tơlơi pơkă phun. Amăng hơdôm tơlơi či lăi nao anun, dŏ 3 mơta tơlơi pơprong hăng lu tơlơi yôm pơkŏn. Tui anun yơh, hơmâo anŏ pơkă hăng kơnôk tong ten či pơdah thâo ƀing pơ ala mơnuih ƀôn sang pơsit hĭ kơčăo bruă Tơlơi phiăn Lŏn mơnai čih pơhrua glăi amăng mông jơnum ječ ameč lok 5:

"Ƀu dưi pơhrơ̆i dơ̆ng tah pơsit Tơlơi phiăn lŏn mơnai čih pơhrua anai. Yua kơ Hră pơtrun 18 hơmâo lăi rơđah khom ngă giong tơlơi phiăn Lŏn mơnai amăng thun anai. Tơdah pioh glăi tơl jơnum lok 7 lĕ sit mơ̆n ƀu djơ̆ kơnong hơjăn 2 tơlơi phiăn anai ôh. Jơnum lok 7 him lăng pơsit 9 mơta tơlơi phiăn. Tơdah pơ alin hrŏm 2 mơta tơlơi phiăn anai jing 11 mơta tơlơi phiăn dŏ lu bruă ngă pơkŏn dơ̆ng".

Him lăng, jơnum ječ ameč lok 5 mơ̆ng ƀing pơ ala mơnuih ƀôn sang dêh čar tal XV amra jơnum amăng 3 hrơi, pok pơhai amăng lơ 15/1/2024 pơ anăp, sem glăi hơdôm boh yôm phun pơprong, ječ ameč kiăng pơsir hĭ anŏ kiăng mơ̆ng bruă pơđĭ kyar lŏn ia dêh čar amăng anun kơčăo bruă Tơlơi phiăn Lŏn mơnai čih pơhrua glăi.