Tơlơi phiăn lŏn mơnai (čih pơkra glăi) pơkă tong ten hơdôm anih kơnuk kơna amra pơhrui glăi lŏn kiăng pơđĭ kyar bơwih ƀong huă-mơnuih mơnam yua kơ tơlơi dưi lŏn ia, mơnuih mơnam hăng lu črăn phrâo, pơphôm ngă pô, tơpă sit, bơkơnar, tong ten, hmao tlôn hăng lăp djơ̆ mơng tơlơi phiăn. Hrŏm hăng anun lĕ hơdôm bruă duh glăi prăk, gum djru, ĕp anih pơdong plơi phrâo, pơhrui glăi lŏn pơhlôm djơ̆ hăng tơlơi pơkă hơmâo tơlơi mut hrŏm mơng mơnuih ƀôn sang amăng djop rơwang, pơhlôm tơlơi pơkă mơnuih arăng pơhrui glăi lŏn amra duh prăk, ĕp anih pơdong sang, ngă hmua phrâo. Hăng hơdôm pơhrui glăi lŏn kiăng pơđĭ kyar hơdôm ring bruă sang dŏ sĭ mơdrô, tơlơi phiăn pơkă Kơnuk kơna dưi pơhrui glăi lŏn kiăng ngă tui akŏ bruă sang anŏ sĭ mơdrô, akŏ bruă sang dŏ pơƀut hăng sĭ mơdrô, bơwih bơwang samơ̆ kơnong hơdôm akŏ bruă tuh pơ alin man pơdong sang dŏ pơprong. Lơm ngă tui bruă pơhrui lŏn mơnai amra djơ̆ hăng hơdôm črăn amăng tơlơi pơkă. Tơlơi pơkă anai lĕ tơlơi yak nao yôm phăn, kiăng pơhlôm brơi tơlơi dưi mơng mơnuih ƀôn sang hăng bĕ hĭ bruă pơhrui lŏn ča čot. Trần Nhung, dŏ ƀơi Long Biên, Hà Nội brơi thâo:

“Ƀing gơmơi hok mơ-ak biă mă lơm Ƀirô Khua pơ ala mơnuih ƀôn sang dêh čar hmao tlôn pơplih pơkra, pơhrua tơlơi phiăn lŏn mơnai hăng dưi mă yua, hơmâo lu tơlơi pơplih, yua tơlơi dưi kơ mơnuih ƀôn sang. Čang rơmang tơlơi phiăn lŏn mơnai phrâo anai amra tañ ngă tui. Tơdah kơnuk kơna pok pơhai hơdôm ring bruă ba glăi tơlơi dưi mơnuih mơnam, pơgang rơnuk rơnua, ƀing gơmơi lêng kơ dong yua soh. Tơdah kual lŏn mơnai pơhrui glăi pioh man pơdong sang sĭ mơdrô ƀing gơmơi ăt dong yua mơn, samơ̆ yua ngă anih sĭ mơdrô kiăng pơsir tui nua sĭ mơdrô mơn”.

Tơlơi phiăn lŏn mơnai (čih pơkra glăi) hơmâo lu črăn pơplih tui jơlan gah wai pơgang tơlơi dưi kơ mơnuih ƀôn sang. Tui anun, ƀing mơnuih yua lŏn mơnai dong amăng kual lŏn pơhrui glăi amra pơkă tui nua duh glăi djơ̆ hăng nua sĭ. Hoàng Văn Cường, Khua pơ ala mơnuih ƀôn sang ƀôn prong Hà Nội brơi thâo:

“Tơlơi phiăn lŏn mơnai (čih pơkra glăi) anăp nao hơdră wai pơgang brơi tơlơi dưi kơ mơnuih ƀôn sang klă hloh. Pơhmutu lơm pơhrui glăi lŏn mơnai, nua lŏn duh glăi kiăng pơkă bơkơnar ƀudah aset ƀiă tui nua sĭ mơdrô hăng sit biă mă ñu bơkơnar hăng nua sĭ mơ̆ Kơnuk kơna pơkă. Nua lŏn mơnai jing nua lăi pơthâo amăng rĭm thun, hơmâo pơplih amăng rĭm thun kah hăng djơ̆ hăng nua sĭ mơdrô phrâo. Yua anun amra huăi ƀuh prăk duh aset pơhmu hăng nua sĭ mơdrô kar hăng hlâo adih”.

Tui tơlơi phiăn phrâo, bruă mă yua lŏn mơnai amra pơplih tui jơlan gah lăi pơthâo tong ten, tơpă sit, tơlơi dưi lĕ bơkơnar brơi abih bang mơnuih. Hluai tui bruă bơkơtưn blơi tui nua bơrơsua, tơlơi dưi amra brơi hơdôm anom bơwih ƀong sĭ mơdrô, hơmâo tơlơi găn rơgao amăng bruă yua lŏn mơnai. Hơdră bruă phrâo amra huăi ngă ƀuh kơ bruă rơkâo-brơi. Ơi Lê Hoàng Châu, Khua khul mơnuih sĭ mơdrô lŏn mơnai ƀôn prong Hồ Chí Minh brơi thâo:

“Ƀing gơmơi lăng yôm hơdră bruă anai. Tơdah dưi ngă tui djop, khut khăt tơpă amra hơmâo tơlơi tŭ ư hrŏm amăng mơnuih mơnam hăng wai pơgang brơi tơlơi dưi djơ̆ tơlơi phiăn. Sit biă ñu hăng ƀing mơnuih arăng pơhrui glăi lŏn. Dua dong lĕ wai pơgang brơi tơlơi dưi djơ̆ tơlơi phiăn mwong anom bruă tuh pơ alin. Tlâo lĕ, kơnuk kơna pơhrui glăi lŏn gêh gal hăng pơhlôm brơi tơlơi dưi mơnuih mơnam”.

Tơlơi phiăn lŏn mơnai (čih pơkra glăi) hơmâo tŭ yap amra pơhlôm brơi nua lŏn djơ̆ hăng rơnoh sĭ mơdrô; pơhlôm brơi tơlơi dưi mă yua lŏn mơnai bơkơnar, kah hăng hơdôm tơlơi dưi bơdjơ̆ nao kông ngăn lŏn mơnai mơng mơnuih ƀôn sang, anom bơwih ƀong sĭ mơdrô. Mơng anun pơtrut amăng mă yua lŏn mơnai amăng pơđĭ kyar lŏn ia./.